తెలంగాణలో మరో జేఎన్టీయూ కళాశాల.. శంకుస్థాపన చేసిన సీఎం.

ఖమ్మం జిల్లా విద్యా ముఖచిత్రాన్ని మార్చే దిశగా ఏదులాపురంలో జేఎన్‌టీయూ (JNTU) ఇంజనీరింగ్ కళాశాల ఏర్పాటుకు ముఖ్యమంత్రి రేవంత్ రెడ్డి శంకుస్థాపన చేశారు. జిల్లా పర్యటనలో భాగంగా సుమారు 362 కోట్ల రూపాయల విలువైన వివిధ అభివృద్ధి పనులకు శ్రీకారం చుట్టిన ముఖ్యమంత్రి.. సాంకేతిక విద్యను స్థానిక విద్యార్థులకు మరింత చేరువ చేయడమే లక్ష్యంగా ఈ కళాశాలను మంజూరు చేశారు.

ముఖ్యమంత్రి పర్యటనలో జేఎన్‌టీయూ కళాశాలతో పాటు మరికొన్ని కీలక ప్రాజెక్టులకు పునాది పడింది. ఏదులాపురంలోనే కొత్తగా నిర్మించిన ప్రభుత్వ నర్సింగ్ కళాశాలను ఆయన ప్రారంభించారు. అలాగే కూసుమంచిలో వంద పడకల ఆసుపత్రి, మద్దులపల్లిలో ఆధునిక మార్కెట్ యార్డు నిర్మాణాలకు శంకుస్థాపనలు జరిగాయి. మున్నేరు నుండి పాలేరు వరకు లింక్ కెనాల్ పనులకు కూడా సీఎం గ్రీన్ సిగ్నల్ ఇచ్చారు. ఈ కార్యక్రమాల్లో ఉప ముఖ్యమంత్రి భట్టి విక్రమార్కతో పాటు మంత్రులు ఉత్తమ్ కుమార్ రెడ్డి, తుమ్మల నాగేశ్వరరావు, పొంగులేటి శ్రీనివాసరెడ్డి పాల్గొన్నారు.

నర్సింగ్ విద్యార్థులతో ఏర్పాటు చేసిన ముఖాముఖిలో ముఖ్యమంత్రి ఆసక్తికర వ్యాఖ్యలు చేశారు. జపాన్, జర్మనీ వంటి దేశాల్లో నర్సులకు ఇంజనీర్ల కంటే ఎక్కువ డిమాండ్ ఉందని.. కేవలం భాష తెలియకపోవడం వల్లే మన విద్యార్థులు ఆ అవకాశాలను కోల్పోతున్నారని ఆయన అభిప్రాయపడ్డారు. ఈ సమస్యను అధిగమించడానికి నర్సింగ్ విద్యార్థులకు కళాశాలల్లోనే జపనీస్ మరియు జర్మన్ భాషలను నేర్పించేలా ప్రభుత్వం ఒప్పందాలు చేసుకుందని వెల్లడించారు. త్వరలోనే ప్రత్యేక భాషా ఉపాధ్యాయులను నియమించి.. అంతర్జాతీయ స్థాయిలో మన విద్యార్థులు రాణించేలా తీర్చిదిద్దుతామని హామీ ఇచ్చారు.

మద్దులపల్లి బహిరంగ సభలో ముఖ్యమంత్రి పలు కీలక ప్రకటనలు చేశారు. అర్హత ఉండి రేషన్ కార్డు లేని వారు దరఖాస్తు చేసుకుంటే త్వరలోనే కొత్త కార్డులు మంజూరు చేస్తామని భరోసా ఇచ్చారు. ఆధ్యాత్మికంగా కూడా జిల్లాను అభివృద్ధి చేస్తామని.. భద్రాచలం రామాలయాన్ని అయోధ్య తరహాలో అత్యద్భుతంగా తీర్చిదిద్దుతామని ప్రకటించారు. విద్య, వైద్యం పేదవాడికి ఉచితంగా, నాణ్యంగా అందడమే ప్రజా ప్రభుత్వ ప్రధాన ఆశయమని రేవంత్ రెడ్డి స్పష్టం చేశారు.