by Suryaa Desk | Wed, May 21, 2025, 07:54 PM

ముంబై వాంఖడే స్టేడియం ఈ రోజు రోహిత్ శర్మ నినాదాలతో దద్దరిల్లడం గ్యారెంటీ. టెస్టు క్రికెట్‌కు రిటైర్మెంట్ ప్రకటించిన తర్వాత ఐపీఎల్‌లో రోహిత్ శర్మ ఆడే ఫస్ట్ మ్యాచ్ ఇదే. దానికి తోడు వాంఖడే స్టేడియంలో రోహిత్ పేరు ప్రత్యేకంగా ఒక స్టాండ్ కూడా నిర్మించడంతో ఫ్యాన్స్ హిట్‌మ్యాన్ ట్రిబ్యూట్‌కి గట్టిగానే ప్లాన్ చేశారు.

ముంబై కి రాజు రోహిత్ శర్మ అంటూ టీ షర్ట్‌లతో ముంబై ఇండియన్స్ ఫ్యాన్స్ హడావుడి చేసేందుకు సిద్ధమయ్యారు. హిట్‌మ్యాన్ మాస్క్‌లతో పాటు టీ షర్ట్‌లు కూడా వాంఖడే స్టేడియం వద్ద సిద్ధంగా ఉన్నాయి. రోహిత్ శర్మ గ్రౌండ్‌లోకి రాగానే పెద్ద ఎత్తున సెలబ్రేషన్స్ చేసేందుకు ఫ్యాన్స్ ప్లాన్ చేశారు.

ముంబై వాంఖడే వేదికగా ఈ రోజు ముంబై ఇండియన్స్ - ఢిల్లీ క్యాపిటల్స్ మధ్య రసవత్తర పోరు జరగనుంది. ఈ మ్యాచ్‌ అటు ముంబై, ఇటు ఢిల్లీకి కీలకంగా మారనుంది. ప్లే ఆఫ్స్‌లో ఏ జట్టు అడుగుపెట్టబోతోందో ఈ మ్యాచ్‌తో తేలనుంది. ముంబై ఇండియన్స్ గెలిస్తే డైరెక్ట్‌గా ప్లే ఆఫ్స్‌లో అడుగుపెట్టనుండగా, ఢిల్లీ క్యాపిటల్స్ గెలిస్తే మరో మ్యాచ్ కోసం ఎదురుచూడాల్సి వస్తుంది.

ఈ మ్యాచ్‌లో టాస్ గెలిచిన ఢిల్లీ క్యాపిటల్స్ కెప్టెన్ ఫాఫ్ డుప్లెసిస్ బౌలింగ్ ఎంచుకున్నాడు. ఢిల్లీ కెప్టెన్ అక్షర్ పటేల్ అనారోగ్యంతో ఈ మ్యాచ్‌కి దూరమయ్యాడు. ఆఖరి క్షణంలో ఫాఫ్ డుప్లెసిస్‌కు ఢిల్లీ మేనేజ్‌మెంట్ కెప్టెన్సీ బాధ్యతలు అప్పగించారు.

ముంబై ఇండియన్స్ జట్టు

ర్యాన్ రికెల్టన్, రోహిత్ శర్మ, విల్ జాక్స్, సూర్యకుమార్ యాదవ్, తిలక్ వర్మ, హార్దిక్ పాండ్యా (కెప్టెన్), నమన్ ధీర్, మిచెల్ శాన్‌ట్నర్, దీపక్ చాహర్, ట్రెంట్ బౌల్ట్, జస్ప్రిత్ బుమ్రా.

ఢిల్లీ క్యాపిటల్స్ జట్టు

ఫాఫ్ డుప్లెసిస్ (కెప్టెన్), అభిషేక్ పోరెల్, సమీర్ రిజ్వి, అశుతోష్ శర్మ, ట్రిస్టన్ స్టబ్స్, దుష్మంత్ చమీరా, విప్‌రాజ్ నిగమ్, మాధవ్ తివారి, కుల్దీప్ యాదవ్, ముస్తాఫిజుర్ రెహ్మాన్, ముకేశ్ కుమార్.