కేబినెట్ పై విమర్శలు.. హరీశ్‌రావుపై మంత్రి లక్ష్మణ్ ఫైర్.. క్షమాపణ చెప్పాలని డిమాండ్

మాజీ మంత్రి, బీఆర్‌ఎస్ నేత హరీశ్‌రావుపై రాష్ట్ర మంత్రి అడ్లూరి లక్ష్మణ్ తీవ్ర స్థాయిలో మండిపడ్డారు. రాష్ట్ర మంత్రివర్గంపై హరీశ్‌రావు చేసిన వ్యాఖ్యలను మంత్రి లక్ష్మణ్ తీవ్రంగా ఖండించారు. ముందుగా, ఎమ్మెల్సీ కవిత చేసిన ఆరోపణలకు హరీశ్‌రావు సమాధానం చెప్పాలని ఆయన డిమాండ్ చేశారు. "మీ కుటుంబంలో గొడవలు పెట్టుకుని మమ్మల్ని విమర్శించడమేంటి?" అని మంత్రి లక్ష్మణ్ ప్రశ్నించారు. పదేళ్ల పాటు 'మేమే రాజులం, మేమే మంత్రులం' అన్నట్లుగా పరిపాలన చేశారని, ఇప్పుడు కేబినెట్ పంపకాల గురించి మాట్లాడే హక్కు హరీశ్‌రావుకు లేదన్నారు. పదే పదే అబద్ధాలు చెప్పి వాటిని నిజమని నమ్మించే ప్రయత్నంలో హరీశ్‌రావు ఉన్నారని ఆయన ధ్వజమెత్తారు.
కేబినెట్ మంత్రులపై చేసిన అనుచిత వ్యాఖ్యలకు హరీశ్‌రావు వెంటనే క్షమాపణ చెప్పాలని మంత్రి లక్ష్మణ్ డిమాండ్ చేశారు. ప్రస్తుత మంత్రివర్గాన్ని 'దండుపాళ్యం' అని విమర్శిస్తున్న హరీశ్‌రావుపై నిప్పులు చెరిగారు. "పదేళ్లు మీరు స్టువర్టుపురం దొంగల్లా పంచుకున్నారా?" అని ప్రశ్నిస్తూ, గత పదేళ్ల బీఆర్‌ఎస్ కేబినెట్‌లో ముఖ్యమంత్రి, హరీశ్‌రావు, ఆయన బావమరిది తప్ప ఎవరికీ మాట్లాడే అవకాశమే లేదని గుర్తుచేశారు. కనీసం హోంమంత్రిని కూడా ప్రజాభవన్‌కు రానివ్వని చరిత్ర బీఆర్‌ఎస్ ప్రభుత్వానిది అని ఆయన విమర్శించారు.
ప్రస్తుతం మంత్రివర్గంలో దళితులు, బలహీన వర్గాల బిడ్డలు, సామాన్య కార్యకర్తలే ఉన్నారని మంత్రి లక్ష్మణ్ స్పష్టం చేశారు. బడుగు, బలహీన వర్గాలపై హరీశ్‌రావుకు ఎందుకంత చిన్నచూపు అని ఆయన ప్రశ్నించారు. కొత్త కేబినెట్‌పై విషం చిమ్మడం సరికాదన్నారు. తన విమర్శలను నిరూపించుకునేందుకు మంత్రి లక్ష్మణ్ విసిరిన సవాళ్లను స్వీకరించకుండా హరీశ్‌రావు తోక ముడిచారని ఆయన ఆరోపించారు. నామినేషన్ వేసిన వేంకటేశ్వర స్వామి ఆలయం వద్దకు రమ్మంటే రాకుండా తప్పించుకున్నారని, అంబేద్కర్ విగ్రహం దగ్గరికి వస్తానని చెప్పి, ఇప్పుడు తన స్థానంలో కొప్పుల ఈశ్వర్‌ను పంపుతా అనడం తోక ముడవడమేనని మంత్రి తీవ్రస్థాయిలో విమర్శించారు.
చివరగా, హరీశ్‌రావు ముఖ్యమంత్రిని ఏకవచనంతో సంబోధించడం మానుకోవాలని మంత్రి లక్ష్మణ్ హితవు పలికారు. రాజ్యాంగబద్ధమైన పదవిలో ఉన్న ముఖ్యమంత్రిని గౌరవించాలని సూచించారు. జూబ్లీహిల్స్ ఉప ఎన్నిక తెలంగాణ భవిష్యత్‌తో ముడి పడి ఉందని, ఈ సందర్భంగా ప్రజలు విజ్ఞతతో ఆలోచించి సరైన నిర్ణయం తీసుకోవాలని మంత్రి లక్ష్మణ్ కోరారు. హరీశ్‌రావు విమర్శలను తిప్పికొడుతూ, రాష్ట్ర రాజకీయాల్లో మాటల యుద్ధం మరింత వేడెక్కిందని చెప్పవచ్చు.