by Suryaa Desk | Sat, May 17, 2025, 08:47 PM

పహల్గాం ఉగ్రదాడికి ప్రతీకారంగా భారత్.. పాకిస్థాన్‌పై ఆపరేషన్ సిందూర్‌తో విరుచుకుపడింది. 9 ఉగ్రస్థావరాలను ధ్వంసం చేసింది. భారత్ చర్యలకు బదులుగా పాకిస్థాన్ దాడులు ప్రారంభించగా.. ఇండియా వాటిని సమర్థవంతంగా తిప్పికొట్టింది. పాకిస్థాన్ దేశానికి ప్రధానమైన వైమానిక స్థావరాలపై దాడి చేసి వాటిని నాశనం చేసింది. కాల్పుల విరమణ ఒప్పందంతో ప్రస్తుతం ఇరు దేశాల మధ్య ఉద్రిక్తతలు తగ్గుముఖం పడుతున్నాయి. అంతేకాక ఇప్పుడు అనేక సంచలన వాస్తవాలు వెలుగులోకి వస్తున్నాయి. ఈక్రమంలో తాజాగా పాకిస్థాన్ ప్రధాని నవాజ్ షరీష్ నిజాన్ని అంగీకరించారు. ఆ వివరాలు..

కాల్పుల విరమణ ఒప్పదం తర్వాత.. పాకిస్థాన్ తానేదో గెలిచినట్లు ఫీలవుతూ సంబరాలు చేసుకుంది.. పైగా భారత్‌పై తామే పైచేయి సాధించామని.. తమకు ఏమాత్రం నష్టం జరగలేదని.. బీరాలు పలుకుతూ వచ్చింది. కానీ ఇప్పుడు పాక్ ప్రధాని అసలు వాస్తవాలు వెల్లడించారు. ఇప్పటి వరకు భారత్‌ దాడుల వల్ల తమకు ఎలాంటి నష్టం జరగలేదని గొప్పలు చెప్పుకుంటూ వస్తోన్న పాకిస్తాన్ ప్రధాని షాబాజ్‌ షరీఫ్ తాజాగా అసలు నిజం బయటపెట్టారు.

తాజాగా షరీఫ్ ఓ సభలో మాట్లాడుతూ.. మే 10, అర్థరాత్రి 2:30 గంటల సమయంలో జనరల్ మునీర్ నాకు ఫోన్ చేసి భారత్ బాలిస్టిక్ మిస్సైల్ ప్రయోగించిందని చెప్పారు. నూర్‌ ఖాన్‌ ఎయిర్ బేస్‌తోపాటు ఇతర ప్రాంతాలు దాడికి గురయ్యారన్నారు. అప్పుడే నాకు అర్థమైంది ఆపరేషన్‌ సింధూర్‌ ఏ స్థాయికి చేరిందని.. అప్పుడు మన ఎయిర్ ఫోర్స్ కూడా భారత్ దాడులకు ధీటుగా బదులిచ్చిందని చెప్పుకొచ్చారు. పాకిస్థాన్ వాయుసేన స్థానిక సాంకేతికత సాయంతో తయారు చేసిన జెట్లను, అలానే పాకిస్థాన్ జెట్లను వినియోగించిందని షరీఫ్ తెలిపారు. అయితే భారత్ మిస్సైల్స్ వాటి లక్ష్యాన్ని చేధించాయని ప్రకటించారు.

స్వయంగా పాకిస్తాన్ ప్రధాని ఈ విషయాన్ని సైన్యానికి చెందిన ఉన్నతాధికారులు, ఇతర ప్రభుత్వ అధికారుల మధ్యన అంగీకరించిన వీడియో ప్రస్తుతం నెట్టింటా వైరల్ అవుతూ ఉంది. భారత్ బాలిస్టిక్ క్షిపణుల వల్ల నూర్ ఖాన్ వైమానిక స్థావరం ధ్వంసం అయింది. పాకిస్తాన్‌లోని ఇతర ప్రాంతాల్లో కూడా దాడి చేసింది భారత్‌.

అయితే అంతకుముందు పాకిస్తాన్ ప్రధాని తన దేశ ప్రజలను ఉద్దేశించి ప్రసంగిస్తూ తాము విజయం సాధించామని ప్రకటించుకున్నారు. అంతేకాక సంబరాలు కూడా చేసుకున్నారు. ఇప్పుడేమో ఇలా భారత్ దాడి గురించి అంగీకరించడం గమనార్హం. దీనిపై నెటిజనులు రకరకాలుగా కామెంట్స్ చేస్తున్నారు.