జెరూసలేం: ఇజ్రాయెల్, యునైటెడ్ కింగ్డమ్ (యూకే) ల నడుమ దౌత్యపరమైన ఉద్రిక్తతలు తీవ్రస్థాయికి చేరాయి. తూర్పు జెరూసలేంలో ఉన్న తమ కాన్సులేట్ను 30 రోజుల్లోగా మూసివేయాలని, అక్కడ పనిచేస్తున్న దౌత్యవేత్తలు తమ హోదాను కోల్పోతారని బ్రిటన్కు ఇజ్రాయెల్ స్పష్టం చేసినట్లు దౌత్య వర్గాలు వెల్లడించాయి.
వెస్ట్ బ్యాంక్లోని ఇజ్రాయెల్ స్థావరాల నుంచి వచ్చే ఉత్పత్తులపై, అలాగే ఆ స్థావరాలకు సేవలు అందిస్తున్న సంస్థలపై ఆంక్షలు విధిస్తున్నట్లు యూకే, ఫ్రాన్స్, కెనడాలు ప్రకటించిన మరుసటి రోజే ఇజ్రాయెల్ ఈ ప్రతికార చర్యలకు పూనుకుంది.
1839 నుండి కొనసాగుతున్న ఈ కాన్సులేట్ మూసివేతతో పాటు, రమల్లా, గాజా సమన్వయ మిషన్లో ఉన్న కొందరు బ్రిటిష్ అధికారులను ఏడు రోజుల్లోగా దేశం విడిచి వెళ్లాలని ఇజ్రాయెల్ ఆదేశించింది. అలాగే వెస్ట్ బ్యాంక్లో పాలస్తీనా భద్రతా దళాలకు బ్రిటన్ ఇచ్చే శిక్షణను నిలిపివేస్తూ, ఇజ్రాయెల్ను విమర్శించే 12 మంది బ్రిటిష్ చట్టసభ్యులపై దేశంలోకి ప్రవేశించకుండా నిషేధం విధించింది.
ఇజ్రాయెల్ నిర్ణయం పట్ల యూకే విదేశాంగ కార్యదర్శి ఎడ్ మిలిబాండ్ విచారం వ్యక్తం చేస్తూనే, పాలస్తీనియన్లపై జరుగుతున్న హింసను చూస్తూ ఊరుకోలేమని స్పష్టం చేశారు. మరోవైపు ఈ ఆంక్షలు నైతికంగా వక్రీకరించబడ్డాయని, తమ దేశంలో జరగనున్న ఎన్నికల్లో యూకే జోక్యం చేసుకుంటోందని ఇజ్రాయెల్ విదేశాంగ మంత్రి గిడియన్ సార్ ఆరోపించారు. స్థావరాల ఆంక్షలపై మరింత మంది మిత్రదేశాల ప్రతిస్పందనను ఎదుర్కొనేందుకు ఇజ్రాయెల్ ప్రభుత్వం అత్యవసర సమావేశాన్ని ఏర్పాటు చేయనుంది.
