|
|
by Suryaa Desk | Mon, Dec 15, 2025, 09:16 PM
ఉక్రెయిన్ అధ్యక్షుడు వొలొదిమిర్ జెలెన్స్కీ రష్యా యుద్ధాన్ని ముగించేందుకు సిద్ధమని ప్రకటిస్తూ.. కీలక ప్రతిపాదనను తెరపైకి తెచ్చారు. రష్యా నుంచి భవిష్యత్తులో దాడులు జరగకుండా పశ్చిమ దేశాల నుంచి భద్రతా హామీలు లభిస్తే.. తమ దేశం నాటో కూటమిలో చేరాలనే ప్రయత్నాన్ని విరమించుకోవడానికి సిద్ధమని ఆయన ఆదివారం బెర్లిన్లో ప్రకటించారు. ముఖ్యంగా రష్యా-ఉక్రెయిన్ యుద్ధాన్ని ఆపేందుకు అమెరికా అధ్యక్షుడు ట్రంప్ 28 పాయింట్ల ప్రణాళికను తీసుకొచ్చిన విషయం అందరికీ తెలిసిందే. అయితే దీన్ని జెలెన్స్కీ వ్యతిరేకించగా.. ఇరు దేశాల మధ్య గత కొన్ని వారాలుగా చర్చలు జరుగుతూనే ఉన్నాయి.
ఈ చర్చల్లో భాగంగానే ఆదివారం రోజు అమెరికా అధ్యక్షుడు డొనాల్డ్ ట్రంప్ ప్రత్యేక రాయబారి స్టీవ్ విట్కాఫ్, ట్రంప్ అల్లుడు జారెడ్ కుష్నర్లతో జెలెన్స్కీ చర్చలు జరిపారు. ఈ సమావేశంలో జర్మన్ ఛాన్సలర్ ఫ్రీడ్రిక్ మెర్జ్ కూడా పక్కనే కూర్చొని ఉన్న చిత్రాన్ని జెలెన్స్కీ పోస్ట్ చేశారు. నాటోలో చేరాలనే ఉక్రెయిన్ ప్రయత్నాలను అమెరికాతో పాటు కొన్ని ఐరోపా దేశాలు తిరస్కరించిన నేపథ్యంలో.. నాటో సభ్య దేశాలకు ఉన్న తరహాలోనే భద్రతా హామీలను పశ్చిమ దేశాలు తమకు అందించాలని జెలెన్స్కీ కోరారు. "ఈ భద్రతా హామీలు రష్యా నుంచి మరో దాడిని నిరోధించేందుకు ఒక అవకాశం. ఇది మా వైపు నుంచి చేస్తున్న రాజీ" అని జెలెన్స్కీ విలేకరుల సమావేశంలో స్పష్టం చేశారు.
డొనెట్స్క్ ప్రాంతాన్ని అప్పగించే ఛాన్సే లేదు
అయితే రష్యాకు తమ భూభాగాన్ని అప్పగించాలనే అమెరికా ప్రతిపాదనను జెలెన్స్కీ పూర్తిగా తిరస్కరించారు. తూర్పు ప్రాంతంలోని డొనెట్స్క్ నుంచి ఉక్రెయిన్ బలగాలను ఉపసంహరించుకుని.. అక్కడ సైన్యం లేని స్వేచ్ఛా ఆర్థిక మండలిని ఏర్పాటు చేయాలనే అమెరికా ఆలోచన ఆచరణ సాధ్యం కాదని ఆయన కొట్టిపారేశారు. "ఈ ఆర్థిక మండలిని ఎవరు నిర్వహిస్తారు? అని ప్రశ్నించిన ఆయన.. తాత్కాలికంగా సరిహద్దు వెంబడి బఫర్ జోన్ ఏర్పాటు చేస్తే ఉక్రెయిన్ దళాలు 5 నుంచి 10 కిలో మీటర్లు వెనక్కి తగ్గితే, రష్యా దళాలు కూడా అదే దూరం వెనక్కి ఎందుకు తగ్గకూడదు?" అని జెలెన్స్కీ ప్రశ్నించారు.
ఈ విషయమై స్పందించిన రష్యా విదేశీ వ్యవహారాల సలహాదారు యూరి ఉషాకోవ్.. ఆ ప్రాంతం డీమిలిటరైజ్డ్ జోన్గా మారినా కూడా డొనెట్స్క్లోని కొన్ని ప్రాంతాల్లో రష్యా పోలీసు, నేషనల్ గార్డ్ దళాలు ఉంటాయని తెలిపారు. రాజీ కుదరడానికి చాలా సమయం పట్టవచ్చని ఆయన హెచ్చరించారు.
