by Suryaa Desk | Sat, Nov 29, 2025, 04:53 PM

ప్రకాశం జిల్లా కనిగిరి మండలంలోని కొత్తపాలెం గ్రామంలో ఓ వినూత్న సంప్రదాయం అందరి దృష్టిని ఆకర్షిస్తోంది. ఇక్కడ దామిరెడ్డి వంశస్థులు ప్రతి మూడేళ్లకు ఒకసారి తమ భార్యలను మళ్లీ పెళ్లి చేసుకుంటారు. ఈ ఏడాది జరిగిన వేడుకలో ఏకంగా 40 జంటలు వేదమంత్రాల సాక్షిగా మరోసారి ఒక్కటయ్యాయి.గ్రామంలోని నాగార్పమ్మ అమ్మవారి ఆలయంలో జరిగే కొలుపుల సందర్భంగా ఈ ఆచారాన్ని పాటిస్తారు. పూర్వీకుల నుంచి వస్తున్న ఈ సంప్రదాయంలో భాగంగా, కొలుపుల రెండో రోజు 'పట్నం కొలుపులు' నిర్వహిస్తారు. ఈ సమయంలోనే భార్యాభర్తలు సంప్రదాయబద్ధంగా మళ్లీ వివాహ బంధంతో ఒక్కటవుతారు.నేటి ఆధునిక కాలంలో వివాహ బంధాలు బలహీనపడుతున్నాయని, చిన్నచిన్న కారణాలకే దంపతులు విడిపోతున్నారని ఆవేదన వ్యక్తమవుతున్న తరుణంలో, కొత్తపాలెం గ్రామస్థులు పాటిస్తున్న ఈ ఆచారం ప్రత్యేకంగా నిలుస్తోంది. ఇదేదో మొక్కుబడిగా కాకుండా, శాస్త్రోక్తంగా పండితుల మంత్రోచ్ఛారణల మధ్య ఈ వివాహ వేడుకను ఘనంగా జరుపుకోవడం విశేషం.