by Suryaa Desk | Sat, Nov 29, 2025, 10:07 PM

 అగ్రరాజ్యం అమెరికా అధ్యక్షుడు డొనాల్డ్ ట్రంప్ మరో కీలక ప్రకటన చేశారు. మాజీ అధ్యక్షుడు జో బైడెన్ పదవీ కాలంలో జారీ చేసిన ఆటోపెన్ ఎగ్జిక్యూటివ్ ఆదేశాలను తక్షణమే రద్దు చేస్తున్నట్లు ప్రకటించారు. ఆ పత్రాలకు ఇకపై ఎలాంటి చట్టబద్ధత ఉండదని తెలిపారు. బైడెన్ హయాంలో దాదాపు 92 శాతం ఆదేశాలపై ఆటోపెన్‌తోనే సంతకాలు చేశారని ట్రంప్ ఆరోపించారు.

ట్రంప్ తన సోషల్ మీడియా వేదిక 'ట్రూత్ సోషల్'లో ఈ విషయాన్ని వెల్లడించారు. స్లీపీ జో బైడెన్ ఆటోపెన్‌తో సంతకం చేసిన ఏ పత్రమైనా తక్షణమే రద్దు చేయబడుతుందని చెప్పారు. అవి దాదాపు 92 శాతం వరకు ఉన్నాయని గుర్తు చేశారు. వాటికి ఇకపై ఎలాంటి చట్టబద్ధత ఉండదని క్లారిటీ ఇచ్చారు. అధ్యక్షుడి నుంచి ప్రత్యేకంగా ఆమోదం లభించకపోతే ఆటోపెన్‌ను ఉపయోగించడానికి అనుమతి లేదని ట్రంప్ పేర్కొన్నారు.

ఆటోపెన్ అనేది ఒక యంత్రం. ఇది ఒక వ్యక్తి సంతకాన్ని లేదా చేతిరాతను కాపీ చేసి, అనేక పత్రాలపై త్వరగా సంతకం చేయడానికి ఉపయోగపడుతుంది. వైట్ హౌస్‌లో రద్దీగా ఉండే షెడ్యూల్‌లో దీనిని వాడతారు. అయితే సంతకాల విషయంలోఅధ్యక్షుడి అనుమతి తప్పనిసరి. ఇదిలా ఉండగా.. బైడెన్ వయసు, మానసిక స్థితి కారణంగా ఎగ్జిక్యూటివ్ కార్యాలయాన్ని నియంత్రించలేక పోయారని ట్రంప్ ఆరోపించారు. బైడెన్ చుట్టూ ఉన్న రాడికల్ లెఫ్టిస్టులు, మతిలేని వ్యక్తులు అధ్యక్షుడిని దాటి నిర్ణయాలు తీసుకున్నారని విమర్శించారు.

"ఒకవేళ తన ఆదేశాలతోనే ఆటోపెన్ వినియోగించారని బైడెన్ చెప్పినట్లయితే.. అతను చేసిన ఆ సంతకాలు చట్టబద్ధం కావు. ఎందుకంటే ఆటోపెన్‌ను నిర్వహించిన వ్యక్తులు చట్టవిరుద్ధంగా చేశారు. దీనికి జో బైడెన్‌కు ఏమాత్రం సంబంధం లేదు. ఒకవేళ అతను ఉన్నానని చెబితే ఫోర్జరీ కింద అతనిపై అభియోగాలు మోపుతా" అని ట్రంప్ తీవ్రంగా హెచ్చరించారు. ఇది మాత్రమే కాకుండా వలసలపై కూడా ట్రంప్ కఠిన వైఖరి ప్రకటించారు. వాషింగ్టన్ డీసీలో అఫ్గాన్ పౌరుడి కాల్పుల్లో ఒక నేషనల్ గార్డ్ మరణించిన నేపథ్యంలో.. అన్ని "థర్డ్ వరల్డ్ కంట్రీస్" నుంచి వలసలను శాశ్వతంగా నిలిపివేస్తున్నట్లు పేర్కొన్నారు. దేశీయ ప్రశాంతతకు భంగం కలిగించే వలసదారుల పౌరసత్వాన్ని రద్దు చేస్తానని.. పౌరులు కానివారికి ఇచ్చే అన్ని ఫెడరల్ ప్రయోజనాలు, రాయితీలను నిలిపివేస్తానని ఆయన ప్రకటించారు.