by Suryaa Desk | Tue, Dec 02, 2025, 10:58 PM

ప్రజల జీవితాల్లో వచ్చే మార్పులు వారిని అనేక వ్యాధుల బాధితులుగా మారుసున్నాయి. బిజీ బిజీ లైఫ్ స్టైల్, వేగంగా మారుతున్న అలవాట్లు, తిండి అలవాట్లు ఆరోగ్యాన్ని ప్రభావితం చేస్తున్నాయి. ఆరోగ్యంగా ఉండటానికి జీవనశైలిలో తగిన మార్పులు చేసుకోవడం చాలా ముఖ్యం. ఈ రోజుల్లో ముఖ్యంగా డయాబెటిస్, కొలెస్ట్రాల్, రక్తపోటు, గుండె సంబంధిత కేసులు వేగంగా పెరుగుతున్నాయి.

ఈ ముప్పుల నుంచి తప్పించుకోవాలంటే సరైన జీవనశైలి ముఖ్యం. ముఖ్యంగా అధిక రక్తపోటు, ఎక్కువ కొలెస్ట్రాల్ గుండె వ్యాధుల ప్రమాదాన్ని పెంచుతున్నాయి. ఇవి ఏ మాత్రం పెరిగినా గుండెకి ప్రమాదం. అందుకే జీవనశైలిలో మార్పులు చేసుకోవాలి. సమతుల్య ఆహారం, వ్యాయామం చేయడం చాలా ముఖ్యం. అయితే, కొన్ని ఇంటి నివారణలు కూడా ప్రభావవంతంగా పనిచేస్తాయి.

వంటగదిలో దొరికే ధనియాలు ఎన్నో ఆరోగ్య సమస్యల్ని తగ్గించడంలో కీలక పాత్ర పోషిస్తాయి. ధనియాల్లో పోషకాలు మెండుగా ఉన్నాయి. ఈ ధనియాల్ని తీసుకోవడం వల్ల హైబీపీ, కొలెస్ట్రాల్, షుగర్‌ని కంట్రోల్‌లో ఉంచుకోవచ్చని న్యూట్రిషనిస్ట్స్ లవినీత్ బాత్రాతో పాటు రాజ్మణి చెబుతున్నారు. దీనికి సంబంధించి సమాచారాన్ని తమ ఇన్‌స్టా ఖాతాలో షేర్ చేశారు. ధనియాల్ని తీసుకోవడం వల్ల కలిగే ప్రయోజనాలు ఏంటి, వాటిని ఎలా తీసుకోవాలన్న పూర్తి వివరాలపై ఓ లుక్కేద్దాం.

అధిక రక్తపోటు

ధనియాలు అధిక రక్తపోటును నియంత్రించడంలో ప్రయోజనకరంగా ఉంటాయి. ధనియాల్లో గుండెకు ఆరోగ్యకరమైన ఫైబర్, యాంటీ ఆక్సిడెంట్లు ఉన్నాయి. ఇవి రక్తపోటును నియంత్రించడంలో సాయపడతాయి. ధనియాల్లో సహజ మూత్రవిసర్జన లక్షణాలు ఉంటాయి. ఇవి శరీరం నుంచి అదనపు సోడియంను తొలగించడంలో సాయపడతాయి. ధనియాల్లో ఉండే కాల్షియం అయాన్ రక్తనాళాలపై ఒత్తిడిని తగ్గిస్తుంది.

కొలెస్ట్రాల్ కంట్రోల్

ధనియాల్లో యాంటీఆక్సిడెంట్లు, విటమిన్లు, ఖనిజాలు ఉంటాయి. ఇవి కొలెస్ట్రాల్ స్థాయిల్ని నియంత్రించడంలో సాయపడతాయి. ధనియాల్లో ఉండే సమ్మేళనాలు LDL (తక్కువ-సాంద్రత కలిగిన లిపోప్రొటీన్) లేదా చెడు కొలెస్ట్రాల్‌ను తగ్గించడంలో సాయపడతాయి. HDL (అధిక-సాంద్రత కలిగిన లిపోప్రొటీన్) లేదా మంచి కొలెస్ట్రాల్‌ను పెంచుతాయి. దీంతో, అథెరోస్క్లెరోసిస్‌తో పాటు గుండె జబ్బుల ప్రమాదం తగ్గుతుంది.

న్యూట్రిషనిస్ట్ లవ్‌నీత్ బాత్రా పోస్ట్

​అదుపులో రక్తంలో షుగర్ లెవల్స్

ఈ రోజుల్లో చాలా మంది డయాబెటిస్ సమస్యతో బాధపడుతున్నారు. అలాంటి వారికి ధనియాలు బెస్ట్ ఆప్షన్. ధనియాలు రక్తంలో చక్కెర స్థాయిల్ని నియంత్రించడంలో సాయపడతాయి. ధనియాలు ఇన్సులిన్ సెన్సిటివిటీ మెరుగుపర్చడంలో సాయపడతాయి. అందుకే డయాబెటిస్ ఉన్నవారు ధనియాల నీరు తాగాలని న్యూట్రిషనిస్ట్ చెబుతున్నారు.

న్యూట్రిషనిస్ట్ రాజ్మణి షేర్ చేసిన వీడియో

​ఇతర ప్రయోజనాలు

​జీర్ణక్రియ మెరుగుపడుతుంది: ధనియాలు జీర్ణవ్యవస్థను మెరుగుపరచడంలో సాయపడతాయి. అజీర్ణం, గ్యాస్, ఎసిడిటీ వంటి సమస్యలకు చెక్ పెట్టడానికి ధనియాలు ఎంతగానో సాయపడతాయి.

బరువు తగ్గడానికి సాయపడుతుంది: ధనియాల నీరు క్రమం తప్పుకుండా తీసుకోవడం వల్ల బరువు తగ్గవచ్చని నిపుణులు అంటున్నారు.

నిర్విషీకరణ లక్షణాలు: ధనియాల నీరు కాలేయం, మూత్రపిండాల పనితీరును మెరుగుపరుస్తుంది. ఇందులో యాంటీఆక్సిడెంట్ లక్షణాలు శరీరాన్ని లోపలి నుంచి శుభ్రపర్చడంలో సాయపడతాయి.

లివర్ ఫంక్షన్ మెరుగుపరుస్తుంది: ధనియాల నీరు కాలేయం నుంచి టాక్సిన్లు తొలగిస్తుంది. ఇది వాపును కూడా తగ్గిస్తుంది. ఫలితంగా, కాలేయ పనితీరు మెరుగుపడుతుంది.

ఎలా తీసుకోవాలి?

ధనియాల్ని నీరు రూపంలో తీసుకోవచ్చు. ఇందుకోసం ఒక టీస్పూన్ ధనియాల్ని తీసుకోండి. ఇప్పుడు ఒక గ్లాస్ నీటిలో రాత్రంతా నానబెట్టండి. ఆ నీటిని ఉదయాన్నే తాగాలి. మీరు కావాలనుకుంటే ఆ నీటిని మరిగించి.. టీలా తాగవచ్చు. కావాలనుకుంటే ధనియాల్ని పొడిలా చేసుకుని వేడి నీటితో కలిపి తాగవచ్చు. మీరు ఏదైనా వ్యాధులతో బాధపడుతుంటే వైద్యుణ్ని సంప్రదించి తగిన సలహా తీసుకోండి.