by Suryaa Desk | Sun, May 25, 2025, 09:04 PM

మన దేశంలో వివాహం వేడుకలకు సంబంధించిన ఖర్చులు ఏటికేడు పెరుగుతూనే ఉన్నాయి. దీంతో చాలా మంది ఆడంబరంగా వేడుకలు నిర్వహించుకునేందుకే ఇష్టపడుతున్నారు. అయితే, చేతిలో సరిపడా డబ్బులు లేక ఇబ్బందులు పడుతున్న వారూ ఉన్నారు. వడ్డీ వ్యాపారులను ఆశ్రయిస్తే ఎక్కువ వడ్డీ చెల్లించాల్సి వస్తుంది. మరి తక్కువ వడ్డీకే పెళ్లి ఖర్చులకు సరిపడా డబ్బులు రావాలాంటే ఏం చేయాలి? అంటే దేశీయ ప్రైవేట్ రంగ దిగ్గజ బ్యాంకుల్లో ఒకటైన ఐసీఐసీఐ బ్యాంక్ పెళ్లిళ్లకు రుణాలు అందిస్తోంది. ఫంక్షన్ హాల్ బుకింగ్ నుంచి దుస్తుల, నగల కొనుగోలు, కేటరింగ్ వంటి వాటన్నింటికీ రుణాలు ఇస్తోంది. మరి ఆ లోన్ తీసుకోవాలంటే ఏం చేయాలో ఇప్పుడు మనం తెలుసుకుందాం.

మ్యారేజ్ లోన్ అంటే ఏంటి?

పెళ్లి కోసం లోన్ ఇవ్వడం అనేది ఒక రకమైన వ్యక్తిగత రుణమే. పెళ్లిళ్లకు సంబంధించిన ఖర్చుల కోసం అవసరమైన వారికి అందించే రుణం ఇది. పర్సనల్ లోన్ మాదిరిగానే ఉంటుంది. ఈ రుణాలు ప్రధానంగా డెకరేషన్స్, జువెలరీ, ఫంక్షన్ హాల్ బుకింగ్, కేటరింగ్, పెళ్లి కూతురు, పెళ్లి కొడుకు దుస్తుల కొనుగోలు వంటి ఖర్చులు ఇందులోకి వస్తాయి. ఎలాంటి తనఖా లేకుండానే వివాహాల కోసం రూ.50 లక్షల వరకు రుణాలు ఇస్తుంటుంది. అందుకు ఏం చేయాలో ఇప్పుడు మనం తెలుసుకుందాం.

ముందుగా అర్హత ఉందో లేదో తెలుసుకోవాలి. అందుకోసం ఐసీఐసీఐ బ్యాంక్ పర్సనల్ లోన్ హోమ్ పేజీలోకి వెళ్లి చెక్ చేయాలి. వయసు, నెలవారీ ఆదాయం, తిరిగి చెల్లింపు సామర్థ్యం, క్రెడిట్ హిస్టరీ, క్రెడిట్ స్కోర్ వంటి అంశాలన్నీ దీని పరిధిలోకి వస్తాయి. మీకు అర్హత ఉందని చెక్ చేసుకున్న తర్వాత మీ లోన్ అప్లికేషన్ ప్రకారం నెలవారీగా EMI ఎంత పడుతుందో చూసుకోవాలి. పర్సనల్ లోన్ ఈఎంఐ కాలిక్యులేటర్ ఉపయోగించుకోవచ్చు. ఆ తర్వాత అప్లికేషన్ ఫారం నింపి సబ్మిట్ చేయాల్సి ఉంటుంది. అందుకు ఆన్‌లైన్ ద్వారా మీ లోన్ వివరాలు, ఆర్థిక వివరాలన్నీ అందించాలి. బ్యాంకు అడిగిన పూర్తి వివరాలు ఇవ్వాలి.

గుర్తింపు కోసం ఆధార్ కార్డ్, ఫాన్ కార్డు, డ్రైవింగ్ లైసెన్స్, అడ్రస్ ప్రూఫ్, ఆదాయపు ధ్రువీకరణ పత్రం, శాలరీ స్లిప్స్, చివరి 3 నెలల బ్యాంక్ స్టేట్మెంట్ వంటి వివరాలన్నీ ఇవ్వాలి. మీరు అప్లికేషన్ ప్రాసెస్ పూర్తి చేసిన తర్వాత ఐసీఐసీఐ బ్యాంక్ మీ అప్లికేషన్, డాక్యుమెంట్లను వెరిఫై చేస్తుంది. అన్ని సరిగ్గా ఉండే మీకు లోన్ మంజూరు చేస్తారు. ఒకసారి దరఖాస్తు అంగీకరిస్తే రూ.50 వేల నుంచి రూ.50 లక్షల వరకు లోన్ ఇస్తారు. 72 గంటల లోపు మీ ఖాతాలో జమ చేస్తారు. దీనిపై వడ్డీ రేటు 10.85 శాతం నుంచి మొదలవుతుంది. అయితే ఇది మీ క్రెడిట్ స్కోర్, లోన్ చెల్లించే సామర్థ్యంపై ఆధారపడి ఉంటుంది.