by Suryaa Desk | Sat, Nov 29, 2025, 10:29 PM

ఎంత సంపాదించేవారైనా.. కొన్ని అవసరాల కోసం బ్యాంకుల్లో లోన్లు తీసుకుంటుంటారు. ఇటీవల చిన్న చిన్న అవసరాలకు కూడా బ్యాంకుల్లో లోన్లు తీసుకునే వారి సంఖ్య పెరిగింది. ఇంకా ఇల్లు కట్టుకోవడం లేదా కొనడం వంటి వాటి కోసం కచ్చితంగా బ్యాంకులవైపే చూస్తుంటారు. ఇది పెద్ద ఖర్చుతో కూడుకున్నది కాబట్టి.. సుదీర్ఘ కాలం చెల్లించాల్సి ఉంటుంది. అయితే.. ఆర్బీఐ రెపో రేటును తగ్గిస్తున్న క్రమంలో.. బ్యాంకులు హోం లోన్ వడ్డీ రేట్లను క్రమంగా తగ్గిస్తూ వస్తున్నాయని చెప్పొచ్చు. కొన్ని బ్యాంకుల్లో సుమారు 8 శాతం నుంచి ప్రారంభం అవుతున్నాయి. అయినప్పటికీ.. ఈ లోన్లు తీసుకునేముందు మన ఆర్థిక స్థోమత, తిరిగి చెల్లించే సామర్థ్యం అంచనా వేసుకోవాలి. అంటే.. ఎంత లోన్ తీసుకోవాలి.. ఎన్నేళ్లకు తీసుకుంటే నెలకు ఈఎంఐ ఎంత కట్టాలో అవగాహన పెంపొందించుకోవడం ముఖ్యం. అప్పుడు చాలా తేలిక అవుతుంది.

లోన్ ఈఎంఐ అనేది.. ముందుగా వడ్డీ రేట్లు, లోన్ టెన్యూర్, లోన్ టైప్‌పై ఆధారపడి ఉంటుంది. చాలా వరకు ప్రధాన బ్యాంకుల్లో హోం లోన్ వడ్డీ రేట్లు కనీసం 7.30 శాతం నుంచి 9 శాతం వరకు ఉన్నాయి. ఇప్పుడు ఉదాహరణకు మీరు 20 ఏళ్ల కాల వ్యవధికి రూ. 20 లక్షల హోం లోన్‌ను 8.5 శాతం వడ్డీ రేటుకు తీసుకున్నారనుకుందాం. ఇక్కడ నెలకు మీరు రూ. 17,356 చొప్పున ఈఎంఐ చెల్లించాల్సి వస్తుంది. ఇక్కడ లోన్ కాలవ్యవధి ఆధారంగానే ఈఎంఐ ప్రధానంగా ఆధారపడి ఉంటుంది. టెన్యూర్ పెరుగుతున్న కొద్దీ ఈఎంఐ తగ్గుతుంటుంది. కానీ సుదీర్ఘంగా ఎక్కువ వడ్డీ చెల్లించాల్సి వస్తుంది. కొన్ని టెన్యూర్లకు ఇప్పుడు మనం ఈఎంఐ లెక్కల్ని పరిశీలిద్దాం.

పదేళ్ల టెన్యూర్ చూస్తే రూ. 20 లక్షల హోం లోన్‌పై నెలకు ఈఎంఐ రూ. 24,797 చొప్పున పడుతుంది. 15 ఏళ్లకు అయితే ఈఎంఐ రూ. 19,695 గా ఉంది. 20 ఏళ్లకు చూస్తే నెలకు ఈఎంఐ రూ. 17,356 పడుతుంది. 25 ఏళ్ల వ్యవధికి 8.50 శాతం వడ్డీ రేటుకు 20 లక్షల లోన్‌పై ఈఎంఐ రూ. 16,105 గా ఉంది. 30 ఏళ్లకు అయితే ఇక్కడ ఈఎంఐ రూ. 15,378 చొప్పున చెల్లిస్తే సరిపోతుంది.

ఇక్కడ మీరు 15 ఏళ్ల వ్యవధికి చూస్తే 20 లక్షల లోన్‌పై వడ్డీతోనే రూ. 15.45 లక్షలు చెల్లించాల్సి వస్తుంది. మొత్తంగా రూ. 35.45 లక్షలు చెల్లించాలి. ఇదే 25 ఏళ్లకు పెట్టుకుంటే అప్పుడు వడ్డీ రూపంలోనే రూ. 28.31 లక్షలు చెల్లించాలి. మొత్తంగా రూ. 48.31 లక్షలు చెల్లించాల్సి వస్తుంది. ఈ రెండింట్లో మీరు అదనంగా రూ. 13 లక్షలకుపైగా చెల్లించాల్సి వస్తుంది. 30 ఏళ్ల టెన్యూర్‌ చూస్తే ఇక్కడ వడ్డీతోనే ఏకంగా రూ. 35 లక్షలకుపైగా చెల్లించాల్సి వస్తుంది. అంటే ప్రధానంగా గుర్తుంచుకోవాల్సింది.. టెన్యూర్ పెరిగితే ఈఎంఐ తగ్గుతుంది కానీ.. మీరు చెల్లించాల్సిన వడ్డీ భారీగా పెరుగుతుందని తెలుసుకోవాలి.

ఏ బ్యాంకుల్లో హోం లోన్ వడ్డీ రేట్లు ఎలా?

ఇప్పుడు ప్రముఖ ప్రైవేట్, ప్రభుత్వ రంగ బ్యాంకుల్లో హోం లోన్ వడ్డీ రేట్లను గమనిస్తే.. బ్యాంక్ ఆఫ్ బరోడాలో 7.45 శాతం నుంచి ప్రారంభమవుతుంది. కెనరా బ్యాంకులో 7.35 శాతం, ఎస్బీఐలో 7.50 శాతం నుంచి ఉన్నాయి. పంజాబ్ నేషనల్ బ్యాంక్, యూనియన్ బ్యాంకుల్లో చూస్తే వరుసగా 7.40 శాతం, 7.30 శాతంగా ఉన్నాయి. ప్రైవేట్ బ్యాంకుల్లో యాక్సిస్ బ్యాంకులో 8.35 శాతం నుంచి ప్రారంభమవుతున్నాయి. హెచ్‌డీఎఫ్‌సీ బ్యాంకులో వడ్డీ రేటు 7.90 శాతంగా ఉంది. ఐసీఐసీఐ బ్యాంకులో 7.65 శాతం, కోటక్ మహీంద్రా బ్యాంకులో 7.70 శాతం, యెస్ బ్యాంకులో 9 శాతం నుంచి ప్రారంభమవుతున్నాయి.