ఇందిరమ్మ ఇళ్ల చెల్లింపుల్లో స్వల్ప మార్పులు.. పరిపాలన సౌలభ్యం కోసమే: మంత్రి పొంగులేటి

తెలంగాణ ప్రభుత్వం పేదల సొంతింటి కలను నెరవేర్చాలనే లక్ష్యంతో ప్రతిష్టాత్మకంగా అమలు చేస్తున్న 'ఇందిరమ్మ ఇళ్ల పథకం' చెల్లింపు విధానంలో స్వల్ప మార్పులు చేసింది. రాష్ట్ర రెవిన్యూ, గృహ నిర్మాణ శాఖల మంత్రి పొంగులేటి శ్రీనివాస్ రెడ్డి ఈ విషయాన్ని తాజాగా వెల్లడించారు. జాతీయ ఉపాధి హామీ పథకాన్ని (MGNREGS) ఇందిరమ్మ ఇళ్ల నిర్మాణానికి అనుసంధానం చేయడంతో ఈ మార్పులు అనివార్యమయ్యాయని ఆయన తెలిపారు. ఇళ్ల నిర్మాణ పనుల్లో ఉపాధి హామీ పథకం కింద 90 పని దినాలను, అలాగే వ్యక్తిగత మరుగుదొడ్ల నిర్మాణానికి కేంద్రం అనుమతించిన నేపథ్యంలో పరిపాలనా సౌలభ్యం కోసమే ఈ మార్పులు చేసినట్లు మంత్రి పేర్కొన్నారు.
ఈ మార్పులు కేవలం లబ్ధిదారులకు చెల్లించే బిల్లుల షెడ్యూల్‌కు మాత్రమే పరిమితమవుతాయని, ఇళ్ల పథకం కింద ఇచ్చే మొత్తం రూ. 5 లక్షల చెల్లింపులో ఎలాంటి మార్పు ఉండదని మంత్రి స్పష్టం చేశారు. ప్రస్తుతం ఇందిరమ్మ ఇంటి నిర్మాణంలో భాగంగా మొదటి, రెండో దశలు పూర్తయిన తర్వాత లబ్ధిదారుల ఖాతాలో లక్ష రూపాయల చొప్పున జమ చేస్తున్నారు. ఈ రెండు దశల్లోని చెల్లింపుల్లో ఎటువంటి మార్పు ఉండదని మంత్రి పొంగులేటి పేర్కొన్నారు. అయితే, మూడవ దశలో ఇచ్చే రూ. 2 లక్షలలో స్వల్ప మార్పు చేశారు. దీనిని రూ. 1.60 లక్షలకు తగ్గించి, మిగిలిన మొత్తాన్ని తర్వాతి దశల్లో లబ్ధిదారులకు జమ చేస్తామని మంత్రి తెలిపారు.
ఇదిలా ఉండగా, ఇందిరమ్మ ఇళ్ల పథకానికి సంబంధించి లబ్ధిదారుల ఇబ్బందులు, సమస్యలను పరిష్కరించేందుకు రాష్ట్ర ప్రభుత్వం ఒక టోల్ ఫ్రీ నంబర్‌ను ఏర్పాటు చేసింది. ఆదివారం మినహా మిగతా అన్ని రోజుల్లో 18005995991 నంబర్‌కు కాల్ చేసి లబ్ధిదారులు తమ సమస్యలను తెలియజేయవచ్చు. కాల్ సెంటర్ ఏర్పాటు చేసిన నెల రోజుల్లోనే 14,950 ఫిర్యాదులు అందాయి. వీటిలో ఎక్కువ శాతం బిల్లులు పెండింగ్‌లో ఉన్నాయని, కొందరు అధికారులు అక్రమాలకు పాల్పడుతున్నారని చేసిన ఫిర్యాదులే ఎక్కువగా ఉన్నాయి.
ప్రభుత్వం ప్రతిష్టాత్మకంగా చేపట్టిన ఇందిరమ్మ ఇళ్ల పథకంలో చోటు చేసుకున్న ఈ స్వల్ప మార్పులను లబ్ధిదారులు అర్థం చేసుకొని, సహకరించాలని మంత్రి పొంగులేటి శ్రీనివాస్ రెడ్డి కోరారు. పరిపాలన సౌలభ్యం కోసమే, అలాగే జాతీయ ఉపాధి హామీ పథకం అనుసంధానం కారణంగా ఈ చెల్లింపుల షెడ్యూల్‌లో మార్పులు చేయాల్సి వచ్చిందని ప్రభుత్వం తరపున ఆయన వివరణ ఇచ్చారు. ఈ మార్పుల ద్వారా లబ్ధిదారులకు ఎటువంటి ఆర్థిక నష్టం ఉండదని స్పష్టం చేశారు.