by Suryaa Desk | Fri, Dec 05, 2025, 08:00 PM

23వ భారత్-రష్యా వార్షిక సమావేశం కోసం గురువారం సాయంత్రం.. రష్యా అధ్యక్షుడు వ్లాదిమిర్ పుతిన్ ఢిల్లీలో అడుగుపెట్టారు. ప్రధానమంత్రి నరేంద్ర మోదీ స్వయంగా వెళ్లి.. పుతిన్‌కు ఆహ్వానం పలికారు. ఇక శుక్రవారం రోజున ఇరువురు దేశాధినేతలు సమావేశమై.. కీలక చర్చలు, ఒప్పందాలు చేసుకున్నారు. పుతిన్ పర్యటన నేపథ్యంలో కేంద్ర ప్రభుత్వం పటిష్ఠ భద్రతా ఏర్పాట్లు, బస ఏర్పాట్లను చేసింది. ఇక పుతిన్ భారత పర్యటన సందర్భంగా.. ఆయన ప్రయాణించిన విమానం ఇప్పుడు ప్రపంచవ్యాప్తంగా ఆసక్తిని కలిగించింది. పుతిన్ ప్రయాణించే కారు ఆరస్ ‌సెనట్ సాయుధ లిమోసిన్‌ను.. భారత పర్యటన కోసం తీసుకురావడం విశేషం. దీంతోపాటు అత్యంత ప్రత్యేకమైన ఇల్యూషిన్ ఐఎల్-96-300పీయూ అధ్యక్ష విమానం కూడా ఇప్పుడు చర్చనీయాంశంగా మారింది.

పుతిన్ ప్రయాణించే ఈ ఇల్యూషిన్ ఐఎల్-96-300పీయూ విమానాన్ని ఫ్లయింగ్ క్రెమ్లిన్ అని పిలుస్తారు. ఇది అత్యవసర పరిస్థితుల్లో సైనిక ఆదేశాలను జారీ చేయడానికి వీలు కల్పించే పూర్తి స్థాయి మొబైల్ కమాండ్ సెంటర్‌గా పనిచేస్తుంది. ఇది పూర్తిగా రష్యన్ మేడ్ విమానం. అత్యాధునిక ఎన్‌క్రిప్టెడ్ కమ్యూనికేషన్ సిస్టమ్స్, ఎలక్ట్రానిక్ రెస్పాన్స్ చర్యలు, మిసైల్ నిరోధక రక్షణలతో పాటు అణు కమాండ్ ఇంటర్‌ఫేస్‌ను కూడా ఈ ఫ్లయింగ్ క్రెమ్లిన్ కలిగి ఉంటుంది. ఈ విమానం లోపల బంగారు పూత, విలాసవంతమైన ఫర్నిచర్‌తో.. ఆకాశంలో తేలియాడే విలాసవంతమైన భవనాన్ని పోలి ఉంటుంది.

ఈ ఇల్యూషిన్ ఐఎల్-96-300పీయూ.. 1980లలో అభివృద్ధి చేసిన ఇల్యూషిన్ ఐఎల్-96-300 విమానాన్ని స్పెషల్‌గా అప్‌గ్రేడ్ చేసిన కొత్త వెర్షన్. ఈ విమానం 55.35 మీటర్ల పొడవు.. 60.12 మీటర్ల రెక్కల వెడల్పు కలిగి ఉంది. ఈ విమానం.. 4 అవియద్విగాటెల్ PS-90A టర్బోఫాన్ ఇంజిన్‌ల ద్వారా శక్తిని పొందుతుంది. ఈ విమానంలో ఒక్కసారి ఇంధనం నింపితే.. నాన్ స్టాప్‌గా దాదాపు 11వేల కిలోమీటర్ల దూరం ప్రయాణిస్తుంది.

