by Suryaa Desk | Tue, Jun 10, 2025, 10:00 PM

పొట్ట క్లీన్ గా ఉంటేనే ఆరోగ్యంగా ఉంటారు. కాస్త తేడా ఉన్న రకరకాల సమస్యలు వెంటాడతాయి. కడుపులో మలినాలు పేరుకుపోయే కొద్దీ అనారోగ్యాలు పెరుగుతాయి. మరి ఈ మురికిని ఎలా వదిలించుకోవాలి. దీనికి సమాధానం చెప్పారు ఓ న్యూట్రిషనిస్ట్. చాలా సులభంగా కడుపులో ఉన్న టాక్సిన్స్ ని బయటకు వెళ్లగొట్టే చిట్కా చెప్పారు. ఈజీగా ఇంట్లోనే తయారు చేసుకోగలిగే ఓ డ్రింక్ తో డిటాక్స్ చేయొచ్చని వివరించారు. పైగా..ఈ డ్రింక్ తయారు చేయడానికి ఏవేవో కొనాల్సిన పని లేదు. దాదాపు రెగ్యులర్ గా వాడే పదార్థాలతోనే తయారు చేసుకోవచ్చు. కేవలం పొట్టనే కాదు. లివర్ ని కూడా డిటాక్స్ చేసేస్తుంది ఈ డ్రింక్. కడుపులో ఉంటే మైక్రోబయోమ్ ని పెంచి ఆహారం సులభంగా జీర్ణం అయ్యేలా తోడ్పడుతుంది. మరి..ఈ డ్రింక్ తయారు చేసుకోడానికి ఏయే పదార్థాలు అవసరం అవుతాయి. ఎలా తయారు చేసుకోవాలి. ఈ వివరాలు చూద్దాం.

లివర్, గట్ కి ఒకటే డ్రింక్

శరీరంలో టాక్సిన్స్ పేరుకుపోతున్నయి అంటే..లివర్ సరైన విధంగా పని చేయడం లేదని అర్థం. అంటే.. ఆ స్థాయిలో అనారోగ్యకరమైన ఆహార పదార్థాలు తింటున్నామని. అయితే..లివర్ తో పాటు కడుపులోనూ టాక్సిన్స్ ఎక్కువైపోతాయి. ఈ రెండింటి మధ్య బ్యాలెన్స్ తప్పిందంటే చాలా సమస్యలు వస్తాయి. ఈ ఇబ్బంది తలెత్తకుండా ఉండాలంటే రెండింటినీ ఒకేసారి క్లీన్ చేసేయాలి. అలాంటి డ్రింక్ గురించే ఇప్పుడు చెప్పుకోబోతున్నాం. న్యూట్రిషనిస్ట్ రికమెండ్ చేసిన ఈ డ్రింక్ తాగితే పొట్టతో పాటు లివల్ కూడా శుభ్రమైపోతుంది.

కావాల్సిన పదార్థాలు

ఈ డ్రింక్ తయారు చేసుకోడానికి కొన్ని పదార్థాలు అవసరం అవుతాయి. వాటిలో మొదటిది యాపిల్ సైడర్ వెనిగర్. దీంతో పాటు నిమ్మరసం,అల్లం పొడి, పసుపు, మిరియాలు కావాలి. వీటన్నింటనీ కలిపి తాగడానికి అనువుగా వేడి నీళ్లు అవసరం అవుతాయి. అయితే..వీటిని ఎలా పడితే అలా కాకుండా న్యూట్రిషనిస్ట్ చెప్పిన మోతాదులో తీసుకుంటే ఈజీగా డిటాక్స్ డ్రింక్ తయారవుతుంది. ఇందులో కలుపుకునే ప్రతి పదార్థానికీ ప్రత్యేకత ఉంది. అన్నింట్లోనూ ఔషధ గుణాలున్నాయి. అయితే...మోతాదు మించడం వల్ల ఇబ్బందులు వస్తుండొచ్చు. అందుకే ఏ క్వాంటిటీలో వీటిని కలుపుకోవాలో చూద్దాం.

