టాలీవుడ్లో వైవిధ్యమైన పాత్రలతో తనకంటూ ప్రత్యేక గుర్తింపు సంపాదించుకున్న ప్రతిభావంతురాలైన నటి అనన్య నాగళ్ల ప్రధాన పాత్రలో నటిస్తున్న సరికొత్త చిత్రం ‘లీసా’. ఓం సాయిరామ్ ఆర్ట్స్ మరియు ఐరాస్ (IRAHS) ఎంటర్టైన్మెంట్స్ పతాకాలపై వెంకట్ దుగ్గిరెడ్డి, రామకృష్ణ ఐల సంయుక్తంగా ఈ చిత్రాన్ని నిర్మిస్తున్నారు. ఈ సినిమాతో జవహర్ పవార్ దర్శకుడిగా టాలీవుడ్కు పరిచయమవుతున్నారు.
భారతీయ చిత్ర పరిశ్రమలో ఇప్పటివరకు కనీవినీ ఎరుగని రీతిలో రెండు భిన్నమైన జోనర్లను సరికొత్త పద్ధతిలో మేళవించి ‘లీసా’ కథను తెరకెక్కించారు. ప్రముఖ సినిమాటోగ్రాఫర్ సతీష్ రెడ్డి మాసం ఈ చిత్రానికి కెమెరా బాధ్యతలు నిర్వర్తించడంతో పాటు స్క్రీన్ప్లే సమకూర్చి, సహ నిర్మాతగానూ వ్యవహరిస్తున్నారు. 'ఎస్సార్ కళ్యాణమండపం' fame శ్రీధర్ గాదె ఈ చిత్రానికి ఎడిటర్గా పనిచేస్తున్నారు. కూర్గ్, విరాజ్పేట, పెంచలకోన వంటి అద్భుతమైన మరియు సుందరమైన లొకేషన్లలో అత్యున్నత నిర్మాణ విలువలతో ఈ సినిమా షూటింగ్ విజయవంతంగా పూర్తి చేసుకుంది.
ఈ చిత్రానికి 'మెలోడీ బ్రహ్మ' మణిశర్మ సంగీతం అందిస్తుండటం సినిమాపై అంచనాలను భారీగా పెంచేసింది. ప్రస్తుతం పోస్ట్ ప్రొడక్షన్ పనులు శరవేగంగా జరుగుతున్నాయని, చూసిన రషెస్ అద్భుతంగా వచ్చాయని చిత్ర యూనిట్ తెలిపింది. అన్ని కార్యక్రమాలను పూర్తి చేసి నవంబర్ నెలలో ‘లీసా’ చిత్రాన్ని గ్రాండ్గా థియేటర్లలో విడుదల చేయడానికి సన్నాహాలు చేస్తున్నట్లు మేకర్స్ అధికారికంగా ప్రకటించారు.
