మంత్రి కొండా సురేఖ పెంపుడు కుక్క‌ మృతి.. క‌న్నీరుమున్నీరైన కొండా సురేఖ

తెలంగాణ మంత్రి కొండా సురేఖ తీవ్ర విషాదంలో మునిగారు. భావోద్వేగానికి లోనయి కన్నీటి పర్యంతమయ్యారు.తట్టుకోలేక ఏడ్చేశారు. తాను ఆత్మీయంగా చూసుకుంటున్న పెంపుడు కుక్క ఆకస్మిక మరణంతో ఆమె తట్టుకోలేకపోయారు. ఇన్నాళ్లు తన వెంట తిరుగుతూ సందడి చేస్తూ కలియతిరిగిన ఆ కుక్క లేకపోవడంతో సురేఖ ఆవేదనకు లోనయ్యారు. తనను వదిలి వెళ్లిపోయిన కుక్కకు పుష్పాంజలి ఘటించి నివాళులర్పించారు. అనంతరం ప్రత్యేకంగా అంత్యక్రియలు చేయించారు. 2021లో కూడా కొండా సురేఖకు చెందిన ఓ పెంపుడు కుక్క మృతి చెందితే ఆ సమయంలోనూ తీవ్ర భావోద్వేగానికి లోనయ్యారు.మంత్రి కొండా సురేఖ హ్యాపీ అనే పేరు మీద ఓ పెంపుడు కుక్కను పోషించుకుంటున్నారు. ఎప్పుడూ ఇంట్లో సందడి చేస్తుంటుంది. హ్యాపీతో కొండా సురేఖకు ఆత్మీయ అనుబంధం ఉంది. ఎంతో అల్లారు ముద్దుగా ఆమె చూసుకుంటున్నారు. తన కుటుంబంలో ఓ మనిషిగా పెరిగి.. ఎంతో విశ్వాసం చూపిస్తున్న హ్యాపీ గురువారం ఆకస్మిక మరణం పొందింది. గుండెపోటుతో చనిపోయిందని మంత్రి అనుచరులు తెలిపారు. ఈ వార్త తెలుసుకున్న సురేఖ దిగ్భ్రాంతికి లోనయ్యారు. కుక్క మరణంతో ఆమె కన్నీరుమున్నీరయ్యారు.తమతో ఇన్నాళ్లు సంతోషంగా ఉన్న హ్యాపీ ఇకలేదని తెలిసి కొండా సురేఖ తీవ్ర భావోద్వేగానికి లోనయ్యారు. కుక్క కళేబరానికి పుష్పాంజలి ఘటించి నమస్కారం చేశారు. అనంతరం అంతిమ సంస్కారాలు నిర్వహించారు. కొండా సురేఖతోపాటు ఆమె కుటుంబసభ్యులు, ఆమె సిబ్బంది కూడా హ్యాపీ మరణంతో కలత చెందారు. వారు కూడా కుక్కకు నివాళులర్పించారు. హ్యాపీ మరణంతో కొండా సురేఖ కుటుంబంలో తీరని లోటుగా మారింది. విదేశాల్లో ఉంటున్న సురేఖ కుమార్తె కూడా హ్యాపీ మృతితో ఆవేదన చెందారని సమాచారం.