తెలంగాణ ఆర్టీసీ వినూత్న కార్యక్రమం.. ఆ బస్సు డిపోలో ప్రారంభం

తెలంగాణ రాష్ట్ర రోడ్డు రవాణా సంస్థ ప్రయాణీకుల సేవల్లో విప్లవాత్మక మార్పులు తీసుకురావడానికి వినూత్న కార్యక్రమాన్ని ప్రారంభించింది. సంస్థ మేనేజింగ్ డైరెక్టర్ ఆదేశాల మేరకు.. బస్సుల్లో కండక్టర్లు ప్రయాణికులను పలకరించే ప్రత్యేక విధానం ఇప్పుడు రాష్ట్రవ్యాప్తంగా ప్రశంసలు అందుకుంటోంది. ఈ కార్యక్రమం కేవలం ఒక చిన్న మార్పు మాత్రమే అయినప్పటికీ.. ఇది ప్రయాణ అనుభవాన్ని పూర్తిగా మారేస్తుందని అధికారులు ధీమా వ్యక్తం చేస్తున్నారు.

ఈ కొత్త ఒరవడి బండ్లగూడ డిపోలో ప్రారంభమై.. ప్రస్తుతం ఇతర డిపోలకు కూడా విస్తరించింది. ప్రతీ ట్రిప్ ప్రారంభంలోనే బస్సులోని కండక్టర్లు వినమ్రంగా ప్రయాణికులను పలకరించి , ఆత్మీయ స్వాగతం పలుకుతున్నారు. అంతేకాకుండా.. బస్సు ఎక్కడి నుంచి ఎక్కడికి వెళ్తుందో, ప్రయాణించే మార్గాన్ని కూడా స్పష్టంగా తెలియజేస్తున్నారు. ఈ విధానం ద్వారా ప్రభుత్వ రవాణా వ్యవస్థపై ప్రయాణికులకు మరింత నమ్మకం, సానుకూల అనుభవాన్ని కల్పించడం.. తద్వారా ప్రయాణికుల భద్రత , సౌకర్యాన్ని పెంచడం ఆర్టీసీ లక్ష్యం.

ఆర్టీసీ తీసుకున్న ఈ సానుకూల నిర్ణయంపై ప్రజల నుంచి విపరీతమైన స్పందన లభిస్తోంది. ఒక ప్రభుత్వ రవాణా వ్యవస్థ ఇంత స్నేహపూర్వకంగా మారడం.. ప్రయాణికులకు విలువనివ్వడం చాలా సంతోషకరం అంటూ నెటిజన్లు సామాజిక మాధ్యమాల్లో కామెంట్లు చేస్తున్నారు. ప్రస్తుతం ఆర్టీసీ కండక్టర్ల పలకరింపు వీడియోలు సోషల్ మీడియాలో విపరీతంగా వైరల్ అవుతున్నాయి. ఇది ఆర్టీసీ ప్రతిష్టను మరింతగా పెంచడమే కాకుండా.. సంస్థ పట్ల ప్రజల్లో సానుకూల దృక్పథాన్ని బలపరుస్తోంది. ఈ చిన్న ప్రయత్నం ద్వారా టీఎస్ ఆర్టీసీ కేవలం ప్రయాణికుల మనసులను గెలుచుకోవడమే కాకుండా, ఇతర ప్రభుత్వ సంస్థలకు కూడా మెరుగైన సేవలను అందించడంలో ఒక ఆదర్శంగా నిలుస్తోంది.

 ఇదిలా ఉండగా.. తెలంగాణ ఆర్టీసీ బస్సుల సమాచారం ఇకపై గూగుల్ మ్యాప్స్‌లో అందుబాటులోకి రానుంది. ఈ మేరకు ఆర్టీసీ, గూగుల్  మధ్య ఐటీ శాఖ ద్వారా ఒప్పందం కుదిరింది. ఆర్టీసీలోని దాదాపు 9,500 బస్సుల లైవ్ డేటాను గూగుల్‌కు అందించనున్నారు.

ఈ సమాచారం ద్వారా.. ప్రయాణికులు బస్సు ఎక్కడుందో, ఎంత సమయంలో చేరుకుంటుందో తెలుసుకోవచ్చు. 30 సెకన్లకు ఒకసారి బస్సు కదలికలు అప్‌డేట్ అవుతాయి. ముందుగా సిటీ బస్సుల్లో ఈ సేవలు అందుబాటులోకి వస్తాయి.. ఆ తర్వాత జిల్లా, అంతర్రాష్ట్ర సర్వీసులకు కూడా విస్తరిస్తారు. ఈ చర్యతో ఆర్టీసీ సేవలు మరింత పారదర్శకంగా మారనున్నాయి.