by Suryaa Desk | Thu, Jun 12, 2025, 03:27 PM

గుజరాత్‌లోని అహ్మదాబాద్‌లో జరిగిన ఘోర విమాన ప్రమాదంపై ప్రధానమంత్రి నరేంద్ర మోదీ తీవ్ర ఆందోళన వ్యక్తం చేశారు. ఈ ప్రమాదంపై ఆయన కేంద్ర పౌర విమానయాన శాఖ మంత్రి కె. రామ్మోహన్ నాయుడు, కేంద్ర హోం మంత్రి అమిత్ షాతో ఫోన్‌లో మాట్లాడి వివరాలను అడిగి తెలుసుకున్నారు. ప్రమాద ఘటనా స్థలి వద్ద సహాయక చర్యలను వేగవంతం చేయాలని, బాధితులకు అవసరమైన అన్ని రకాల సహాయం అందించాలని ప్రధాని ఆదేశించారు. అలాగే, ప్రమాద పరిణామాలపై ఎప్పటికప్పుడు తనకు నివేదికలు అందించాలని మంత్రులను కోరారు.
ఈ ప్రమాదంలో ఎయిర్ ఇండియాకు చెందిన బోయింగ్ 787-8 విమానం, అహ్మదాబాద్ నుంచి లండన్‌కు బయల్దేరిన కొద్ది నిమిషాల్లోనే మేఘాని ప్రాంతంలోని జనావాసాలపై కూలిపోయింది. విమానంలో 242 మంది ప్రయాణికులు, 12 మంది సిబ్బంది ఉన్నట్లు అధికారులు తెలిపారు. ప్రమాద సమయంలో విమానం కూలిన దృశ్యాలు సామాజిక మాధ్యమాల్లో వైరల్‌గా మారాయి. సమాచారం అందుకున్న వెంటనే అధికారులు, రెస్క్యూ బృందాలు ఘటనా స్థలానికి చేరుకొని సహాయక చర్యలు చేపట్టాయి. ప్రాణ నష్టం వివరాలు ఇంకా స్పష్టంగా తెలియరాలేదు.
కేంద్ర మంత్రి రామ్మోహన్ నాయుడు ఈ ఘటనపై దిగ్భ్రాంతి వ్యక్తం చేస్తూ, స్వయంగా అహ్మదాబాద్‌కు బయల్దేరారు. అధికారులు, విమానయాన సంస్థలతో కలిసి పరిస్థితిని నిశితంగా పరిశీలిస్తున్నట్లు తెలిపారు.