by Suryaa Desk | Tue, Jun 10, 2025, 07:14 PM

దశాబ్దాలుగా భారత్‌ను అస్థిరపరచాలని పాకిస్తాన్ ప్రయత్నిసూనే ఉంది. డైరెక్ట్‌గా ఎన్ని యుద్ధాలు చేసినా పని అవ్వకపోవడం వల్ల ఉగ్రవాదులను ఉసిగొలుపుతూ భారత్‌లో అల్లర్లు సృష్టించాలని చాలా పన్నాగాలు పన్నింది. ఉగ్రదాడులు జరిపించింది. సరిహద్దు వెంబడి చొరబాట్లతో భారత భద్రత దళాల శక్తికి పరీక్షలు పెట్టింది. ఇటీవల జమ్మూకాశ్మీర్‌లో పహల్గామ్‌లో ఉగ్రవాదులు అమాయక టూరిస్ట్‌లపై విచక్షణారహితంగా కాల్పులు జరిపి 26మందిని పొట్టనపెట్టుకున్నారు. ఈ ఉగ్రదాడితో మరోసారి భారత్‌ను ఇబ్బంది పెట్టాలనుకున్న పాక్‌కు షాక్ తగిలింది. ఈసారి భారత్ తీవ్రంగా స్పందించింది. ఆపరేషన్ సిందూర్‌తో పాక్ ఆశ్రయమిస్తున్న ఉగ్రశిబిరాలపై మెరుపు దాడులు చేసి ధ్వంసం చేసింది. తమ జోలికి వస్తే సీన్ రిపీట్ అవుతుందంటూ వార్నింగ్ ఇచ్చింది. తాజాగా మరోసారి దాయది దేశానికి ప్రపంచ వేదికపై స్ట్రాంగ్ వార్నింగ్ ఇచ్చారు భారత విదేశాంగ మంత్రి ఎస్ జై శంకర్.

భారత్‌లోకి ఉగ్రవాదులను పంపిస్తే పాకిస్తాన్ భూభాగంలోకి చొచ్చుకువెళ్లి మరీ దాడులు చేస్తామని హెచ్చరించారు. పాకిస్తాన్ ఉగ్రవాదాన్ని ప్రోత్సహిస్తోందని, వేలాది మంది ఉగ్రవాదులకు శిక్షణ ఇస్తోందని జై శంకర్ తెలిపారు. "వారు (ఉగ్రవాదులు) పాకిస్తాన్‌లో ఉంటే, మేము పాకిస్తాన్‌లోకి వెళ్తాము" అంటూ జైశంకర్ విరుచుకుపడ్డారు. పాకిస్తాన్ ఉగ్రవాదాన్ని ఒక స్టేట్ పాలసీగా ఉపయోగిస్తోందని మండిపడ్డారు. యూరప్‌తో వాణిజ్య ఒప్పందంపై చర్చలు జరపడానికి వెళ్లిన జైశంకర్.. బ్రస్సెల్స్‌లో జరిగిన ఒక ఇంటర్వ్యూలో జైశంకర్ ఈ వ్యాఖ్యలు చేశారు. ఉగ్రవాద శిబిరాలను లక్ష్యంగా చేసుకుని భారతదేశం 'ఆపరేషన్ సింధూర్' ప్రారంభించిన కొన్ని వారాల తర్వాత ఈ హెచ్చరిక చేయడం గమనార్హం.

పాక్ సరిహద్దుల వెంబడి వేలాది మంది ఉగ్రవాదులకు శిక్షణ ఇస్తోందని, వారిని మోహరిస్తోందని జైశంకర్ పేర్కొన్నారు. భారతదేశం ఈ చర్యలను సహించదని.. ఉగ్రవాద సంస్థలు వాటి నాయకులపై ప్రతీకారం తీర్చుకుంటుందని ఆయన హెచ్చరించారు. ఇటీవల భారత వైమానిక దాడులు పాకిస్తాన్ సైనిక మౌలిక సదుపాయాలను ఎలా దెబ్బతీశాయో జైశంకర్ వివరించారు. పాకిస్తాన్ ప్రధాన విమానాశ్రయాలపై విజయవంతంగా దాడి చేశామని.. ఇది రెండు దేశాల మధ్య నాలుగు రోజుల సైనిక ఘర్షణను ముగించడంలో నిర్ణయాత్మక పాత్ర పోషించిందని ఆయన అన్నారు. అయితే ఆపరేషన్ సిందూర్‌లో చనిపోయింది ఉగ్రవాదులు కాదని, స్వాతంత్ర్య సమరయోధులను పాక్ ఉప ప్రధాని అనడం వారి బరితెగింపునకు నిదర్శనం.

పాకిస్తాన్ వైపు ధ్వంసమైన, పనిచేయని విమానాశ్రయాలే దీనికి నిదర్శనం అని ఆయన అన్నారు. గూగుల్‌లో అందుబాటులో ఉన్న ఉపగ్రహ చిత్రాలు.. పాకిస్తాన్ రన్‌వేలు, హాంగర్‌లకు జరిగిన నష్టాన్ని ధృవీకరిస్తాయని పేర్కొన్నారు. భారత్ ఉగ్రవాదంపై రాజీలేని పోరాటం చేస్తోందని జైశంకర్.. పాకిస్తాన్ తన భూభాగం నుంచి ఉగ్రవాదాన్ని ప్రోత్సహించం ఆపకపోతే కఠిన చర్యలు తప్పవని ఆయన హెచ్చరించారు.