ఈ ఒక్క పని చేయండి: ఈటల రాజేందర్

హైదరాబాద్ నగరంలో శాంతి భద్రతలు నెలకొని ప్రశాంతంగా ఉండాలంటే ఒకే ఒక పని.. బీజేపీ ఎమ్మెల్సీ అభ్యర్థిని గెలిపించాలని మల్కాజ్‌గిరి ఎంపీ ఈటల రాజేందర్ పిలుపునిచ్చారు. సోమవారం (ఏప్రిల్ 21న) నాంపల్లిలోని బీజేపీ రాష్ట్ర కార్యాలయంలో మీడియాతో మాట్లాడిన ఈటల.. నరేంద్ర మోదీ ప్రధానమంత్రి కాకముందు హైదరాబాద్‌తో సహా దేశంలోని పలు ప్రాంతాల్లో ఉగ్రవాదులు బాంబు దాడులకు పాల్పడ్డారని.. కానీ మోదీ పాలనలో దేశంవైపు కన్నెత్తి చూసేందుకు కూడా ఉగ్రవాదులు భయపడుతున్నారని చెప్పుకొచ్చారు.

ప్రధానమంత్రి నరేంద్ర మోదీ నాయకత్వంలో నగరాలు శరవేగంగా అభివృద్ధి చెందుతున్నాయని.. భారతదేశం ఇతర దేశాలతో బలమైన సంబంధాలను కొనసాగిస్తోందని ఈటల రాజేందర్ పేర్కొన్నారు. స్మార్ట్ సిటీలు, అమృత్ నగరాల పేరిట దేశంలోని అన్ని రాష్ట్రాలకు కేంద్ర ప్రభుత్వం నిధులు అందిస్తోందని ఆయన తెలిపారు. హైదరాబాద్‌లో ఫ్లైఓవర్లు, ఎలివేటెడ్ కారిడార్ల నిర్మాణానికి కేంద్రం నిధులు సమకూరుస్తోందని.. చర్లపల్లి, సికింద్రాబాద్, కాచిగూడ, నాంపల్లి రైల్వే స్టేషన్ల అభివృద్ధి కూడా కేంద్ర సహకారంతోనే వేగంగా జరుగుతోందని ఈటల వివరించారు. కొంపల్లి, అంబర్‌పేట్, ఎల్బీనగర్ ఫ్లైఓవర్ల నిర్మాణానికి కేంద్రం వేల కోట్ల రూపాయలు ఇస్తోందని ఈటల పేర్కొన్నారు.

హైదరాబాద్ ఎమ్మెల్సీ ఎన్నికల్లో ఎంఐఎం పార్టీకి ఓటు వేస్తే.. అది మన చేతులతో మన కంట్లో పొడుచుకున్నట్లేనని ఈటల రాజేందర్ తీవ్రంగా విమర్శించారు. ఓటు వేసే ముందు ఓటర్లు ఒకటికి రెండుసార్లు ఆలోచించాలని ఆయన సూచించారు. ఎంఐఎం పార్టీకి ఓటు వేయడం వల్ల హైదరాబాద్‌లో శాంతి భద్రతలు క్షీణిస్తాయని, అభివృద్ధి కుంటుపడుతుందని ఈటల ఆరోపించారు.

ఏప్రిల్ 23న హైదరాబాద్ స్థానిక సంస్థల నియోజకవర్గ ఎమ్మెల్సీ ఎన్నికకు పోలింగ్ జరగనుండగా.. ఏప్రిల్ 25న కౌంటింగ్ జరుగనుంది. ఈ ఎన్నికల్లో 112 మంది ఓటర్లు తమ ఓటు హక్కును వినియోగించుకోనున్నారు. వీరిలో 81 మంది కార్పొరేటర్లు, 31 మంది ఎక్స్ అఫీషియో సభ్యులు ఉన్నారు. ఈ ఎన్నికల్లో ఎంఐఎం పార్టీకి అత్యధిక ఓట్లు ఉండగా, బీజేపీ రెండో స్థానంలో ఉంది. ఈ ఎన్నికలు హైదరాబాద్ రాజకీయాల్లో కీలక పరిణామాలకు దారితీసే అవకాశం ఉంది.