by Suryaa Desk | Sat, May 24, 2025, 09:02 PM

బంగ్లాదేశ్‌ తాత్కాలిక ప్రభుత్వ అధినేతగా బాధ్యతలు నిర్వహిస్తున్న మహమ్మద్ యూనస్‌ తన పదవికి రాజీనామా చేయనున్నారంటూ వస్తున్న వార్తలపై ఆయన మంత్రివర్గ సలహాదారు వహీదుద్దీన్ మహమూద్ స్పష్టత ఇచ్చారు. ఆ వార్తలన్నీ కేవలం అసత్య ప్రచారాలని ఆయన కొట్టిపారేశారు. యూనస్‌ తన పదవిలో కొనసాగుతారని, అప్పగించిన బాధ్యతల నుంచి తప్పుకోరని ఆయన తేల్చిచెప్పారు.మహమ్మద్ యూనస్‌ దాదాపు 19 మంది సలహాదారులు, మంత్రులు, ఇతర ఉన్నతాధికారులతో అత్యవసరంగా సమావేశమయ్యారు.ఈ సమావేశం అనంతరం వహీదుద్దీన్ మహమూద్ మీడియాతో మాట్లాడుతూ, "దేశంలో ప్రస్తుతం నెలకొన్న ఉద్రిక్త పరిస్థితులకు భయపడి యూనస్‌ రాజీనామా చేస్తానని చెప్పినట్లు వస్తున్న వార్తల్లో నిజం లేదు. ప్రభుత్వానికి అప్పగించిన బాధ్యతలను నిర్వర్తించడంలో అనేక సవాళ్లు ఎదురవుతున్నప్పటికీ, వాటన్నింటినీ అధిగమించేందుకు మేం ప్రయత్నిస్తున్నాం" అని వివరించారు.తమ తాత్కాలిక ప్రభుత్వానికి అప్పగించిన బాధ్యత చాలా కీలకమైనదని, దానిని మధ్యలోనే వదిలిపెట్టే ప్రసక్తే లేదని ఆయన అన్నారు. ప్రభుత్వ సలహాదారులు కూడా ఎక్కడికీ వెళ్లడం లేదని, అందరూ తమ విధుల్లో కొనసాగుతున్నారని స్పష్టం చేశారు. దేశ భద్రత, భవిష్యత్తును దృష్టిలో ఉంచుకుని ప్రజల ఆకాంక్షలను నెరవేర్చడానికి ప్రభుత్వానికి అధికారులందరూ సహకరించాలని ఈ చర్చల్లో యూనస్‌ కోరినట్లు వహీదుద్దీన్ తెలిపారు.కాగా, శుక్రవారం నేషనల్‌ సిటిజన్‌ పార్టీ  అధినేత నహిద్‌ ఇస్లామ్‌, యూనస్‌ రాజీనామా గురించి ఒక మీడియాతో మాట్లాడుతూ కొన్ని కీలక వ్యాఖ్యలు చేశారు. "యూనస్‌ రాజీనామా చేయబోతున్నట్లు నేను విన్నాను. ఈ విషయంపై చర్చించేందుకు ఆయన్ను కలిశాను. తాను రాజీనామా గురించే ఆలోచిస్తున్నానని యూనస్‌ నాతో చెప్పారు. దేశంలోని రాజకీయ పార్టీలన్నీ ఐక్యంగా లేకపోతే తాను పనిచేయలేనని ఆయన వెల్లడించారు" అని నహిద్ ఇస్లామ్ పేర్కొన్నారు.దేశ భద్రత, భవిష్యత్తు కోసం బలంగా ఉండాలని తాను యూనస్‌కు సూచించానని, పార్టీలన్నీ ఐక్యంగా ఉండి ఆయనకు సహకరిస్తాయని ఆశిస్తున్నానని తెలిపారు. పార్టీలకు ఆయనపై విశ్వసనీయత లేనప్పుడు యూనస్‌ పదవిలో ఎలా కొనసాగుతారని నహిద్‌ ప్రశ్నించారు. ఈ వ్యాఖ్యలతో యూనస్‌ రాజీనామా చేయనున్నారనే వార్తలు మరింత ఊపందుకున్నాయి. అయితే, తాజా పరిణామాల నేపథ్యంలో యూనస్‌ సలహాదారు వహీదుద్దీన్ మహమూద్ చేసిన ప్రకటనతో ఈ ఊహాగానాలకు తెరపడినట్లయింది.