by Suryaa Desk | Sat, May 17, 2025, 08:46 PM

మనమే తెలివిగలవాళ్లం అనే అతి విశ్వాసం కలిగి ఉండటం చాలా తప్పు. మనకున్న చావు తెలివితేటలతో కొన్ని రోజుల పాటు మోసం చేయగలం కానీ జీవితాంతం కాదు. పైగా నిజం తెలిసిన రోజున.. మన చుట్టూ ఉన్న వాళ్లే చీదరించుకుంటారు. అప్పటివరకు ఆహా.. ఓహో అని పొగిడిన వారే.. అసహ్యించుకుంటారు. ఇప్పుడు మనం చెప్పుకోబోయే క్రీడాకారిణి కూడా ఇలానే అతి తెలివిగా ఆలోచించి.. కొన్నాళ్ల పాటు ఏకంగా ప్రపంచాన్ని బురిడి కొట్టించింది. కానీ నిజం నిప్పులాంటిది కదా.. ఏదో ఓ రోజు బయటకు రావాల్సిందే. క్రీడాకారిణి విషయంలో కూడా ఇదే జరిగింది. ఆమె నాటకాలు బట్టబయలు కావడంతో.. జీవిత కాలం నిషేధం విధిస్తూ నిర్ణయం తీసుకున్నారు. ఆ వివరాలు..

ఒక శాతం కూడా దృష్టిలోపం లేకపోయినా సరే... నకిలీ అంధత్వ సర్టిఫికెట్‌తో.. ఇన్నాళ్ల పాటు ప్రపంచాన్ని గుడ్డిగా నమ్మించి.. బంగారు పతకాలు గెలిచిన అజర్‌బైజాన్ క్రీడాకారిణి మోసం ఎట్టకేలకు బయటపడింది. దీంతో ఆమె మీద జీవితకాలం నిషేధం విధించారు. అజర్‌బైజాన్‌ జూడో క్రీడాకారిణి షహానా హాజియెవా (26) టోక్యో పారాలింపిక్స్‌లో దృష్టి లోపం ఉన్న జూడో క్రీడాకారిణిల విభాగంలో (48 కేజీలు) పోటీపడి బంగారు పతకం గెలుపొందింది. ఇన్నాళ్ల పాటు ఆమె దృష్టిలోపం ఉన్న క్రీడాకారిణిగా నటిస్తూ.. అందరిని నమ్మించింది. కానీ తాజాగా ఆమె నాటకం బయటపడింది.

ఈనెల(మే, 2025) కజకిస్తాన్‌లోని అస్తానాలో ప్రపంచ పారా జూడో చాంపియన్‌షిప్‌ జరిగింది. ఈ సందర్భంగా ఇన్నాళ్లు అంధురాలిగా నటించిన ఆమె నాటకం బట్టబయలు అయ్యింది. ఈవెంట్‌కు ముందుగా నిర్వహించిన అంధత్వ పరీక్షలో విస్తుపోయే వాస్తవం వెలుగులోకి వచ్చింది. షహానా హాజియెవాకు రెండు కళ్లు వందశాతం కనిపిస్తూనే ఉన్నాయని తేలింది. ఆమెకు ఎలాంటి దృష్టి లోపం, కనీసం పాక్షిక అంధత్వం కూడా లేదని పరీక్షల్లో తెలిసింది. దీంతో ప్రపంచ పారాలింపిక్‌ కమిటీ తీవ్ర ఆగ్రహం వ్యక్తం చేస్తూ ఆమెపై జీవితకాల నిషేధం విధించింది. అందరి కళ్లు గప్పిన ఆమె మోసం ఇప్పుడు బయటపడటంతో.. పారా క్రీడలు కాదు కదా అసలైన క్రీడల్లో కూడా పాల్గొనే అర్హతను పూర్తిగా కోల్పోయింది.

అలానే అజర్‌బైజాన్‌కే చెందిన మరో అథ్లెట్.. ఎల్నారా నిజామ్లికి పాక్షిక దృష్టి లోపం ఉంది. కానీ ఆమె పూర్తి అంధత్వంతో 'జే1' కేటగిరీలో పాల్గొనాలని భావించి.. ఆక్రమంలో మోసానికి పాల్పడింది. తాజాగా అది కూడా బయటపడింది. అయితే ఆమెకు 'జే2' కేటగిరీ (పాక్షిక అంధత్వం)లో పాల్గొనే అవకాశమిచ్చారు. అజర్‌బైజాన్‌ జాతీయ పారాలింపిక్‌ సంఘం తమ అథ్లెట్ల కపట నాటకంపై స్పందించింది. ఇద్దరిపై చర్యలు తీసుకుంటామని చెప్పింది.