by Suryaa Desk | Fri, May 23, 2025, 01:38 PM

ఆంధ్రప్రదేశ్‌లో సంచలనం రేపిన లిక్కర్ స్కాం కేసులో ప్రధాన నిందితుడు రాజ్ కెసిరెడ్డికి సుప్రీంకోర్టులో ఊహించని ఎదురుదెబ్బ తగిలింది. రాజ్ కెసిరెడ్డి మరియు ఆయన తండ్రి కెసిరెడ్డి ఉపేంద్రరెడ్డి దాఖలు చేసిన పిటిషన్లను అత్యున్నత న్యాయస్థానం కొట్టివేసింది.
ఇప్పటికే కస్టడీలో ఉన్న నేపథ్యంలో, బెయిల్ కోసం సంబంధిత కోర్టును ఆశ్రయించాలని సుప్రీంకోర్టు సూచించింది. ఈ మేరకు వారు న్యాయ ప్రక్రియలను అనుసరించాల్సిందిగా పేర్కొంది.
కాగా, రాజ్ కెసిరెడ్డిని అరెస్టు చేసిన విధానం నిబంధనలకు విరుద్ధంగా ఉందని ఆరోపిస్తూ ఉపేంద్రరెడ్డి సుప్రీంకోర్టును ఆశ్రయించారు. తన కుమారుడి అరెస్టు సమయంలో నిబంధనలు పాటించలేదన్న అభియోగాలపై కోర్టు స్పష్టంగా స్పందించకుండా, మొత్తం పిటిషన్లను తిరస్కరించింది. ఈ నేపథ్యంలో, కేసు తదుపరి ప్రక్రియపై దృష్టి సారించినట్లుగా న్యాయ వర్గాలు పేర్కొంటున్నాయి.