by Suryaa Desk | Wed, May 21, 2025, 11:35 PM

నీళ్లు తాగడం ఆరోగ్యానికి చాలా మంచిది. రోజుకి కనీసం 2 నుంచి మూడు లీటర్ల నీళ్లు తాగాలి. శరీరంలో తగిన మోతాదులో వాటర్ కంటెంట్ లేకపోతే చాలా సమస్యలు వస్తాయి. ముఖ్యంగా కిడ్నీలో రాళ్లు వస్తాయి. మూత్రంలో మంట, యూరిన్ పాస్ చేసినప్పుడు నొప్పి లాంటి లక్షణాలు కనిపిస్తాయి. అయితే..రోజూ నీళ్లు తాగడం ముఖ్యమే. కానీ..ఎలాంటి నీళ్లు తాగుతున్నారన్న దానిపైనే మీ ఆరోగ్యం ఆధారపడి ఉంటుంది. చాలా మంది మామూలు వేడిగా ఉన్నా సరే అలాంటి నీళ్లు తాగరు. చిల్డ్ వాటర్ మాత్రమే తాగుతుంటారు. లేదంటే మామూలు నీళ్లలో ఐస్ వేసుకుని తాగుతారు. చాలా మందికి ఇదో అలవాటు.

ఇలా రెగ్యులర్ గా చల్లనీళ్లు తాగడం వల్ల గొంతు పట్టేస్తుంది. తరచూ జలుబు, దగ్గు లాంటివి వస్తాయి. అయితే..దీంతో పాటు మరో సమస్య కూడా వస్తుందని కొంత మంది చెబుతుంటారు. చల్ల నీళ్లు తాగితే బరువు పెరుగుతారనీ అంటారు. అయితే..దీనిపై క్లారిటీ ఇచ్చారు ఫిట్ నెస్ కోచ్ ప్రియాంక మెహతా. రోజూ చల్ల నీళ్లు తాగితే బరువు పెరుగుతార్నది నిజమా కాదా అన్నది వివరించారు. కోల్డ్ వాటర్ వల్ల శరీరంలో ఎలాంటి మార్పులు జరుగుతాయో క్లియర్ గా చెప్పారు.

చల్లనీళ్లు తాగకూడదా

సాధారణంగా మన శరీరంలో వేడి ఉంటుంది. ఇదే బాడీని రెగ్యులేట్ చేస్తూ ఉంటుంది. అంటే..మనం తినే ఆహారం జీర్ణం కావాలంటే ఈ ఉష్ణోగ్రతే ముఖ్యం. కాస్త సైంటిఫిక్ గా చెప్పాలంటే థర్మోజెనసిస్ అనే ప్రాసెస్ గురించి వివరించాలి. ఇది మన శరీరంలో హీట్ ని ప్రొడ్యూస్ చేస్తుంది. ఇది చాలా సహజందా జరిగే ప్రక్రియ. అసలు బాడీలో ఉన్న ఈ హీట్ ఎలా పని చేస్తుంది. ఇది ఎందుకు అవసరం అంటే..బాడీ టెంపరేచర్ ని మెయింటేన్ చేయడానికి ఈ ఉష్ణోగ్రత తప్పనిసరి. ఉదాహరణకు విపరీతంగా చలి ఉన్నప్పుడు లోపల ఎంతో కొంత వేడి ఉంటుంది. అలా బ్యాలెన్స్ అయిపోతుంది.

వ్యాయామం చేసినప్పుడు

ఎక్కువ సమయం వ్యాయామం చేసినప్పుడు శరీరమంతా చెమటలు పడతాయి. ఆ సమయంలో బాడీ హీట్ ని జనరేట్ చేస్తుంది. అలా వేడి విడుదలైనప్పుడే క్యాలరీలు కరిగి పోతాయి. అంటే మనం బరువు తగ్గి ఫిట్ గా ఉండాలన్నా శరీరంలో ఉష్ణోగ్రత తప్పనిసరిగా ఉండాల్సిందే. అన్నింటి కన్నా ముఖ్యమైన విషయం ఏంటంటే.. మనం తిన్న ఆహారం జీర్ణం కావాలంటే ఈ హీట్ అవసరం. ఈ హీట్ కారణంగానే పొట్టలో డైజెస్టివ్ ఎంజైమ్స్ విడుదలై తిన్నది అరుగుతుంది. మొత్తంగా ఈ ప్రాసెస్ ని థర్మోజెనసిస్ అంటారు. మరి దీనికి కోల్డ్ వాటర్ కి లింక్ ఏంటనేది చూద్దాం.

