పటాన్చెరు సూపర్ స్పెషాలిటీ ఆసుపత్రిని పరిశీలించిన ఎమ్మెల్యే జిఎంఆర్

పటాన్చెరు : పటాన్చెరు డివిజన్ పరిధిలోని ప్రభుత్వ ఐడియా ఆసుపత్రి ఆవరణలో నూతనంగా నిర్మిస్తున్న సూపర్ స్పెషాలిటీ ఆసుపత్రి పనులు పూర్తయ్యాయని.. అతి త్వరలో ఆస్పత్రికి సంబంధించిన పూర్తి స్థాయి సామాగ్రి రాబోతుందని పటాన్చెరు శాసనసభ్యులు గూడెం మహిపాల్ రెడ్డి తెలిపారు. సోమవారం ఉదయం ఆస్పత్రి వైద్యులు, TGMSIDC  విభాగం అధికారులతో కలిసి ఆసుపత్రిని పరిశీలించారు. అనంతరం క్యాంపు కార్యాలయంలో ఏర్పాటు చేసిన సమీక్ష సమావేశంలో ఆయన మాట్లాడుతూ..187 కోట్ల రూపాయలతో ఆస్పత్రి నిర్మాణ పనులు శరవేగంగా చేయడం జరిగిందని తెలిపారు. ఆస్పత్రి సివిల్ వర్క్ పూర్తి కావడం జరిగిందని.. ఆపరేషన్ థియేటర్, స్కానింగ్ మెషిన్లు, ఇతర పరికరాల కోసం 23 కోట్ల 56 లక్షల రూపాయల నిధులు వెచ్చించడం జరుగుతుందని తెలిపారు. రాబోయే నెల రోజుల్లో ఆసుపత్రి ప్రారంభోత్సవానికి సన్నాహాలు చేస్తున్నామని తెలిపారు.

నూతన ఆసుపత్రి అందుబాటులోకి రావడం ద్వారా పటాన్చెరు నియోజకవర్గ ప్రజలకు పైసా ఖర్చు లేకుండా అత్యాధునిక వైద్యం అందుబాటులోకి వస్తుందని ఆశాభావం వ్యక్తం చేశారు. హరిత ట్రిబ్యునల్ ఆదేశాల మేరకు. గత ప్రభుత్వ హయాంలో మాజీ ముఖ్యమంత్రి కేసీఆర్ చేతుల మీదుగా ఆసుపత్రి నిర్మాణానికి శంకుస్థాపన చేయడం జరిగిందని గుర్తు చేశారు. ప్రస్తుతం ముఖ్యమంత్రి రేవంత్ రెడ్డి చేతుల మీదుగా ఆసుపత్రిని ప్రారంభించేందుకు సలహాలు చేస్తున్నామని తెలిపారు.  

తెలంగాణ స్టేట్ మెడికల్ సర్వీసెస్ అండ్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ (TSMSIDC) ఆధ్వర్యంలో నిర్మాణ పనులు పూర్తి చేయడం జరిగిందని  తెలిపారు.పారిశ్రామిక ప్రాంతంలో వెలువడే కాలుష్యం మూలంగా వచ్చే వ్యాధులను గుర్తించి అందుకు అవసరమైన వైద్య విభాగాలను, నిపుణులైన వైద్యులు ఆస్పత్రిలో అందుబాటులో ఉంటారని తెలిపారు. దీంతోపాటు ప్రధానంగా పారిశ్రామికవాడల్లో జరిగే ప్రమాదాలను దృష్టిలో ఉంచుకుని అందుకు అవసరమైన అత్యాధునిక శస్త్ర చికిత్స విభాగాలు సైతం ఇందులో ఏర్పాటు కానున్నాయని పేర్కొన్నారు. ఈ సమావేశంలో డిసిహెచ్ఎస్ షరీఫ్, ఈఈ రవీందర్ రెడ్డి, ఏరియా ఆసుపత్రి సూపరిండెంట్ చంద్రశేఖర్, ఆసుపత్రి సలహా సంఘం కమిటీ సభ్యులు కంకర సీనయ్య, తదితరులు పాల్గొన్నారు.