by Suryaa Desk | Sun, Dec 07, 2025, 10:39 PM

సికింద్రాబాద్ పరిధిలో జరిగిన హృదయ విదారక ఘటన తెలంగాణలోని ఎందరో నిరుద్యోగుల గుండెల్లోని అంతులేని వేదనకు అద్దం పడుతోంది. ఉన్న ఉద్యోగాన్ని వదిలి.. మెరుగైన భవిష్యత్తు కోసం ప్రయత్నించి, ఎన్ని దారులు వెతికినా ఉద్యోగం దొరకకపోవడంతో కుంగిపోయిన ఓ యువకుడు.. తన మిత్రులు చూస్తుండగానే రైలుకు ఎదురెళ్లి ఆత్మహత్య చేసుకున్నాడు. ఆ నిరుద్యోగి కష్టం, లోపల దాచుకున్న బాధ ఎంతటిదో ఈ ఘటనే చెబుతోంది.

ఆశలు వదులుకున్న యువకుడు..

సైనిక్‌పురి శివనగర్ కాలనీకి చెందిన రవిశంకర్ (30) ఒక ప్రైవేట్ కంపెనీలో ఉద్యోగం చేసేవాడు. ఇంకా మంచి అవకాశాల కోసం ఆశపడి.. చేస్తున్న ఉద్యోగానికి రాజీనామా చేశాడు. కానీ.. ఆ తర్వాతే అసలు సమస్య మొదలైంది. ఎన్నెన్నో ప్రయత్నాలు చేసినా.. ఎన్ని చోట్ల తిరిగి వచ్చినా అతనికి మరో ఉద్యోగం దొరకలేదు.

'ఉన్న ఉద్యోగాన్ని వదులుకుని తప్పు చేశాను', 'ఇక నాకు దారి లేదు' అని రవిశంకర్ తీవ్ర మనస్తాపానికి గురయ్యాడు. ప్రతిరోజు తల్లిదండ్రుల వైపు.. భవిష్యత్తు వైపు చూసినప్పుడల్లా అతని గుండె బరువెక్కిపోయేది. నిరుద్యోగికి తన కష్టం కంటే.. చుట్టూ ఉన్న వారి చూపులు, ప్రశ్నలు ఇంకా ఎక్కువ బాధను కలిగిస్తాయి. రవిశంకర్ విషయంలోనూ అదే జరిగింది.

శుక్రవారం రాత్రి 9 గంటలకు అతను నేరేడ్‌మెట్‌లోని తన స్నేహితుడు శ్రీధర్ ఇంటికి వెళ్లి.. తన ఆవేదనను వెళ్లగక్కాడు. అనంతరం మరో మిత్రుడు సాయిప్రశాంత్ ఇంటికి వెళ్లి.. శైలేష్, జగన్ అనే మరో ఇద్దరు స్నేహితులతో కలిసి అర్ధరాత్రి 12.30 గంటల వరకు మాట్లాడుకున్నాడు. రవిశంకర్ బాధను అర్థం చేసుకున్న మిత్రులు అతడిని ఓదార్చారు.

మిత్రుల కళ్లెదుటే తీరని విషాదం

అర్ధరాత్రి ఒంటిగంట దాటిన తర్వాత.. రవిశంకర్‌ను ఇంట్లో దిగబెట్టేందుకు మిత్రులు ద్విచక్ర వాహనాలపై బయలుదేరారు. మార్గం మధ్యలో వాజపేయినగర్ రైల్వే లెవల్ క్రాసింగ్ వద్ద గేటు పడింది. ద్విచక్ర వాహనాలను ఆపి మిత్రులు రైలు కోసం ఎదురు చూస్తున్నారు. అదే సమయంలో.. బైక్‌పై వెనుక కూర్చున్న రవిశంకర్ ఒక్కసారిగా దిగిపోయాడు. మిత్రులు ఏం జరుగుతుందో అర్థం చేసుకునేలోపే.. రైలు పట్టాలపైకి చేరుకున్నాడు. క్షణాల్లో వేగంగా వచ్చిన రైలు అతడిని ఢీ కొట్టింది. ఈ ప్రమాదంలో అతడికి రెండు కాళ్లు విరిగిపోయాయి. తీవ్రంగా గాయపడిన అతడిని మిత్రులు అంబులెన్స్ రప్పించి గాంధీ ఆసుపత్రికి తరలిస్తుండగా మార్గమధ్యలోనే మృతి చెందాడు.

ఉద్యోగం లేదనే తీవ్ర నిరాశ, ఒత్తిడి అతడిని ఎంతటి దారుణ నిర్ణయం తీసుకునేలా చేసిందో ఈ ఘటన చెబుతోంది. ఉద్యోగం దొరకకపోవడంతోనే తన కొడుకు ఆత్మహత్యకు పాల్పడినట్లు రవిశంకర్ కుటుంబ సభ్యులు పోలీసులకు తెలిపారు. ప్రస్తుతం పోలీసులు కేసు నమోదు చేసుకొని దర్యాప్తు చేస్తున్నారు.