by Suryaa Desk | Fri, May 23, 2025, 07:46 PM

కొన్నిసార్లు తెలిసీ తెలియక చేసే పొరపాట్లు ప్రాణాలు తీసుకునే వరకు వెళ్తాయి. నిజం పూర్తిగా తెలియక.. విధించే శిక్షలతో బాధితులు తీవ్ర అవమాన భారానికి గురై ప్రాణాలు తీసుకున్న సంఘటనలు మనం ఎన్నో చూశాం. ఇది కూడా అలాంటిదే. ఒక కిరాణా దుకాణంలో.. చిప్స్ ప్యాకెట్ దొంగిలించాడని.. ఆ దుకాణదారుడు ఒక 12 ఏళ్ల బాలుడిపై ఆరోపణలు చేశాడు. అంతేకాకుండా ఆ బాలుడిని చెంప దెబ్బ కొట్టిన షాప్ యజమాని.. అక్కడ ఉన్న వారి ముందు గుంజీలు తీయించాడు. అయితే తాను చేయని తప్పుకు అందరి ముందు అలా చేయించడంతో ఆ బాలుడు తీవ్ర మనస్తాపానికి గురయ్యాడు. దీంతో ఆ బాలుడు ఇంటికి అవమాన భారం తట్టుకోలేక ఇంటికి వెళ్లి బలవన్మరణానికి పాల్పడ్డాడు. అయితే చనిపోవడానికి ముందు సూసైడ్ లేఖ రాసిన ఆ బాలుడు.. తాను ఏ తప్పూ చేయలేదని తేల్చి చెప్పాడు.

పశ్చిమ బెంగాల్‌లోని పశ్చిమ మెదినీపూర్ జిల్లా పాన్‌స్కురాలో ఈ హృదయ విదారక ఘటన చోటు చేసుకుంది. 12 ఏళ్ల బాలుడు క్రిష్ణు దాస్ తన దుకాణంలో చిప్స్ ప్యాకెట్ దొంగిలించాడని ఆరోపిస్తూ.. షాప్ ఓనర్ సుభంకర్ దీక్షిత్.. అందరిముందు చెంపదెబ్బ కొట్టి, గుంజీలు తీయించడంతో క్రిష్ణు దాస్ అవమానం భరించలేక పురుగుల మందు తాగి ఆత్మహత్య చేసుకున్నాడని అతడి కుటుంబ సభ్యులు పోలీసులకు ఫిర్యాదు చేశారు. 7వ తరగతి చదువుతున్న క్రిష్ణు దాస్.. గురువారం సాయంత్రం పాన్‌స్కురా ప్రాంతంలోని గోసైబర్ బజార్‌లో ఉన్న తన దుకాణంలో చిప్స్ ప్యాకెట్ తీసుకున్నాడని సుభంకర్ దీక్షిత్ ఆరోపించాడు. అంకుల్, అంకుల్.. చిప్స్ కొంటానని పదే పదే పిలిచినా ఎలాంటి స్పందన రాలేదని.. చివరకు ఒక చిప్స్ ప్యాకెట్‌తో దుకాణం నుంచి క్రిష్ణు దాస్ బయలుదేరినట్లు ఆ బాలుడి తల్లి విలపిస్తూ చెప్పిందని పోలీసులు తెలిపారు.

అయితే ఆ తర్వాత కొద్దిసేపటికే.. దుకాణానికి తిరిగి వచ్చిన సుభంకర్ దీక్షిత్.. ఆ బాలుడిని అడ్డుకుని.. అందరి ముందే చెంపదెబ్బ కొట్టి.. గుంజీలు తీయాలని ఆదేశించినట్లు కుటుంబ సభ్యులు పేర్కొన్నారు. కానీ బాలుడు మాత్రం.. షాప్ ముందు పడి ఉన్న చిప్స్ ప్యాకెట్‌ను తీసుకున్నాడని.. ఆ డబ్బులు కూడా తర్వాత వచ్చి చెల్లిద్దామని అనుకున్నాడని కుటుంబ సభ్యులు వెల్లడించారు. అయితే చిప్స్ ప్యాకెట్ తీసుకువెళ్తుంటే షాప్ ఓనర్ సుభంకర్ దీక్షిత్ చూశాడని.. తనను అడగకుండా, డబ్బులు చెల్లించకుండా వెళ్తున్నందుకు కొట్టినట్లు తెలిపారు. అయితే డబ్బులు చెల్లిస్తానని ఆ బాలుడు వెంటనే చెప్పినా.. అబద్ధం చెబుతున్నాడని ఆ షాప్ ఓనర్ తిట్టాడని పేర్కొన్నారు.

