మార్కెట్‌లో నాణ్యత లేని కల్తీ ప్యాకెట్ పాలు

ఇటీవల కాలంలో కల్తీరాయుళ్లు రెచ్చిపోతున్నారు. కాదేదీ కల్తీకి అనర్హం అన్నట్లు చిన్న పిల్లలు తినే చాకెట్లు, బిస్కెట్లు పాల నుంచి వంటింటి సరుకుల వరకు ప్రతి ఒక్కటి కల్తీ చేస్తున్నారు. కాసుల కోసం కక్కుర్తిపడి ప్రజల ప్రాణాలతో చెలగాటం ఆడుతున్నారు. తాజాగా.. ప్యాకెట్ పాలను కల్తీ చేస్తున్నట్లు అధికారులు గుర్తించారు. వరంగల్‌ నగరంలో విక్రయిస్తున్న వివిధ రకాల బ్రాండెడ్ కంపెనీలకు చెందిన ప్యాకెట్‌ పాలల్లో కల్తీ ఉన్నట్లు తేలింది. వినియోగదారుల మండలి రాష్ట్ర కమిటీ ఆధ్వర్యంలో బుధవారం (మార్చి 5) ఫుడ్ సెఫ్టీ అధికారిణి మౌనిక వరంగల్‌ నగర పరిధిలో విక్రయిస్తున్న 19 ప్రైవేటు కంపెనీలకు చెందిన పాల ప్యాకెట్‌ శాంపిల్స్ సేకరించారు.

పాల ప్యాకెట్లపై ప్రింట్ చేసిన వివరాల ఆధారంగా నాణ్యత తెలుసుకునేందుకు హనుమకొండలోని ప్రభుత్వ విజయ డెయిరీ ల్యాబ్‌లో టెస్టులు నిర్వహించారు. అయితే ఈ పరీక్షల్లో విస్తుపోయే నిజాలు వెలుగులోకి వచ్చాయి. కొన్ని కంపెనీలకు చెందిన పాలల్లో అధిక మోతాదులో హైడ్రోజన్‌ పెరాక్సైడ్‌ను కలిపినట్లు అధికారులు గుర్తించారు. పాలు ఎక్కువ రోజులు నిలువ ఉండేందుకు అందులో కాస్టిక్‌ సోడా కలిపినట్లు తేలింది. ప్రభుత్వ ఆధ్వర్యంలో నడిచే సంస్థ విజయ డెయిరీ పాల ప్యాకెట్లను పోలిన నకిలీ కంపెనీలకు చెందిన పాలు విక్రయిస్తున్టన్లు గుర్తించారు. ఆ పాలలో నాణ్యతా లోపంతో పాటు కల్తీ జరిగినట్లు అధికారులు, వినియోగదారుల మండలి ప్రతినిధులు వెల్లడించారు.

మరికొన్ని కంపెనీలకు చెందిన ప్యాకెట్‌ పాలల్లో వెన్నశాతం కవర్‌పై ప్రింట్ చేసిన దానికన్నా చాలా తక్కువగా ఉందని చెప్పారు. అనంతరం వరంగల్‌ నగరంలోని పలు ప్రాంతాల్లో ప్యాకెట్‌ పాల కల్తీ, నాణ్యత దాని నాణ్యత గురించి వినియోదదారులకు అవగాహన కల్పించారు. కల్తీ పాల ప్యాకెట్ల పట్ల అప్రమత్తంగా ఉండాలని సూచించారు. వాటిని తాగటం వల్ల అనారోగ్యం బారిన పడే ఛాన్స్ ఉందని.. ప్రజలు జాగ్రత్తగా ఉండాలని చెప్పారు. బ్రాండెడ్ కంపెనీలకు చెందిన పాలను ఒరిజినల్ అని ధృవీకరించుకున్న తర్వాతే కొనుగోలు చేయాలని ప్రజలకు సూచిస్తున్నారు.