ఎలా తయారు చేసుకోవాలి

ముందుగా ఓ టేబుల్ స్పూన్ యాపిల్ సైడర్ వెనిగర్ తీసుకోవాలి. ఆ తరవాత అర టేబుల్ స్పూన్ అల్లం పొడి వేయాలి. అందులోనే పావు టేబుల్ స్పూన్ పసుపు కలపాలి. ఆ తరవాత చిటికెడు నల్ల మిరియాలు యాడ్ చేయాలి. ఇందులో ఓ కప్పు వేడి నీళ్లు పోయాలి. చివర్లో ఓ నిమ్మచెక్క రసం అందులో కలపాలి. ఇందుల ప్రతి ఇన్ గ్రీడియెంట్ సరైన విధంగా కలిసేంత వరకూ బాగా మిక్స్ చేయాలి. అంతే. కడుపు, లివర్ లో ఉన్న టాక్సిన్స్ ని బయటకు పంపేసే డిటాక్స్ డ్రింక్ రెడీ అయిపోతుంది. అయితే..దీన్ని ఎప్పుడు పడితే అప్పుడు వాడడం వల్ల ప్రయోజనం ఉండదు. అందుకే..న్యూట్రిషనిస్ట్ చెప్పిన టైమ్ లో, చెప్పిన విధంగా తాగితే మంచి ఫలితాలు కనబడతాయి.

ఎలా తాగితే మంచిది

ఈ డిటాక్స్ డ్రింక్ ని పరగడుపున వారం రోజుల పాటు తాగితే చాలా మంచిది. ఆ సమయంలో జీర్ణ వ్యవస్థ చాలా యాక్టివ్ గా ఉంటుంది. అందుకే..ఎక్కువ ప్రయోజనం పొందాలంటే అప్పుడు తాగడమే బెటర్. అయితే..ఇది కాస్త వేడిగా ఉన్నప్పుడు తాగాలి. గోరు వెచ్చగా ఉన్నా పరవాలేదు. కానీ..వేడిగా ఉన్నప్పుడు తాగితేనే పేగుల్లో కదలిక వస్తుంది. పైగా ఒకేసారి గటగటా తాగడం కాకుండా మెల్లమెల్లగా సిప్ చేస్తూ ఉండాలి. ఇలా చేయడం వల్ల ఇందులో ఉన్న పదార్థాలన్నీ సరైన విధంగా ఒంటికి పడతాయి. జీర్ణ సమస్య కూడా తగ్గిపోతుంది. పరగడుపున తాగడం వల్ల శరీరానికి కావాల్సిన ఎనర్జీ వస్తుంది. ఫలితంగా రోజంతా యాక్టివ్ గా ఉండేందుకు వీలవుతుంది.

ఎన్నో ప్రయోజనాలు

ఈ డ్రింక్ లో వాడిన అన్ని పదార్థాలూ ఆరోగ్యానికి మంచి చేసేవే. ముఖ్యంగా యాపిల్ వెనిగర్ విషయానికొస్తే.. అందులో అసిటిక్ యాసిడ్ ఉంటుంది. ఇది పొట్టలో ఉండే పీహెచ్ లెవెల్స్ ని బ్యాలెన్స్ చేస్తుంది. ఆరోగ్యకరమైన గట్ బ్యాక్టీరియాని ఎక్కువ మొత్తంలో ఉత్పత్తి చేస్తుంది. ఫలితంగా జీర్ణ సమస్యలనేవే రాకుండా పోతాయి. కడుపు ఉబ్బరమూ తగ్గిపోతుంది. ఇక ఇందులో కలిపిన నిమ్మరసంలో విటమిన్ సి పుష్కలంగా ఉంటుంది. ఇది లివర్ ని సహజంగా డిటాక్స్ చేస్తుంది. ఇమ్యూనిటీ పెంచడంతో పాటు జీర్ణ శక్తిని పెంచుతుంది. ఆక్సిడేటివ్ స్ట్రెస్ ని తగ్గించి యాంటీ ఆక్సిడెంట్ గా పని చేస్తుంది.

మరి కొన్ని లాభాలు

అల్లంలో యాంటీ ఇన్ ఫ్లమేషన్ గుణాలుంటాయి. ఇవి జీర్ణ శక్తికి తోడ్పడడంతో పాటు పొట్టలో ఇరిటేషన్ ని తగ్గిస్తుంది. గ్యాస్ట్రిక్ సమస్యనూ తొలగిస్తుంది. పసుపులో యాంటీ బ్యాక్టీరియా గుణాలతో పాటు యాంటీ ఇన్ ఫ్లమేషన్ గుణాలుండడం వల్ల లివర్ డిటాక్స్ కీ బాగా పని చేస్తుంది. మిరియాలు వల్ల పసుపులో ఉండే కర్ క్యుమిన్ సరైన విధంగా శరీరానికి అందుతాయి. పైగా..ఇందులో డిటాక్స్ గుణాలుంటాయి. ఇక వేడి నీళ్ల వల్ల జీర్ణ వ్యవస్థ యాక్టివ్ అవుతుంది. సులువుగా మల విసర్జన జరిగి గట్ హెల్త్ బాగుంటుంది.