by Suryaa Desk | Sun, Mar 15, 2026, 07:45 PM

ఇజ్రాయెల్ ప్రధాని నెతన్యాహు ఆచూకీపై అనుమానాలు వ్యక్తం అవుతున్న తరుణంలోనే.. ఇప్పుడు ఇరాన్ కొత్త సుప్రీం నేత మొజ్తాబా ఖమేనీ ఆరోగ్యంపై కూడా అనేక పుకార్లు పుట్టుకొస్తున్నాయి. ఇప్పటి వరకు ఖమేనీ చనిపోయిన దాడిలోనే మొజ్తబా కూడా గాయపడినట్లు పెద్ద ఎత్తున వార్తలు రాగా.. తాజాగా అగ్రరాజ్యం అమెరికా అధ్యక్షుడు డొనాల్డ్ ట్రంప్ స్పందించారు. మొన్నే ఆయన ఏదో ఒక రూపంలో బతికే ఉండొచ్చని చెప్పిన ట్రంప్.. ప్రస్తుతం తాను మొజ్తబా చనిపోయినట్లు విన్నానని చెప్పుకొచ్చారు. ప్రస్తుతం ఈ కామెంట్లు నెట్టింట తెగ వైరల్ అవుతున్నాయి.

ఒక అంతర్జాతీయ వార్తా సంస్థకు ఇచ్చిన ఇంటర్వ్యూలో ట్రంప్ ఈ వివాదాస్పద వ్యాఖ్యలు చేశారు. "మొజ్తాబా ఖమేనీ బతికే ఉన్నారా? లేదా? అనే విషయంపై నాకు స్పష్టత లేదు. కానీ.. ఆయన ప్రాణాలతో లేరని నేను విన్నాను. సుప్రీం నేతగా బాధ్యతలు చేపట్టినప్పటి నుంచి ఆయన ఒక్కసారి కూడా బహిరంగంగా కనిపించకపోవడం అనేక అనుమానాలకు తావిస్తోంది" అని ట్రంప్ పేర్కొన్నారు. ఒకవేళ ఆయన బతికే ఉంటే.. యుద్ధం వల్ల తన దేశం నాశనం కాకుండా లొంగిపోవడం లేదా చర్చలు జరపడం వంటి ఏదైనా తెలివైన నిర్ణయం తీసుకునేవారని ట్రంప్ ఎద్దేవా చేశారు.

గాయాలయ్యాయా? లేక అంతమయ్యారా?

ఫిబ్రవరి 28వ తేదీన అమెరికా, ఇజ్రాయెల్ సంయుక్తంగా చేసిన దాడుల్లో అప్పటి సుప్రీం నేత అయతొల్లా అలీ ఖమేనీ హతమవ్వగా.. ఆయన వారసుడిగా, ఖమేనీ కుమారుడు మొజ్తాబా బాధ్యతలు చేపట్టారు. అయితే ఆ దాడుల్లోనే మొజ్తాబా కూడా తీవ్రంగా గాయపడ్డారని కొన్ని మీడియా సంస్థలు కథనాలు ప్రచురించాయి. ఆయన కాళ్లు, చేతులకు తీవ్ర గాయాలు అయ్యాయని చెప్పుకొచ్చాయి. ముఖ్యంగా పదవి చేపట్టిన నాటి నుండి మొజ్తాబా కేవలం లిఖితపూర్వక, ఆడియో పూర్వక ప్రకటనలు, టెలివిజన్ ప్రజెంటర్ల ద్వారా మాత్రమే సందేశాలు పంపారు. ఆయన నేరుగా కెమెరా ముందుకు రాకపోవడం నెటిజెన్లలో కూడా చర్చకు దారితీసింది. అయితే ఈ పుకార్లను ఇరాన్ అధికారులు కొందరు ఖండిస్తున్నప్పటికీ.. అందుకు తగ్గ ఆధారాలను మాత్రం విడుదల చేయడం లేదు.

యుద్ధ సమయంలో దేశాధినేతల ఆచూకీపై ఇలాంటి ఊహాగానాలు రావడం సహజం. ఒకవైపు నెతన్యాహు ఆరు వేళ్ల వీడియో వివాదం, మరోవైపు మొజ్తాబా మరణం వార్తలు.. వెరసి పశ్చిమాసియాలో సమాచార యుద్ధం కూడా తీవ్ర స్థాయిలో సాగుతోందని అర్థమవుతోంది. ఇరాన్ దీనిపై అధికారికంగా స్పందించి, మొజ్తాబా వీడియోను విడుదల చేస్తే తప్ప ఈ మిస్టరీ వీడేలా కనిపించడం లేదు.