చన్నీళ్లు తాగితే ఏమవుతుంది

​నీళ్లు తాగినప్పుడు మన శరీరంలో కొన్ని మార్పులు జరుగుతాయి. చన్నీళ్లు తాగిన వెంటనే లోపలి ఉష్ణోగ్రత తగ్గిపోతుంది. ఆ సమయంలో బాడీ వెంటనే హీట్ ని ప్రొడ్యూస్ చేస్తుంది. ఆ విధంగా బాడీ టెంపరేచర్ ని బ్యాలెన్స్ చేస్తుంది. ఇలా జరిగినప్పుడే శరీరంలో ఉన్న కేలరీలు కరిగిపోతాయి. సింపుల్ గా చెప్పాలంటే కేలరీలు కరిగిపోవడానికి చన్నీళ్లు తోడ్పడతాయి. అంటే..చన్నీళ్లు తాగితే బరువు పెరుగుతారన్నది కేవలం ఓ అపోహ మాత్రమే అని క్లారిటీ ఇచ్చారు ఫిట్ నెస్ కోచ్ ప్రియాంక మెహతా.

బరువు ఎందుకు పెరగరు

నిజానికి చన్నీళ్లు తాగడం వల్ల బరువు పెరుగుతారన్న వాదనకు ఓ రీజన్ ఉంది. కోల్డ్ వాటర్ తీసుకుంటే పొట్టలో ఆహారాన్ని జీర్ణం చేసేందుకు అవసరమైన యాసిడ్స్ చల్లారిపోతాయని అంటారు. ఈ కారణంగా జీర్ణ ప్రక్రియ నెమ్మదిస్తుంది. అయితే..ప్రియాంక మెహతా మాత్రం అలా జరగడానికి అవకాశం ఉండదని చెబుతున్నారు. ఎందుకంటే..మన గట్ ఈ టెంపరేచర్ ని సహజంగానే బ్యాలెన్స్ చేసుకుంటుందని వివరించారు. ఎలాంటి ఉష్ణోగ్రతనైనా పొట్ట అడ్జస్ట్ చేసుకుంటుంది. దీంతో పాటు కడుపు ఉబ్బరంగా అనిపిస్తుందని, దీని కారణంగా రకరకాల సమస్యలు వచ్చి బరువు పెరుగుతారనీ అంటారు. అయితే..దీనికి, బరువు పెరగడానికి ఎలాంటి లింక్ లేదని ప్రియాంక మెహతా క్లారిటీ ఇచ్చారు.

నీళ్లతోనే వెయిట్ లాస్

ఎక్కువ మొత్తంలో నీళ్లు తీసుకోవడం వల్ల త్వరగా బరువు తగ్గేందుకు అవకాశముంటుంది. చన్నీళ్లు తాగినా వెయిట్ లాస్ అవుతారు. నీళ్లు ఎక్కువగా తీసుకున్నప్పుడు మెటబాలిక్ రేట్ పెరుగుతుంది. ఫలితంగా..కేలరీ ఇన్ టేక్ తగ్గిపోతుంది. అయితే చన్నీళ్లు తాగినప్పుడు కొందరిలో కడుపు ఉబ్బిపోయినట్టు అనిపిస్తుంది. దాన్నే చాలా మంది పొట్ట వస్తున్నట్టుగా భావించి, బరువు పెరుగుతున్నామని అనుకుంటారు. అంతే తప్ప చన్నీళ్లు తాగినంత మాత్రాన బరువు పెరుగుతారనడంలో ఎలాంటి నిజం లేదు అన్నది ఫిట్ నెస్ కోచ్ తేల్చి చెప్పిన విషయం.