by Suryaa Desk | Tue, Dec 02, 2025, 08:11 PM

టెక్నాలజీ విపరీతంగా పెరిగిన ఈ రోజుల్లో.. ఇళ్లు, కార్యాలయాలలో భద్రత కోసం ఏర్పాటు చేసుకున్న ఇంటర్నెట్ కనెక్టెడ్ కెమెరాలు (ఐపీ కెమెరాలు) కూడా హ్యాకర్ల బారిన పడుతుండడం తీవ్ర ఆందోళన కలిగిస్తోంది. ముఖ్యంగా దక్షిణ కొరియాలో వెలుగులోకి వచ్చిన ఒక సంచలన కేసులో.. కొందరు నేరగాళ్లు దాదాపు 1 లక్షా 20 వేల సీసీ కెమెరాలను హ్యాక్ చేసి.. వాటిని లైంగిక వీడియోల డేటా సేకరణ కోసం ఉపయోగించినట్లు తేలింది. ఈ ఘటన ప్రజలు తమ డిజిటల్ భద్రత పట్ల ఎంత జాగ్రత్తగా ఉండాలో తెలియజేస్తోంది.

సాధారణ సీసీ కెమెరాల కంటే ఐపీ కెమెరాలు తక్కువ ఖర్చులో లభిస్తుండటం.. ఇంటర్నెట్‌కు కనెక్ట్ చేసి మొబైల్ యాప్‌ల ద్వారా ఎక్కడి నుంచైనా పర్యవేక్షించే సౌలభ్యం ఉండటం వల్ల ప్రజలు వీటిని పిల్లలు, పెంపుడు జంతువులు, ఇంటి భద్రత కోసం ఎక్కువగా ఉపయోగిస్తున్నారు. అయితే.. ఈ కెమెరాలకు సాధారణ లేదా డిఫాల్ట్ పాస్‌వర్డ్‌లు వాడటమే హ్యాకర్లకు సులువైన మార్గంగా మారింది. నేరగాళ్లు హ్యాక్ చేసిన కెమెరాలు సౌత్ కొరియాలోని సాధారణ ఇళ్లు, సౌండ్‌ప్రూఫ్ రూములు, జిమ్స్, గైనక్ హాస్పిటల్స్ వంటి సున్నితమైన ప్రదేశాలలో ఉన్నట్లు గుర్తించారు. ఈ ప్రైవేట్ వీడియోలను వారు ఆన్‌లైన్ ద్వారా అమ్మి సొమ్ము చేసుకున్నారు.

 ఈ కేసులో పోలీసులు ఇప్పటికే నలుగురు నిందితులను అదుపులోకి తీసుకున్నారు. వారి విచారణలో దిగ్భ్రాంతికర విషయాలు వెలుగు చూశాయి. ఒక నిందితుడు ఏకంగా 63 వేల కెమెరాలను హ్యాకింగ్ చేసి.. 545 లైంగిక కంటెంట్ ఉన్న వీడియోలను తయారు చేసి రూ. 22 లక్షలకు విక్రయించినట్లు తేలింది. మరొక నిందితుడు 70 వేల కెమెరాల నుంచి 648 వీడియోల డేటాను అమ్మి రూ. 11 లక్షలు సొమ్ము చేసుకున్నాడు. గడచిన ఏడాది కాలంలో చట్టవిరుద్ధంగా ఫుటేజీని పంపిణీ చేసిన వెబ్‌సైట్‌లో పోస్ట్ చేయబడిన మొత్తం వీడియోలలో ఈ ఇద్దరు అనుమానితుల వాటా 62 శాతం ఉన్నట్లు పోలీసులు గుర్తించారు.

ప్రస్తుతం అధికారులు ఆ వెబ్‌సైట్‌ను బ్లాక్ చేయడానికి.. పూర్తిగా మూసివేయడానికి ప్రయత్నిస్తున్నారు. ఆ సైట్ ఆపరేటర్‌పై దర్యాప్తు చేయడానికి విదేశీ ఏజెన్సీలతో కలిసి పనిచేస్తున్నారు. ప్రజల వ్యక్తిగత భద్రతకు భంగం కలిగించే ఇలాంటి ఘటనల నేపథ్యంలో... అధికారులు ఐపీ కెమెరాల వినియోగదారులకు కఠిన హెచ్చరికలు జారీ చేశారు. ఐపీ కెమెరాలకు స్ట్రాంగ్, క్లిష్టమైన పాస్‌వర్డ్‌లను మాత్రమే ఉపయోగించాలి. పాస్‌వర్డ్‌లను తరచుగా మార్చడం, టూ-ఫ్యాక్టర్ అథెంటికేషన్‌ను ఉపయోగించడం తప్పనిసరి. కెమెరా తయారీదారులు అందించే యాప్‌లను ఎప్పటికప్పుడు అప్‌డేట్‌ చేయడం ద్వారా భద్రతా లోపాలను సరిదిద్దవచ్చు.