by Suryaa Desk | Wed, Dec 03, 2025, 08:45 PM

ఇంజినీరింగ్, ఐటీ, హెల్త్, గ్రీన్ ఎనర్జీ వంటి కీలక రంగాల్లో నైపుణ్యం కలిగిన కార్మికుల కొరతతో జర్మనీ తీవ్ర అవస్థలు ఎదుర్కొంటోంది. ఈ ఉద్యోగాల కొరతను అధిగమించేందుకు జర్మన్ ప్రభుత్వం.. తన ఇమ్మిగ్రేషన్ విధానాల్లో భారీగా సంస్కరణలు తీసుకువచ్చింది. వీసా నిబంధనలను సులభతరం చేయడంతోపాటు.. యూరోపియన్ యూనియన్ (ఈయూ) బ్లూ కార్డ్ జీతం అవసరాలను తగ్గించడం, కొత్తగా ఆపర్చునిటీ కార్డ్ ప్రవేశపెట్టడం ద్వారా గ్లోబల్ టాలెంట్‌కు.. ముఖ్యంగా భారతీయ విద్యార్థులకు భారీ మొత్తంలో అవకాశాలు కల్పిస్తోంది. ప్రస్తుతం అమెరికాలో భారతీయులకు ఉద్యోగాలు తగ్గుతున్న వేళ.. జర్మనీ ఆశాకిరణంగా కనిపిస్తోంది.

ఈ టాలెంట్ వ్యూహానికి కేంద్రంగా జర్మనీలోని అగ్రశ్రేణి టీయూ9 యూనివర్సిటీలు నిలుస్తున్నాయి. ఈ యూనివర్సిటీలు ఆర్టిఫిషియల్ ఇంటెలిజెన్స్ (ఏఐ), రోబోటిక్స్, ఆటోమోటివ్ సాఫ్ట్‌వేర్, పునరుత్పాదక శక్తి వంటి అత్యంత డిమాండ్ ఉన్న రంగాలకు అనుగుణంగా కోర్సులను అందిస్తున్నాయి. మెకానికల్, ఆటోమోటివ్, ఎలక్ట్రికల్, మెకట్రానిక్స్, సివిల్ ఇంజనీరింగ్ వంటి విభాగాలు జర్మనీ పారిశ్రామిక భవిష్యత్తుకు వెన్నెముకగా ఉన్నాయి. భారతదేశ యువతలో ఉన్న నైపుణ్యం, జర్మనీలో ఉన్న ఉచిత ట్యూషన్ ఫీజుల వంటి ప్రోత్సాహకాల కారణంగా.. ప్రస్తుత పరిస్థితి భారతీయ యువతకు ఒక గొప్ప ప్రపంచ అవకాశాన్ని అందిస్తుందని సంబంధిత వర్గాలు చెబుతున్నాయి.

జర్మనీలో పెరుగుతున్న పారిశ్రామిక డిమాండ్, తగ్గుతున్న శ్రామిక శక్తి మధ్య ఈ అంతరాన్ని తగ్గించేందుకు భారతీయ యువతకు పెద్ద ఎత్తున అవకాశాలు లభించనున్నాయి. ప్రస్తుతం జర్మనీలో దాదాపు 6 లక్షల వృత్తిపరమైన ఉద్యోగాలు భర్తీ చేయకుండా ఖాళీగా ఉన్నాయి. ఇంజినీరింగ్, ఐటీ, మొబిలిటీ టెక్, గ్రీన్ ఎనర్జీ, ఆరోగ్య సంరక్షణ వంటి కీలక రంగాల్లో నిపుణుల కొరతతో జపాన్ తీవ్రంగా ఇబ్బందులు ఎదుర్కొంటోంది.

ఇది తాత్కాలిక నైపుణ్యాల కొరత మాత్రమే కాకుండా.. వృత్తిపరమైన నిర్మాణాన్ని పునర్నిర్మించే నిర్మాణాత్మక పరివర్తన అని నిపుణులు పేర్కొంటున్నారు. ప్రపంచ దేశాల్లో ఉన్న నైపుణ్యాలను తమ దేశంలోకి ఆకర్షించడానికి జర్మన్ ప్రభుత్వం ఇమ్మిగ్రేషన్ ప్రక్రియలను సరళీకరించింది. కొత్తగా ఆపర్చునిటీ కార్డ్‌ను తీసుకొచ్చింది. ముందస్తు ఉద్యోగ ఆఫర్ లేకుండానే విదేశీ నిపుణులు జర్మనీకి వచ్చి.. పని వెతుక్కోవడానికి ఈ ఆపర్చునిటీ కార్డు అనుమతిస్తుంది.

వీటితోపాటు ఈయూ బ్లూ కార్డ్ నైపుణ్యం కలిగిన నిపుణుల కోసం.. దీని కనీస జీతం అవసరాలను తగ్గించాయి. అదే సమయంలో వీసా దరఖాస్తులు, ఇతర ప్రక్రియల కోసం డిజిటల్ ప్రాసెసింగ్‌ను మరింత వేగవంతం చేశారు. జర్మనీలోని అగ్రశ్రేణి టెక్నికల్ యూనివర్సిటీలు (టీయూ9) ఈ వ్యూహంలో కీలక పాత్ర పోషిస్తున్నాయి. ఈ యూనివర్సిటీల్లోని కోర్సులు జర్మనీకి అత్యవసరంగా అవసరమైన మెకానికల్, ఆటోమోటివ్, ఎలక్ట్రికల్ అండ్ ఎలక్ట్రానిక్స్, మెకట్రానిక్స్, మొబిలిటీ సిస్టమ్స్, ఎనర్జీ ఇంజనీరింగ్, సివిల్ ఇంజనీరింగ్ వంటి స్టెమ్ విభాగాలపై దృష్టి సారిస్తాయి.

అదే సమయంలో అనేక అగ్రశ్రేణి జర్మన్ యూనివర్సిటీలు దాదాపు జీరో ట్యూషన్ ఫీజుతో నాణ్యమైన విద్యను అందిస్తున్నాయి. ఇది భారతీయ విద్యార్థులకు ఆర్థికంగా భారీ ప్రయోజనకరంగా మారింది. జర్మనీ పారిశ్రామిక భవిష్యత్తుకు కీలకమైన ఈ స్టె్మ్ రంగాల్లో శిక్షణ పొందిన భారతీయ విద్యార్థులకు ప్రపంచంలోనే అత్యుత్తమ కెరీర్ మార్గాలు అందుబాటులో ఉన్నాయని నిపుణులు అభిప్రాయం వ్యక్తం చేస్తున్నారు.