by Suryaa Desk | Mon, Feb 05, 2024, 06:49 PM

అనకాపల్లి జిల్లా నర్సీపట్నంలో సాఫ్ట్‌వేర్ ఇంజినీర్‌గా ఉన్న యువతిపై విషప్రయోగం ఘటనలో సంచలన విషయాలు వెలుగులోకి వస్తున్నాయి. విష ప్రయోగం కారణంగా చనిపోయిన యువతికి, స్లో పాయిజన్ ఇచ్చాడని ఆరోపణలు ఎదుర్కొంటున్న వాసిరెడ్డి శేఖర్ అనే యువకుడికి మధ్య ప్రేమ వ్యవహారం సాగిందని తెలిసింది.గత ఆరేళ్లుగా వీరిద్దరూ ప్రేమించుకుంటున్నారని, అయితే ఇటీవలి కాలంలో శేఖర్ పెళ్లికి నిరాకరిస్తున్నాడని యువతి కుటుంబసభ్యులు చెప్తున్నారు.

ఘటనకు సంబంధించి నర్సీపట్నంలోని శారదానగర్‌కు చెందిన యువతి.. హైదరాబాద్‌లోని ఓ ఐటీ సంస్థలో సాఫ్ట్‌వేర్ ఇంజినీర్‌గా పనిచేస్తోంది. ఇక నాతవరం మండలం వెన్నలపాలేనికి చెందిన వాసిరెడ్డి చంద్రశేఖర్ అనే యువకుడు సైతం అక్కడే పనిచేస్తున్నాడు. గత ఆరేళ్లుగా వీరిద్దరికి పరిచయం ఉంది. జనవరి 27 వీరిద్దరూ వైజాగ్‌లోని ఓ లాడ్జీలో ఉన్నారు. ఆ రోజు అర్ధరాత్రే శేఖర్.. యువతిని శారదానగర్‌లోని తన ఇంటివద్ద విడిచిపెట్టి వెళ్లాడు. ఆ తర్వాత తలనొప్పిగా ఉందని ఇంట్లోకి వెళ్లి పడుకున్న యువతి.. మరుసటి రోజు నీరసంతో వాంతులు చేసుకోవడం మొదలెట్టింది. దీంతో భయపడిపోయిన కుటుంబసభ్యులు వెంటనే ఆస్పత్రికి తరలించగా.. అప్పటి నుంచి చికిత్స పొందుతూ వచ్చిన యువతి సోమవారం ప్రాణాలు కోల్పోయింది. అయితే తన కుమార్తెపై విషప్రయోగం జరిగిందని, దీనికి కారణం శేఖర్ అనే వ్యక్తేనంటూ యువతి తల్లి పోలీసులకు ఫిర్యాదు చేసింది.

అయితే గత ఆరేళ్లుగా వీరిద్దరి మధ్య ప్రేమ వ్యవహారం నడుస్తోందని యువతి కుటుంబసభ్యులు చెప్తున్నారు. వీరిద్దరి మధ్య శారీరక సంబంధం కూడా ఉందని తెలిపారు. ఎలాగూ పెళ్లి చేసుకుంటామని యువతిని నమ్మించి, శేఖర్ శారీరకంగా వాడుకున్నాడని ఆరోపిస్తున్నారు. ఈ సంబంధం కారణంగా యువతికి ఒకట్రెండుసార్లు అబార్షన్ కూడా జరిగిందని యువతి కుటుంబసభ్యులు చెప్తున్నారు. అయితే ఈ విషయాలన్నీ యువతి తన తల్లికి చెప్పడంతో.. అమ్మాయి కుటుంబసభ్యులు, శేఖర్ ఇంటికి వెళ్లి పెళ్లి విషయమై మాట్లాడారు. అయితే శేఖర్ తల్లిదండ్రులు వీరి పెళ్లికి నిరాకరించారు. తల్లిదండ్రులు ఒప్పుకోకపోవటంతో తాను పెళ్లిచేసుకోలేనని యువతికి శేఖర్ స్పష్టం చేశాడు. అయితే యువతి పెళ్లి చేసుకోవాలని గట్టిగా పట్టుబట్టడంతో.. శేఖర్ కుటుంబసభ్యుల నుంచి బెదిరింపులు కూడా వచ్చాయని యువతి కుటుంబసభ్యులు చెప్తున్నారు. చివరకు స్లో పాయిజన్ ఇచ్చి చంపేశాడని ఆరోపిస్తున్నారు.