ఉత్తర తెలంగాణకు బంపర్ గిఫ్ట్.. రూ.10,034 కోట్లతో నాలుగు జాతీయ రహదారులకు కేంద్రం గ్రీన్ సిగ్నల్!

తెలంగాణలోని ఉత్తర జిల్లాల రవాణా వ్యవస్థకు కేంద్ర ప్రభుత్వం భారీ బూస్ట్ ఇచ్చింది. మొత్తం రూ.10,034 కోట్ల అంచనా వ్యయంతో నాలుగు కీలక జాతీయ రహదారుల విస్తరణ మరియు నాలుగు-లేన్‌లుగా అప్‌గ్రేడ్ చేయడానికి కేంద్ర రోడ్డు రవాణా, జాతీయ రహదారుల మంత్రిత్వ శాఖ ఆమోదం తెలిపింది. ఈ ప్రాజెక్టులు పూర్తయితే ఆదిలాబాద్, నిజామాబాద్, కామారెడ్డి, జగిత్యాల, మంచిర్యాల జిల్లాల మధ్య దూరాలు తగ్గడమే కాకుండా వాణిజ్య, పరిశ్రమల అభివృద్ధికి బలమైన వెన్నుముకగా మారనున్నాయి.
మహబూబ్‌నగర్ నుంచి గుడెబల్లూర్ వరకు 80 కిలోమీటర్ల మేర NH-167 రోడ్డును రూ.2,662 కోట్లతో నాలుగు లేన్లుగా విస్తరించనున్నారు. అలాగే NH-63లో అర్మూర్-జగిత్యాల (71 కిలోమీటర్లు) సెక్షన్‌కు రూ.2,338 కోట్లు, జగిత్యాల-మంచిర్యాల (68 కిలోమీటర్లు) సెక్షన్‌కు రూ.2,550 కోట్లు కేటాయించారు. ఈ రెండు భాగాలు కలిపి హైదరాబాద్-నాగపూర్ ఆర్థిక కారిడార్‌కు మరింత బలం చేకూర్చనున్నాయి.
మరో ముఖ్యమైన ప్రాజెక్టు NH-563 (జగిత్యాల-కరీంనగర్ సెక్షన్) 59 కిలోమీటర్ల మేర రూ.2,484 కోట్లతో అప్‌గ్రేడ్ అవుతుంది. కరీంనగర్, జగిత్యాల మధ్య ప్రయాణ సమయం గణనీయంగా తగ్గడంతో పాటు వ్యవసాయ ఉత్పత్తులు, పరిశ్రమల సరఫరాకు ఊతం లభించనుంది. ఈ నాలుగు రహదారులు పూర్తయితే ఉత్తర తెలంగాణ పూర్తిగా కొత్త రూపం సంతరించుకుంటుందని నిపుణులు అభిప్రాయపడుతున్నారు.
ఈ మెగా ప్రాజెక్టులు కేవలం రవాణా సౌలభ్యం మాత్రమే కాకుండా, గ్రామీణ ఆర్థిక వ్యవస్థను బలోపేతం చేయడంతో పాటు వేలాది ఉద్యోగ అవకాశాలను సృష్టించనున్నాయి. తెలంగాణ ప్రభుత్వం కోరిన ప్రతిపాదనలకు కేంద్రం సానుకూలంగా స్పందించడం రాష్ట్ర అభివృద్ధిలో కీలక మైలురాయిగా నిలవనుంది. ఈ రోడ్లు త్వరలోనే నిర్మాణ దశలోకి వెళ్తే మరో రెండేళ్లలో ఉత్తర తెలంగాణ రవాణా మ్యాప్ పూర్తిగా మారిపోనుంది.