by Suryaa Desk | Mon, May 26, 2025, 07:33 PM

మూడేళ్లకుపైగా కొనసాగుతోన్న ఉక్రెయిన్, రష్యా యుద్ధం ముగింపునకు అమెరికా అధ్యక్షుడు డొనాల్డ్ ట్రంప్ ప్రయత్నాలు చేస్తున్నారు. రష్యా, ఉక్రెయిన్ దేశాల మధ్య కాల్పుల విరమణ ఒప్పందం దిశగా శాంతి చర్చలు సాగుతోన్న వేళ.. ఉక్రెయిన్‌పై రష్యా భారీ వైమానిక దాడికి తెగబడింది. దీంతో ఇరు దేశాల మధ్య ఉద్రిక్తతలు పతాకస్థాయికి చేరుకున్నాయి. తాజా పరిణామాలపై అమెరికా అధ్యక్షుడు డొనాల్డ్ ట్రంప్ తీవ్రంగా స్పందించారు. రష్యా వైమానిక దాడికి ఖండించిన ఆయన.. పుతిన్‌పై ఆగ్రహం వ్యక్తం చేశారు. రష్యా అధ్యక్షుడు వ్లాదిమిర్ పుతిన్ పిచ్చివాడిలా ప్రవర్తిస్తున్నాడని మండిపడ్డారు. ఉక్రెయిన్‌ను పూర్తిగా ఆక్రమించాలనుకుంటే అది రష్యా పతనానికి దారితీస్తుందని అమెరికా అధ్యక్షుడు హెచ్చరించారు

పుతిన్‌పై ట్రంప్ ఆగ్రహం

ఉక్రెయిన్‌పై దండయాత్ర మొదలైన తర్వాత రష్యా జరిపిన అతిపెద్ద వైమానిక దాడి ఇదే కావడంతో ట్రంప్ ఈ వ్యాఖ్యలు చేశారు. ‘పుతిన్‌తో నాకు మంచి సంబంధాలే ఉన్నాయి.. కానీ, అతడు పూర్తిగా పిచ్చివాడిలా ప్రవర్తిస్తున్నాడు... అకారణంగా చాలా మందిని చంపుతున్నాడు. కేవలం సైనికులే కాదు, సాధారణ పౌరులూ చనిపోతున్నారు.. నగరాలపై క్షిపణులు, డ్రోన్లు దాడి చేస్తున్నాయి’ అంటూ అమెరికా అధ్యక్షుడు డొనాల్డ్ ట్రంప్ తన సొంత సామాజిక మాధ్యమం ‘ట్రూత్ సోషల్’లో పోస్ట్ చేశారు.

‘అతడికి ఉక్రెయిన్ పూర్తిగా కావాలని నేను ముందే చెప్పాను.. ఇప్పుడది నిజం అవుతోంది. కానీ, అలాంటి ప్రయత్నం చేస్తే అది రష్యా పతనానికి దారితీస్తుంది’ అని ట్రంప్ హెచ్చరికలు చేశారు. గతంలో పుతిన్‌పై పట్ల సానుకూలంగా ఉన్నప్పటికీ.. ఇటీవల జరుపుతోన్న శాంతి చర్చల్లో కీవ్‌తో మాస్కో అనుసరిస్తున్న వైఖరిపై ట్రంప్ అసహనం వ్యక్తం చేశారు. రష్యా ఇటీవల ఉక్రెయిన్‌పై చేపట్టిన భారీ డ్రోన్ దాడుల్లో 13 మంది చనిపోయారు.

జెలెన్‌స్కీపై విమర్శలు

‘పుతిన్ ఏం చేస్తున్నాడో నాకు అర్థం కావడం లేదు. చాలా మంది చనిపోతున్నారు. చాలా దుర్మార్గంగా వ్యవహరిస్తున్నాడు’ అని ట్రంప్ మీడియాతో మాట్లాడుతూ అన్నారు. ఉక్రెయిన్ అధ్యక్షుడు వొలొడిమిర్ జెలెన్‌స్కీపై కూడా విమర్శలు గుప్పించారు. అతడు మట్లాడే విధానమే సమస్యలకు కారణమవుతోందని, అది తనకు నచ్చడం లేదని ట్రంప్ అసంతృప్తి వ్యక్తం చేశారు. ‘నేను అధ్యక్షుడిగా ఉండుంటే ఈ యుద్ధం మొదలయ్యే అవకాశం లేదని ఎన్నిసార్లు చెప్పానో! ఇది జెలెన్‌స్కీ.. పుతిన్, బైడెన్‌ల యుద్ధం.. ట్రంప్‌ది కాదు. నేను చేసే పని ఈ పెద్ద ప్రమాదాన్ని ఆపడమే. అసమర్థత, ద్వేషం వల్ల ఇది జరిగిందని నేను చెప్పింది నిజం’ అని పేర్కొన్నారు.

రష్యా-ఉక్రెయిన్‌లు వందల సంఖ్యలో ఖైదీలను పరస్పర మార్పిడి జరిగిన తర్వాత.. మాస్కో మళ్లీ తీవ్ర వైమానిక దాడులు చేపట్టింది. ఈ దాడుల్లో ఇద్దరు చిన్నారులు, యువకుడు సహా పలు ప్రాంతాల్లో పౌరులు ప్రాణాలు కోల్పోయారు. రష్యా చర్యలపై జెలెన్‌స్కీ మాట్లాడుతూ.. ‘రష్యా నాయకత్వంపై గట్టి ఒత్తిడి లేకుండా ఈ మానవహననం ఆగదని అన్నారు.

మరోవైపు, వైమానిక దాడి నేపథ్యంలో రష్యాపై మరిన్ని ఆంక్షలు విధించే అవకాశం ఉందని ట్రంప్ తెలిపారు. పుతిన్ చాలా మందిని చంపుతున్నాడని, ఏం జరిగిందో అతడికి అర్థం కావడం లేదన్నారు. అయితే, అమెరికా విదేశాంగ మంత్రి మార్కో రూబియో వ్యాఖ్యలు దీనికి విరుద్దంగా ఉండటం గమనార్హం. ఇటీవల ఆయన కాంగ్రెస్‌లో మాట్లాడుతూ.. ‘ఇప్పుడే ఆంక్షలు విధిస్తామని బెదిరిస్తే, రష్యా చర్చలు ఆపేస్తుందని ట్రంప్ భావిస్తున్నారు’ అని అన్నారు.