రోడ్డు పక్కన పాత వాహనాలు.. ఇక కనపించవ్..! జీహెచ్ఎంసీ కీలక నిర్ణయం

హైదరాబాద్ మహానగరంలో పెరుగుతున్న ట్రాఫిక్ సమస్య, పరిశుభ్రత లోపాలను పరిష్కరించేందుకు గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) కీలకమైన చర్యలకు శ్రీకారం చుట్టింది. నగర రోడ్లపై ఏండ్ల తరబడి నిరుపయోగంగా పడి ఉన్న పాత వాహనాలను తొలగించడానికి ప్రత్యేక డ్రైవ్ నిర్వహించాలని నిర్ణయించింది. పాత వాహనాలను రోడ్ల పక్కన, అండర్‌పాస్‌ల కింద లేదా గల్లీల్లో వదిలేయడం వల్ల అనేక ఇబ్బందులు ఎదురవుతున్నాయి.

నిరుపయోగంగా ఉన్న ఈ వాహనాలు పార్కింగ్ స్థలాన్ని ఆక్రమించడంతో పాటు.. ట్రాఫిక్ జామ్‌లకు కారణమవుతున్నాయి. ఈ వాహనాల చుట్టూ దుమ్ము, ధూళి, చెత్త పేరుకుపోయి.. పరిసరాలు అపరిశుభ్రంగా మారి.. దోమలకు, క్రిములకు ఆలయంగా మారుతున్నాయి. ఈ సమస్యలన్నింటినీ సమగ్రంగా పరిష్కరించే ఉద్దేశంతో.. జీహెచ్‌ఎంసీ కమిషనర్ ఆర్.వి. కర్ణన్ ఈ తొలగింపు కార్యక్రమాన్ని పర్యవేక్షిస్తున్నారు.

 పాత బండ్లను తొలగించే డ్రైవ్‌ను ప్రారంభించడానికి ముందుగా.. గ్రేటర్ పరిధిలో ఎన్ని పనికిరాని వాహనాలు ఉన్నాయో తెలుసుకోవడానికి సర్వే నిర్వహించాలని బల్దియా నిర్ణయించింది. ఈ డ్రైవ్‌లో పోలీస్ శాఖ సహకారాన్ని కూడా తీసుకోనున్నారు. ట్రాఫిక్ పోలీసులు, స్థానిక పోలీసులు సహాయంతో.. వాహనాల యజమానులను గుర్తిస్తారు. వీటితో పాటు.. నోటీసులు జారీ చేయడం, ఆ తర్వాత వివాదాలకు తావులేకుండా వాహనాలను తరలించడం వంటి చర్యలు చేపట్టనున్నారు.

ద్వి చక్ర వాహనాల దగ్గర నుంచి .. హెవీ వెహికల్స్‌ వరకు.. ఏ ఒక్క వాహనం కూడా రోడ్డు పక్కన నిరుపయోగంగా కనపడితే.. వాటిని తొలగించాలని అధికారులు నిర్ణయించారు. పెద్ద వాహనాలను ఎత్తడానికి జీహెచ్‌ఎంసీ వద్ద సరైన సామగ్రి లేకపోవడంతో.. సర్కిల్ స్థాయి డిప్యూటీ కమిషనర్‌లు ట్రాఫిక్ పోలీసుల సహాయాన్ని కోరారు. సేకరించిన వాహనాలను దుండిగల్‌లోని యార్డ్‌తో పాటు మరికొన్ని శివారు ప్రాంతాలకు తరలించి.. కొన్నాళ్లకు వాటిని తుక్కుగా మారుస్తారు.

యజమానులకు విజ్ఞప్తి..

20 ఏళ్లు లేదా అంతకంటే ఎక్కువ కాలం నిరుపయోగంగా ఉన్న వాహనాల యజమానులు తమంతట తామే వాటిని స్క్రాప్ చేసుకోవాలని జీహెచ్‌ఎంసీ అధికారులు విజ్ఞప్తి చేస్తున్నారు. యజమానులు స్వచ్ఛందంగా స్క్రాప్ చేయడం వల్ల ఎంతో కొంత నగదు (Cash) పొందే అవకాశం ఉంటుంది. అలా కాకుండా రోడ్లపై వదిలేస్తే.. జీహెచ్‌ఎంసీ డ్రైవ్‌లో వాటిని తొలగిస్తుంది. దీనివల్ల యజమానులు ఆర్థికంగా నష్టపోతారు. ఈ ప్రత్యేక కార్యాచరణ ద్వారా హైదరాబాద్ నగర రోడ్లను ట్రాఫిక్ రహితంగా.. పరిశుభ్రంగా ఉంచాలని జీహెచ్‌ఎంసీ లక్ష్యంగా పెట్టుకుంది.