by Suryaa Desk | Thu, May 15, 2025, 07:52 PM

ఇంగ్లండ్ గడ్డపై జరగబోయే కీలక టెస్ట్ సిరీస్ కోసం బీసీసీఐ ఇప్పటి నుంచే ప్రణాళికలు రచిస్తోంది. కొందరు ఆటగాళ్లను ముందుగానే ఇంగ్లండ్ కు పంపుతోంది. భారత జట్టు ప్రధాన కోచ్‌ గౌతమ్ గంభీర్, కొందరు ఆటగాళ్లతో కూడిన తొలి బృందం జూన్ 6వ తేదీన ఇంగ్లండ్‌కు బయలుదేరి వెళ్లనున్నట్లు తెలుస్తోంది. మిగిలిన ఆటగాళ్ల ప్రయాణం, ఐపీఎల్ 2025 షెడ్యూల్‌ను బట్టి ఖరారు కానుంది.భారత టెస్ట్ జట్టు సభ్యుల ఎంపిక ఇంకా జరగనప్పటికీ, ఆటగాళ్లు మరియు సహాయక సిబ్బంది ప్రయాణ షెడ్యూల్‌ను బీసీసీఐ ఖరారు చేసే పనిలో నిమగ్నమైంది. "ఐపీఎల్ లీగ్ దశ ముగిసిన వెంటనే అందుబాటులోకి వచ్చే ఆటగాళ్లు, ప్రధాన కోచ్ గౌతమ్ గంభీర్‌తో పాటు జూన్ 6న ఇంగ్లండ్‌కు పయనం కానున్నారు. మిగిలిన వారు ఐపీఎల్ కమిట్‌మెంట్స్ పూర్తయిన తర్వాత కొద్దిపాటి విరామం తీసుకుని బయలుదేరుతారు" అని ఓ సీనియర్ బీసీసీఐ అధికారి వెల్లడించారు.ప్రధానంగా టెస్ట్ జట్టు సన్నద్ధతపైనే గౌతమ్ గంభీర్ దృష్టి సారించనున్నారు. ప్రస్తుతం భారత జట్టు సహాయక సిబ్బందిలో చాలా మంది దేశంలో అందుబాటులో లేకపోవడంతో, వారు నేరుగా ఇంగ్లండ్‌లోనే జట్టుతో చేరే అవకాశాలు ఉన్నాయని సమాచారం. టెస్ట్ జట్టును అధికారికంగా ప్రకటించిన వెంటనే ఆటగాళ్లు, సహాయక సిబ్బందికి తుది ప్రయాణ వివరాలను తెలియజేయనున్నారు.మరోవైపు, ఇండియా 'ఏ' జట్టు కూడా ఇంగ్లండ్ పర్యటనకు వెళ్లనుంది. వీరి ప్రయాణం మే 25 నుంచి విడతల వారీగా ప్రారంభమవుతుంది. ఐపీఎల్‌లో భాగం కానివారు లేదా ప్లేఆఫ్స్‌కు అర్హత సాధించని జట్ల ఆటగాళ్లు తొలి బృందంతో కలిసి వెళతారు. మిగిలిన వారు తర్వాత జట్టుతో కలుస్తారు. వాస్తవానికి ఇండియా 'ఏ' జట్టును ఈ వారం మొదట్లోనే ప్రకటించాల్సి ఉన్నప్పటికీ, మారిన ఐపీఎల్ షెడ్యూల్ కారణంగా అజిత్ అగార్కర్ నేతృత్వంలోని సీనియర్ సెలక్షన్ కమిటీ తమ ప్రణాళికలను మార్చుకోవాల్సి వచ్చింది