by Suryaa Desk | Mon, Jun 09, 2025, 09:00 PM

రిజర్వ్ బ్యాంక్ ఆఫ్ ఇండియా ఇటీవల రెపో రేటును 50 బేసిస్ పాయింట్లు తగ్గించడంతో, ప్రైవేట్ రంగ దిగ్గజం ఐసీఐసీఐ బ్యాంక్ ఫిక్స్‌డ్ డిపాజిట్లపై వడ్డీ రేట్లను తగ్గించిన మొదటి ప్రధాన బ్యాంక్‌గా నిలిచింది. రూ. 3 కోట్ల లోపు డిపాజిట్లపై, కొన్ని టెన్యూర్లకు 25 బేసిస్ పాయింట్ల వరకు వడ్డీ రేట్లను తగ్గించింది. సవరించిన రేట్లు 2025, జూన్ 9 నుంచే అమల్లోకి వచ్చాయి. ఈ కోతతో.. ఐసీఐసీఐ బ్యాంకు.. సాధారణ పౌరులకు రూ. 3 కోట్ల లోపు డిపాజిట్లపై కనీసం 3 శాతం నుంచి గరిష్టంగా 6.6 శాతం వరకు వడ్డీ రేట్లను అందిస్తుంది. ఇదే సమయంలో సీనియర్ సిటిజన్లకు వడ్డీ రేట్లు కనీసం 3.5 శాతం నుంచి 7.10 శాతం వరకు ఉన్నాయి.

అంతకుముందు, బ్యాంక్ 18 నెలల నుంచి 2 సంవత్సరాల కాలానికి సీనియర్ సిటిజన్లకు 7.3 శాతం, సాధారణ పౌరులకు 6.85 శాతం అత్యధిక ఎఫ్‌డీ వడ్డీ రేటును అందించేది. ఐసీఐసీఐ బ్యాంక్ తన ఫిక్స్‌డ్ డిపాజిట్ వడ్డీ రేట్లను వివిధ కాలవ్యవధులపై తగ్గించింది. 46 నుంచి 90 రోజుల డిపాజిట్లపై వడ్డీ రేటు 4.25 శాతం నుంచి 4 శాతానికి తగ్గింది. అలాగే, 91 నుంచి 184 రోజుల డిపాజిట్లపై ఇది 4.75 శాతం నుంచి 4.5 శాతానికి తగ్గింది. 185 నుంచి 270 రోజుల కాలానికి రేటు 5.75 శాతం నుంచి 5.5 శాతానికి తగ్గింది. అయితే 271 రోజుల నుంచి ఏడాదిలోపు కాలవ్యవధికి ఇది 6 శాతం నుంచి 5.75 శాతానికి తగ్గింది.

సంవత్సరం నుంచి 15 నెలల లోపు FDలకు వడ్డీ రేటు 6.5 శాతం నుంచి 6.25 శాతానికి తగ్గింది. 15 నెలల నుంచి 18 నెలల లోపు కాలవ్యవధికి, రేట్లు 6.6-6.85 శాతం నుంచి 6.35 శాతానికి దిగొచ్చాయి. దీర్ఘకాలిక టెన్యూర్ల విషయానికొస్తే, 2 సంవత్సరాల 1 రోజు నుంచి ఐదేళ్ల వరకు రేటు 6.75 శాతం నుంచి 6.60 శాతానికి తగ్గింది. ఇంకా ఐదేళ్ల ఒక రోజు నుంచి పదేళ్ల ఎఫ్‌డీలకు ఇదే సమయంలో.. 5 సంవత్సరాల టాక్స్ సేవర్ FDకి, సాధారణ పౌరులకు వడ్డీ రేటు 6.75 శాతం నుంచి 6.6 శాతానికి తగ్గింది. ఈ విధంగా, సాధారణ పౌరులకు 2 సంవత్సరాల 1 రోజు నుంచి పదేళ్ల వరకు గల కాలవ్యవధులకు అత్యధికంగా 6.60 శాతం వడ్డీ రేటు లభిస్తుంది. సీనియర్ సిటిజన్లకు, ఇదే కాలవ్యవధులకు అత్యధికంగా 7.10 శాతం వడ్డీ రేటు లభిస్తుంది.

రూ. 5 లక్షల FDపై మెచ్యూరిటీకి ఎంతొస్తుంది?

మీరు రూ. 5 లక్షలు జమ చేస్తే అత్యధిక వడ్డీ రేటు ఉన్న టెన్యూర్ (2 సంవత్సరాల 1 రోజు నుంచి 5 సంవత్సరాలు, లేదా 5 సంవత్సరాల 1 రోజు నుంచి 10 సంవత్సరాలు, లేదా ఐదేళ్ల టాక్స్ సేవర్ FDపై మీకు ఎంతొస్తుందో చూద్దాం. ఈ కాలవ్యవధులపై సాధారణ పౌరులకు అత్యధిక వడ్డీ రేటు 6.60 శాతం, సీనియర్ సిటిజన్లకు 7.10 శాతం. ఇక్కడ మనం ఐదేళ్ల లెక్కన చూద్దాం.

సాధారణ పౌరులు రూ. 5 లక్షల అసలుపై 6.60 శాతం వడ్డీ రేటుతో ఐదేళ్లకు సుమారుగా రూ. 1,65,000 వడ్డీ వస్తుంది. మెచ్యూరిటీకి ఈ మొత్తం రూ, 6,65,000 అవుతుంది. ఇదే సమయంలో సీనియర్ సిటిజెన్లకు 7.10 శాతం వడ్డీ రేటుతో ఐదేళ్లకు సుమారు రూ. 1,77,500 వస్తుంది. ఇక్కడ మెచ్యూరిటీకి మొత్తం రూ. 6,77,500 అవుతుంది. ఇది అంచనా మాత్రమే. ఆన్‌లైన్ క్యాలిక్యులేటర్‌ను ఉపయోగించి లెక్కించడం జరిగింది. కచ్చితమైన లెక్కల కోసం బ్యాంకును సంప్రదించండి.