దీంతో తీవ్ర మనస్తాపం చెందిన క్రిష్ణు దాస్.. తన తల్లితో కలిసి ఇంటికి తిరిగి వచ్చి రూమ్‌లోకి వెళ్లి లాక్ చేసుకున్నాడు. తన కుమారుడు ఎంతకూ బయటికి రాకపోవడంతో తీవ్ర భయాందోళనకు గురైన అతని తల్లి.. ఇరుగు పొరుగువారితో కలిసి తలుపులు బద్దలు కొట్టి చూడగా.. క్రిష్ణు దాస్ నోటి నుంచి నురుగు రావడం గమనించారు. ఆ పక్కనే సగం ఖాళీ అయిన పురుగుల మందు డబ్బాను గుర్తించారు. అక్కడే ఒక సూసైడ్ లెటర్ కూడా గుర్తించగా.. దాన్ని పోలీసులు స్వాధీనం చేసుకున్నారు.

"అమ్మా, నేను దొంగను కాదు. నేను చిప్స్ ప్యాకెట్ దొంగిలించలేదు. నేను అంకుల్ (షాప్ ఓనర్) కోసం వేచి ఉన్నా కానీ ఆయన అక్కడ కనిపించలేదు. తిరిగి వస్తున్నప్పుడు ఒక చిప్స్ ప్యాకెట్ రోడ్డుపై పడి ఉండటం చూసి తీసుకున్నాను. నాకు ఆ చిప్స్ అంటే చాలా ఇష్టం. "ఇవి నేను వెళ్లే ముందు నా చివరి మాటలు. నేను పురుగుల మందు తాగినందుకు నన్ను దయచేసి క్షమించండి" అని క్రిష్ణు దాస్ చివరిగా రాశాడు.

క్రిష్ణు దాస్ సూసైడ్ నోట్‌

"అమ్మా, నేను దొంగను కాదు. నేను చిప్స్ ప్యాకెట్ దొంగిలించలేదు. నేను అంకుల్ (షాప్ ఓనర్) కోసం వేచి ఉన్నా కానీ ఆయన అక్కడ కనిపించలేదు. తిరిగి వస్తున్నప్పుడు ఒక చిప్స్ ప్యాకెట్ రోడ్డుపై పడి ఉండటం చూసి తీసుకున్నాను. నాకు ఆ చిప్స్ అంటే చాలా ఇష్టం. "ఇవి నేను వెళ్లే ముందు నా చివరి మాటలు. నేను పురుగుల మందు తాగినందుకు నన్ను దయచేసి క్షమించండి" అని క్రిష్ణు దాస్ చివరిగా రాశాడు.

అయితే పురుగుల మందు తాగిన క్రిష్ణు దాస్‌ను కుటుంబ సభ్యులు.. వెంటనే తమ్లుక్ ఆస్పత్రికి తీసుకెళ్లగా పరిస్థితి విషమించడంతో ఐసీయూలో చేర్పించి చికిత్స అందించారు. కానీ చివరికి ప్రాణాలు దక్కలేదు. ఈ ఘటనతో ఆ షాప్ యజమాని సుభంకర్ దీక్షిత్ అక్కడి నుంచి పరారయ్యాడు. దీంతో కుటుంబ సభ్యులు పోలీసులకు ఫిర్యాదు చేయగా.. కేసు నమోదు చేసుకుని దర్యాప్తు చేస్తున్నారు.