by Suryaa Desk | Sun, Dec 07, 2025, 10:53 PM

కెనడా ప్రధానిగా దిగిపోయిన తర్వాత కూడా జస్టిన్‌ ట్రూడో వార్తల్లో నిలుస్తున్నారు. అమెరికన్‌ పాప్‌స్టార్‌ కేటీ పెర్రీతో ఆయన ప్రేమలో పడిపోయినట్లు వార్తలు వస్తున్నాయి. ఇక వీరిద్దరూ డేటింగ్‌లో ఉన్నట్లు మీడియా, సోషల్ మీడియా అంతా కోడై కూసింది. ఈ నేపథ్యంలో జస్టిన్ ట్రూడో ప్రేమాయణంపై ఓ క్లారిటీ వచ్చింది. తాజాగా కేటీ పెర్రీ తన ఇన్‌స్టాగ్రామ్ పోస్టులో ట్రూడోతో కలిసి ఉన్న ఫోటోలను పోస్ట్ చేశారు. తామిద్దరం ప్రేమించుకుంటున్నట్లు అధికారికంగా ప్రకటించారు. ఇప్పటికే తన మొదటి భార్యతో 2023లో విడాకులు తీసుకున్న జస్టిన్ ట్రూడో.. ఇప్పుడు రెండో ఇన్నింగ్స్ మొదలు పెట్టనున్నారని నెటిజన్లు కామెంట్లు పెడుతున్నారు.

కాగా, ఇటీవల జస్టిన్ ట్రూడో, కేటీ పెర్రీ జపాన్‌ పర్యటనకు వెళ్లారు. ఈ సందర్భంగా ఆ దేశ మాజీ ప్రధాని ప్యుమియో కిషిదాతో సమావేశమై ఆయన ఇచ్చిన విందులో పాల్గొన్నారు. దీన్ని కిషిదా తన ఎక్స్‌ అకౌంట్‌ వేదికగా తెలియజేశారు. ట్రూడో తన భాగస్వామి పెర్రీతో కలిసి జపాన్‌ను సందర్శించారని.. తమతో కలిసి భోజనం చేశారని కిషిదా రాసుకొచ్చారు. దీన్ని జస్టిన్ ట్రూడో కూడా రీపోస్టు చేశారు. దీంతో జస్టిన్ ట్రూడో ప్రేమాయణంపై గాసిప్‌లు గుప్పుమన్నాయి. ఈ క్రమంలో ఉత్కంఠకు తెరదించుతూ కేటీ పెర్రి తమ రిలేషన్ గురించి ప్రకటించారు. జపాన్‌లో ట్రూడోతో దిగిన ఫొటోను పోస్ట్ చేసి.. ‘‘టోక్యో టైమ్స్ ఆన్ టూర్ అండ్ మోర్’’ అంటూ దీనికి క్యాప్షన్ ఇచ్చారు.

దాదాపు పదేళ్లపాటు జస్టిన్ ట్రూడో కెనడా ప్రధానిగా ఉన్నారు. ఈ ఏడాది ప్రారంభంలో తన పదవికి రాజీనామా చేశారు. ఈ క్రమంలోనే జులైలో ట్రూడో-పెర్రీలు మాంట్రియాల్‌లోని ఓ రెస్టరంట్‌లో మొదటిసారి కనిపించారు. వీరి మీటింగ్‌కు సంబంధించిన ఫొటోలు అప్పట్లో వైరల్ అయ్యాయి. దీంతో వీరిద్దరూ డేటింగ్‌లో ఉన్నారనే ప్రచారం మొదలైంది. అనంతరం ఓ విలాసవంతమైన నౌకలో వీరు అత్యంత సన్నిహితంగా ఉన్న ఫొటోలు బయటకు వచ్చాయి. ఆ తర్వాత అక్టోబర్ 25 కేటీ పెర్రీ పుట్టినరోజు సందర్భంగా వీరు పారిస్‌లో జరిగిన ఓ కాన్సెర్ట్‌కు కలిసి హాజరయ్యారు. వీరిద్దరూ చేతిలో చెయ్యి వేసుకొని ఉన్న వీడియోలు నెట్టింట వైరల్ అయ్యాయి.

2005 మేలో జస్టిన్‌ ట్రుడో, సోఫీ గ్రెగోయ్‌రీకి వివాహం అయింది. 18 ఏళ్ల వివాహ బంధానికి వీడ్కోలు పలుకుతూ.. స్టిన్‌ ట్రూడో 2023లో తన భార్య సోఫీ గ్రెగోయ్‌రీతో విడాకులు తీసుకున్నారు. అయితే ముగ్గురు పిల్లల సంరక్షణను తామిద్దరం కలిసే చూసుంటామని ట్రూడో, గ్రెగోయ్‌రీ తెలిపారు.