by Suryaa Desk | Wed, Dec 03, 2025, 11:54 PM

చలికాలంలో రోజు రోజుకి ఉష్ణోగ్రతలు పడిపోతున్నాయి. పెరిగిన చలి కారణంగా ప్రజలు అనేక వ్యాధుల బారిన పడతున్నారు. ముఖ్యంగా జలుబు, దగ్గు, కఫం, గొంతు నొప్పి వంటి సీజనల్ వ్యాధులు పెరుగుతున్నాయి. చలికాలంలో ఇమ్యూనిటీ పవర్ తక్కువగా ఉండటమే ఇందుకు కారణం.

ఇక, ఇమ్యూనిటీ పవర్ పెంచడానికి చలికాలంలో దొరికే ఉసిరి కన్నా మంచి ఆప్షన్ ఇంకోటి లేదు. ఉసిరి ఆరోగ్య సిరి అని అనడంలో ఎటువంటి సందేహం లేదు. చలికాలంలో ఉసిరి తీసుకోవడం వల్ల రోగనిరోధక శక్తి పెరుగుతుంది. ఇందులో అనేక పోషకాలు మెండుగా ఉన్నాయి. ఉసిరిలో విటమిన్ సి, యాంటీ ఆక్సిడెంట్లు పుష్కలంగా ఉన్నాయి.

ఇక, ఉసిరిని మిఠాయి రూపంలో ప్రతి రోజూ తీసుకోవచ్చు. ఆమ్లా క్యాండీని చేసుకుని ప్రతి రోజూ ఓ చిన్న ముక్క తిన్నా చాలు. ఇమ్యూనిటీ పవర్ పెరుగుతుంది. ఆరోగ్యానికి మేలు చేసే రుచికరమైన ఆమ్లా క్యాండీని ఎలా తయారుచేసుకోవాలో ఇప్పుడు తెలుసుకుందాం.

కావాల్సిన పదార్థాలు

ఉసిరి - 450 గ్రాములు

బెల్లం - 300 గ్రాములు

ఇంగువ - 1/4 టీస్పూన్

బ్రౌన్ షుగర్ - 2 టీస్పూన్

నల్ల మిరియాల పొడి - 1 టీస్పూన్

జీరా పొడి - 1 టీస్పూన్

రాక్ సాల్ట్ - 1/2 టీస్పూన్

ఆమ్లా క్యాండీ రెసిపీ

తయారీ విధానం

స్టెప్ -1

ముందు 450 గ్రాముల ఉసిరికాయల్ని తీసుకుని.. వాటిని ఆవిరి మీద ఉడికించండి. 10 నుంచి 12 నిమిషాల పాటు ఉడికించాలి. ఆ తర్వాత ఉసిరికాయల్లో విత్తనాలు తీసి.. ముక్కలుగా కట్ చేసుకోండి. ఆ తర్వాత ఒక గాజు సీసా తీసుకుని ముందు కొన్ని ఉసిరి ముక్కలు వేసుకోండి.

ఆ తర్వాత కాస్తా బెల్లం పొడి వేసుకోండి. మళ్లీ తర్వాత ఉసిరి ముక్కలు, బెల్లం పొడి ఇలా లేయర్స్‌లా వేసుకుని బాగా కలపండి. ఈ సీసాను బాగా క్లోజ్ చేసి సూర్యరశ్మి తగిలేలా మూడు రోజులు ఉంచండి. మధ్య మధ్యలో మిశ్రమాన్ని బాగా కలుపుకోండి.

స్టెప్ -2 

మూడు రోజుల తర్వాత ఉసిరి, బెల్లం మిశ్రమం నుంచి వాటర్ వస్తుంది. ఈ వాటర్‌ని ఫిల్టర్ చేసుకోండి. ఇంకోప్లేటులో ఉసిరి ముక్కలు తీసుకుని ఎండబెట్టండి. ఇప్పుడు ఇంగువ, మిరియాల పొడి, బ్రౌన్ షుగర్, జీలకర్ర పొడి, రాక్ సాల్ట్ వేసుకుని బాగా కలుపుకోండి. ఇలా చేయడం వల్ల క్యాండీ రుచి పెరుగుతుంది. ఇంకేముంది రుచికరమైన ఆమ్లా క్యాండీ సిద్ధమైనట్టే. ఆమ్లా క్యాండీ ముక్కల్ని ఒక సీసాలోకి తీసుకుని ఫ్రిజ్‌లో స్టోర్ చేసుకోండి. రోజుకో ముక్క తింటే అనేక ఆరోగ్య ప్రయోజనాలు ఉంటాయి.

ఉసిరి మిఠాయి తినడం వల్ల ప్రయోజనాలు

​ఆమ్లా క్యాండీలో కేలరీలు, కార్బోహైడ్రేట్లు, ప్రోటీన్, విటమిన్ సి, ఇతర పోషకాలు ఉంటాయి. ఇవి ఆరోగ్యానికి ఎంతో మేలు చేస్తుంది.

ఇందులో ఉండే విటమిన్ సి రోగనిరోధక శక్తిని పెంచుతుంది. దీంతో సీజనల్ వ్యాధులైన జలుబు, దగ్గు, కఫం నుంచి రిలీఫ్ లభిస్తుంది.

జీర్ణవ్యవస్థను ఆరోగ్యంగా ఉంచుకోవడానికి రోజూ ఓ ముక్క ఆమ్లా క్యాండీ తినడం మంచిది.

ఇది కంటిచూపుకు కూడా మంచిదని నిపుణులు అంటున్నారు.

జుట్టు, చర్మ ఆరోగ్యానికి కూడా ఆమ్లా క్యాండీ మేలు చేస్తుంది.

గుర్తించుకోవాల్సిన విషయాలు

ఆమ్లా క్యాండీని గాలి చొరబడని కంటైనర్‌లో స్టోర్ చేసుకోండి. ఇలా స్టోర్ చేయడం వల్ల మూడు నెలల వరకు ఆమ్లా క్యాండీ చెడిపోదు. ఇక, ఉసిరి మిఠాయిని ఎక్కువ మోతాదులో తినకండి. రోజుకో చిన్న ఉసిరి మిఠాయి ముక్క తింటే చాలు.