ఆస్పత్రి ఆవరణలో ఆడుకుంటున్న పిల్లాడు మాయం

ఆస్పత్రి ఆవరణలో ఆడుకుంటున్న మూడేళ్ల పిల్లాడు ఉన్నట్టుండి మాయమైపోయాడు. అప్పటివరకూ అక్కడే ఆడుకుంటున్న పిల్లాడు.. కనిపించకపోయేసరికి తల్లిదండ్రులు అంతా వెతికారు. ఆస్పత్రి ఆవరణలోనే కాదు లోపల కూడా మొత్తం జల్లెడ పట్టారు. బయటకు ఏమైనా వెళ్లి ఉంటాడా అని.. పరిసరాల్లో కూడా వెతికారు. ఎక్కడా కనిపించకపోయేసరికి.. పోలీసులను ఆశ్రయించారు తల్లిదండ్రులు. కేసు నమోదు చేసుకున్న పోలీసులు.. సీసీ కెమెరా దృశ్యాలు పరిశీలించటంతో.. షాకింగ్ విషయం వెలుగు చూసింది. ఫోన్ మాట్లాడుకుంటూ వచ్చిన ఓ దుండగుండు.. ఆడుకుంటున్న చిన్నారిని ఎత్తుకెళ్లిపోయిన దృశ్యాలు సీసీ కెమెరాల్లో రికార్డయ్యాయి. ఆలస్యంగా వెలుగుచూసిన ఈ ఘటన.. నల్గొండ జిల్లా కేంద్రంలోని ప్రభుత్వ ఆస్పత్రిలో చోటుచేసుకుంది.

నల్గొండకు చెందిన అహ్మద్, షమీ మున్నిసా బేగం దంపతులు కొన్నేళ్లుగా ప్రభుత్వ ఆస్పత్రి ఆవరణలో ఉంటున్నారు. వీరికి మూడేళ్ల అబూ అనే అబ్బాయి ఉన్నాడు. చిన్నచిన్న కూలీ పనులు చేస్తూ.. ప్రభుత్వం అందించే రూ.5 భోజనంతో పూట గడుపుకునేంత పేదరికంలో బతుకుతున్నారు అహ్మద్ దంపతులు. అయితే.. తల్లిదండ్రులు ఏదైనా కూలీ పనికి వెళ్తే.. తమ కొడుకు అక్కడే ఆడుకుంటూ ఉంటాడు.

ఇదే క్రమంలో.. మార్చి 4వ తారీఖున కూడా ఆస్పత్రి ఆవరణలో కొత్తగా వాటర్ ట్యాంక్ నిర్మాణ పనుల్లో అహ్మద్ దంపతులు పాల్గొనగా.. పిల్లాడు అక్కడే ఆడుకుంటున్నాడు. తమ కళ్ల ముందే ఆడుకుంటున్నాడన్న దీమాతో తల్లిదండ్రులు కూడా పనులు చేసుకుంటున్నారు. అయితే. కాసేపటి తర్వాత చూస్తే.. అబూ కనిపించలేదు. ఎటువెళ్లాడోనని టెన్షన్ పడిన తల్లిదండ్రులు.. పిల్లాడి కోసం ఆస్పత్రి ఆవరణ అంతా వెతికారు.. ఆస్పత్రి లోపలికి కూడా వెళ్లి చూశారు.

పిల్లాడు ఎక్కడా కనిపించికపోయేసరికి.. తల్లిదండ్రులు వెంటనే పోలీసులను ఆశ్రయించారు. మిస్సింగ్ కేసు నమోదు చేసుకున్న పోలీసులు.. దర్యాప్తు చేపట్టారు. ఇందులో భాగంగానే.. ఆస్పత్రి ఆవరణలోని సీసీ ఫుటేజీని పోలీసులు పరిశీలించారు. ఈ ఫుటేజీలో నాలుగో తేదీ మధ్యాహ్నం సమయంలో ఓ వ్యక్తి.. ఫోన్ మాట్లాడుకుంటూ వచ్చి.. అక్కడే ఆడుకుంటున్న అబూను ఎత్తుకెళ్లాడు. అందుకు సంబంధించిన దృశ్యాలు స్పష్టంగా సీసీ కమెరాల్లో రికార్డయ్యాయి. ఈ సీసీ ఫుటేజీ ఆధారంగా.. దుండగుడుని పట్టుకునేందుకు పోలీసులు ప్రయత్నిస్తున్నారు. వీలైనంత త్వరలో దుండగున్ని పట్టుకుని.. చిన్నారిని క్షేమంగా తీసుకువస్తామని పోలీసులు చెప్తున్నారు.