ఈ విమానాన్ని రష్యాకు చెందిన వోరోనెజ్ ఎయిర్‌క్రాఫ్ట్ ప్రొడక్షన్ అసోసియేషన్ తయారు చేస్తుంది. రష్యా స్పెషల్ ఫ్లైట్ స్క్వాడ్రన్ ఈ విమానాన్ని ఆపరేట్, మెయింటైన్ చేస్తుంది. ఈ ఇల్యూషిన్ ఐఎల్-96-300పీయూ లోని PU అంటే పుంక్ట్ ఉప్రవ్లెనియా అని అర్థం. అంటే రష్యన్‌లో కమాండ్ పాయింట్ లేదా కమాండ్ పోస్ట్. ఈ విమానం జాతీయ అత్యవసర పరిస్థితుల్లో పూర్తి స్థాయి మొబైల్ కమాండ్ సెంటర్‌గా పనిచేసేలా తయారు చేశారు. విమానం ప్రపంచవ్యాప్తంగా సైనిక, గూఢచార మరియు ప్రభుత్వ నెట్‌వర్క్‌లతో సురక్షిత సంభాషణకు వీలు కల్పించే ఎన్‌క్రిప్టెడ్ కమ్యూనికేషన్ సిస్టమ్స్‌ను కలిగి ఉంది.

రక్షణ వ్యవస్థలు

ఈ పుతిన్ విమానం ఎలక్ట్రానిక్ ప్రతిఘటన చర్యలు, రాడార్ జామింగ్ టెక్నాలజీ సహా అత్యాధునిక రక్షణ వ్యవస్థలను కలిగి ఉంటుంది. క్షిపణి దాడులను ఎదుర్కోవడానికి ఇన్‌ఫ్రారెడ్ డెకాయ్ లాంచర్‌లు, యాంటీ మిస్సైల్స్‌ను మోహరించి ఉంటాయి. ఈ విమానం ఎలక్ట్రానిక్స్ విద్యుదయస్కాంత పల్స్ దాడుల నుంచి తట్టుకునేలా రూపొందించారు. అత్యంత తీవ్రమైన పరిస్థితుల్లో విమానం నుంచే సైనిక ఆదేశాలను, ముఖ్యంగా అణు కమాండ్ ఆదేశాలను జారీ చేయడానికి వీలు కల్పించే ఇంటర్‌ఫేస్‌ను కలిగి ఉంటుంది.

విలాసవంతమైన భవనం

ఇల్యూషిన్ఐఎల్-96-300పీయూ విమానం లోపలి భాగం రష్యా అధ్యక్ష భవనం క్రెమ్లిన్ పనిచేసే విధంగా ఏర్పాటు చేశారు. ఇది ప్రభుత్వ విమానం కంటే ఆకాశంలో తేలియాడే విలాసవంతమైన భవనంలా కనిపిస్తుంది. ఇక ఆ విమానంలో ప్రైవేట్ ప్రెసిడెన్షియల్ సూట్ (బెడ్‌రూమ్‌తో సహా), పెద్ద కాన్ఫరెన్స్ రూమ్, ప్రైవేట్ ఆఫీస్, ప్రముఖుల కోసం గెస్ట్ లాంజ్, షవర్లతో కూడిన విలాసవంతమైన బాత్రూమ్‌లు, స్పెషల్ కిచెన్, జిమ్ స్పేస్ వంటి లగ్జరీ సౌకర్యాలు ఉన్నాయి. ఇక లోపలి భాగంలో బంగారు పూత పూసిన ఫిట్టింగ్‌లు, విలువైన కర్రేలియన్ బిర్చ్‌తో చేసిన ఇంటీరియర్స్, నియోక్లాసికల్ ఫర్నిషింగ్, ప్రీమియం లెదర్, అద్భుతమైన కళాఖండాలను కలిగి ఉంటుంది. ప్రపంచంలోని చాలా మంది అధినేతలు.. తాము ప్రయాణించేందుకు బోయింగ్ లేదా ఎయిర్‌బస్ జెట్‌లను ఉపయోగిస్తుంటే.. పుతిన్ మాత్రం పూర్తిగా రష్యాలో తయారైన విమానాన్ని ఉపయోగిస్తుండటం విశేషం.