by Suryaa Desk | Wed, Dec 17, 2025, 10:43 PM

హైదరాబాద్ అత్తాపూర్‌లోని పాండురంగ నగర్‌లో అర్థరాత్రి కలకలం రేగింది. స్థానిక పోచమ్మ దేవాలయంలోకి ఓ గుర్తు తెలియని వ్యక్తి చొరబడి.. అమ్మవారి విగ్రహాన్ని ధ్వంసం చేసేందుకు ప్రయత్నించాడు. సమయానికి అప్రమత్తమైన ఆలయ పూజారి నిందితుడిని అడ్డుకున్నారు. అర్థరాత్రి సమయంలో ఒక వ్యక్తి గోడ దూకి పోచమ్మ ఆలయ ప్రాంగణంలోకి ప్రవేశించాడు. అనంతరం గర్భాలయంలోని విగ్రహాన్ని ధ్వంసం చేసేందుకు ప్రయత్నించాడు. అమ్మవారి చీర, మంగళసూత్రం, దండ అన్ని తీసివేశాడు. పైగా ఇతడు కూడా బట్టలు విప్పేశాడు. అనంతరం అమ్మవారిని పాడు చేయడానికి చూశాడు. దీంతో పక్కనే నిద్రిస్తున్న ఆలయ పూజారికి ఈ నీచుడి శబ్దాలు వినపడ్డాయి. వెంటనే ఆయన మేల్కొని ఆలయంలోకి పరిగెత్తుకుంటూ వచ్చాడు. వచ్చి అతడిని కొట్టి బయటకు తీసుకొచ్చాడు. పూజారి వెంటనే స్థానికులను అప్రమత్తం చేశాడు. అంతా కలిసి అతడిని స్తంభానికి కట్టేసి ప్రశ్నించారు. అతడి మెడలో ఉన్న అమ్మవారి మంగళసూత్రాన్ని తీసుకున్నారు. వెంటనే ఈ విషయాన్ని పోలీసులకు సమాచారం అందించారు. అత్తాపూర్ పోలీసులు వెంటనే సంఘటనా స్థలానికి చేరుకుని నిందితుడిని అదుపులోకి తీసుకున్నారు.