by Suryaa Desk | Tue, Dec 02, 2025, 11:01 PM

చలికాలంలో రోజు రోజుకి ఉష్ణోగ్రతలు తగ్గుముఖం పట్టాయి. ఈ సీజన్‌లో చర్మం, జుట్టుకు సంబంధించిన అనేక సమస్యలు ఎదుర్కొంటారు. చాలా మందికి జుట్టు రాలడం ఒక సాధారణ సమస్యగా మారుతుంది. మిగతా సీజన్లతో పోలీస్తే.. చలికాలంలో జుట్టు రాలడం ఎక్కువగా ఉంటుంది. యువతలో కూడా జుట్టు రాలే సమస్య ఎక్కువగా ఉంటుంది. అయితే శరీరం, తలలో కొన్ని సహజ మార్పుల వల్ల జుట్టు రాలడం ఎక్కువగా ఉంటుందని న్యూట్రిషనిస్ట్ లిమా మహాజన్ చెప్పారు. లిమా మహాజన్ ఇన్‌స్టాగ్రామ్ ఖాతాలో ఈ విషయాల్ని షేర్ చేసుకున్నారు. ఇందులో చలికాలంలో జుట్టు రాలడానికి మూడు ప్రధాన కారణాలు ఏంటో చెప్పారు. అంతేకాకుండా జుట్టు రాలడం ఎలా ఆపాలో కూడా వివరించారు. ఆ పూర్తి వివరాలపై ఓ లుక్కేద్దాం.

తలకు రక్త ప్రసరణ తగ్గడం

చలికాలంలో ఉష్ణోగ్రతలు తగ్గినప్పుడు, శరీరం తనను తాను వెచ్చగా ఉంచుకోవడానికి అనేక విధానాలను అవలంబిస్తుందని న్యూట్రిషనిస్ట్ లిమా చెప్పారు. వీటిలో ఒకటి వాసోకాన్స్ట్రిక్షన్. అంటే చిన్న రక్త నాళాలు ఇరుకుగా మారడం. ఈ ప్రక్రియ చల్లని వాతావరణంలో తలపై కూడా జరుగుతుంది. దీని మూలంగా జుట్టు మూలాలకు ఆక్సిజన్, పోషకాలు చేరడం తగ్గుతుంది. దీంతో జుట్టు కుదుళ్ల బలహీనపడి.. హెయిర్ ఫాల్ ఎక్కువగా ఉంటుందని న్యూట్రిషనిస్ట్ చెప్పారు.

న్యూట్రిషనిస్ట్ ఏం చెప్పారంటే

​దీనిని ఎలా సెట్ చేయాలి?

ప్రతిరోజూ 4 నిమిషాలు తేలికగా తల మీద మసాజ్ చేయాలని న్యూట్రిషనిస్ట్ లిమా మహాజన్ అంటున్నారు. ఇది రక్త ప్రసరణను పెంచుతుంది.

ప్రతిరోజూ 30 నిమిషాల చురుకైన నడక లేదా ఏదైనా తేలికపాటి వ్యాయామం జీవనశైలిలో భాగం చేసుకోవాలి.

బయటకు వెళ్ళేటప్పుడు తలను కవర్ అయ్యేలా ఏదైనా ధరించండి. అయితే, చెమటలు ఎక్కువ పట్టేలా టైట్‌గా మాత్రం ధరించవద్దు.

అంతేకాకుండా రక్త ప్రసరణను పెంచే ఆహారాలు తినండి. వాల్‌నట్స్, బీట్‌రూట్, పాలకూర, దానిమ్మ, గుమ్మిడిగింజలు వంటివాటిని భాగం చేసుకోండి.

చుండ్రు, పొడి చర్మం సమస్యలు

చలికాలంలో గాలులు పొడిగా ఉంటాయి. తేమ వాతావరణం ఉంటుంది. దీని కారణంగా తలపై చర్మం సహజ తేమను కోల్పోతుంది. తలపై చర్మం ఎండిపోయినప్పుడు.. వేగంగా పొరలుగా మారడం ప్రారంభమవుతుంది. తలపై పొట్టు ఊడుతుంది. నూనెలు ఈ పొరలతో కలిసి తలపై చుండ్రు, ఈస్ట్ పెరగడానికి కారణమవుతాయి. ఫలితంగా దురద, చికాకుతో పాటు దువ్వేటప్పుడు జుట్టు రాలడం పెరుగుతుంది.

చుండ్రు, పొడి చర్మాన్ని ఎలా నివారించాలి?

​గోరువెచ్చని నీటితో జుట్టును శుభ్రం చేసుకోవాలి. ఆ తర్వాత కూల్ రిన్స్‌తో ఫినిష్ చేయాలి.

వేడి ఎక్కువగా ఉన్న నీటితో స్నానం చేయడం మానుకోండి.

చాలా బిగుతుగా ఉండే టోపీ లేదా మంకీ క్యాపుల్ని ఎక్కువసేపు ధరించడం మానుకోండి.

వారానికి 1-2 సార్లు యాంటీ-డాండ్రఫ్ షాంపూ వాడండి.

చుండ్రు తగ్గడం కోసం వాల్‌నట్స్, అవిసె గింజలు, పెరుగు, గుమ్మడికాయ గింజలు వంటివాటిని తినండి.

విటమిన్ డి లోపం

చలికాలంలో పగటి సమయం తక్కువగా ఉంటుంది. దీంతో, సూర్యరశ్మి తక్కువగా ఉంటుంది. దీని అర్థం శరీరానికి తగినంత సూర్యరశ్మి లభించదు. దీని వల్ల విటమిన్ డి స్థాయిలు తగ్గుతాయి. ఈ విటమిన్ జుట్టు పెరుగుదలకు సాయపడుతుంది. ఈ విటమిన్ లోపం జుట్టు మూలాల్ని బలహీనపరుస్తుంది. అంతేకాకుండా జుట్టు రాలడాన్ని పెంచుతుంది.

ఎలా నివారించాలి?

మధ్యాహ్నం 12 గంటల నుంచి 3 గంటల వరకు.. వారానికి 3-4 రోజులు కనీసం 10-20 నిమిషాలు సూర్యరశ్మిని పొందండి.

విటమిన్ డి లోపాన్ని భర్తీ చేసే ఆహారాల్ని భాగం చేసుకోండి. సాల్మన్ చేప, పుట్ట గొడుగులు, నారింజ, కాడ్ లివర్ ఆయిల్ వంటి వాటిని భాగం చేసుకోండి.

చలికాలంలో తలకు పోషణ అందించండి. దీంతో, అది పొడిబారకుండా నిరోధిస్తుంది. సరైన అలవాట్లను అలవర్చుకోవడం ద్వారా జుట్టు రాలడాన్ని నియంత్రించవచ్చని లిమా మహాజన్ అంటున్నారు.