by Suryaa Desk | Sun, May 25, 2025, 06:26 PM

పాప వాంతి చేసుకుంటుందని బస్సును రోడ్డు పక్కన ఆపాడు డ్రైవర్. కానీ.. బస్సు ఆగి ఉన్న విషయాన్ని ఆ లారీ డ్రైవర్ గమనించలేదు. క్షణాల్లో ఊహించని ప్రమాదం దూసుకొచ్చింది. కళ్ల ముందే ఘోరం జరిగిపోయింది. అతివేగంగా దూసుకొచ్చిన ఓ కంటైనర్ లారీ.. బస్సును వెనక నుంచి బలంగా ఢీకొట్టింది. ఈ ప్రమాదంలో ఒక ప్రయాణికుడు అక్కడికక్కడే మృతి చెందగా, పది మందికి పైగా ప్రయాణికులు తీవ్రంగా గాయపడ్డారు. ఈ ఘటన నెల్లూరు జిల్లా కొడవలూరు మండలం గండవరం జాతీయ రహదారిపై తెల్లవారుజామున జరిగింది.పోలీసులు తెలిపిన వివరాల ప్రకారం.. ఎస్ఆర్ ట్రావెల్స్ బస్సు విజయవాడ నుంచి 40 మంది ప్రయాణికులతో నాగూర్, నాగపట్నం టూర్‌కు వెళ్తోంది. గండవరం జాతీయ రహదారిపై వెళ్తున్న సమయంలో.. ప్రయాణికుల్లో ఒక చిన్నారి వాంతి చేసుకుంటుండటంతో.. బస్సును రోడ్డు పక్కకు ఆపాడు డ్రైవర్. దీంతో కొంత మంది ప్రయాణికులు బస్సు దిగారు. అదే సమయంలో.. చీమకుర్తి నుంచి చెన్నై పోర్టుకు వెళ్తున్న ఒక కంటైనర్ లారీ వేగంగా వచ్చి.. ఆగి ఉన్న బస్సును బలంగా ఢీకొట్టింది.ఈ ప్రమాదంలో బస్సు దిగి వెనుక వైపు నిలబడి ఉన్న సిరింగి బాబురావు (50) అనే వ్యక్తి లారీ ఢీకొనడంతో.. తీవ్రంగా గాయపడి అక్కడికక్కడే ప్రాణాలు కోల్పోయారు. బస్సులో ఉన్న సుమారు 10 మంది ప్రయాణికులకు తీవ్ర గాయాలయ్యాయి.ప్రమాదం జరిగిన వెంటనే.. అటుగా వెళ్తున్న వాహనదారులు సహాయక చర్యలు చేపట్టారు. గాయపడిన వారిని వెంటనే అంబులెన్స్‌లో నెల్లూరు ప్రభుత్వ ఆసుపత్రికి తరలించి.. పోలీసులకు సమాచారం అందించారు. సమాచారం అందుకున్న వెంటనే.. హుటాహుటిన ఘటనా స్థలానికి చేరుకున్నారు. డీఎస్పీ ఘట్టమనేని శ్రీనివాసరావు, కొడవలూరు సీఐ సురేంద్రబాబు కూడా సంఘటనా స్థలానికి చేరుకుని సహాయక చర్యలను పర్యవేక్షించారు. కేసు నమోదు చేసుకున్న పోలీసులు దర్యాప్తు చేస్తున్నారు. ప్రమాదానికి కారణమైన లారీ డ్రైవర్ పారిపోవటంతో.. అతని కోసం గాలిస్తున్నారు.