by Suryaa Desk | Sat, Mar 16, 2024, 10:16 PM

విశాఖలో మసాజ్‌ సెంటర్‌లో యువతులతో అభ్యంతరకరమైన స్థితిలో సబ్‌ ఇన్‌స్పెక్టర్‌ ఒకరు పోలీసుల ఆకస్మిక దాడుల్లో దొరికిపోయారు. స్పాల ముసుగులో చట్టవ్యతిరేకమైన కార్యక్రమాలు, అసాంఘిక కార్యక్రమాలు జరుగుతున్నట్టు ఫిర్యాదులు అందడంతో సీపీ రవిశంకర్‌ అయ్యన్నార్‌ ఆకస్మిక సోదాలు నిర్వహించాలని సిబ్బందిని ఆదేశించారు. నగరంలోని 64 స్పా/మసాజ్‌ సెంటర్లలో 200 మంది పోలీసులు బృందాలుగా ఏర్పడి సోదాలు నిర్వహించారు. ఈ సందర్భంగా నాలుగు మసాజ్‌ సెంటర్లలో యువతులతో మగవారికి మసాజ్‌ చేయిస్తుండడం, అభ్యంతరకరమైన రీతిలో మరికొందరు కనిపించడంతో పోలీసులు ఆయా సెంటర్లపై కేసులు నమోదుచేశారు. ఏడుగురు పురుషులను అరెస్టు చేశారు.

ఈశాన్య రాష్ట్రాలకు చెందిన 17 మంది యువతులను స్వధార్‌హోమ్‌కు అప్పగించారు. పోలీసులు కేసు నమోదుచేసిన నాలుగు మసాజ్‌ సెంటర్లు కూడా జోన్‌-2 పరిధిలో ఉండడం విశేషం. అయితే జోన్‌-1 పరిధిలో దాదాపు 60 వరకూ మసాజ్‌ సెంటర్లు ఉన్నప్పటికీ ఒక్క కేసు కూడా నమోదుచేయకపోవడంపై పోలీస్‌ వర్గాల్లో సైతం అనుమానాలు వ్యక్తమవుతున్నాయి. కంచరపాలెం స్టేషన్‌ పరిధిలోని ఒక మసాజ్‌ సెంటర్‌లో సోదాలు నిర్వహించేందుకు వెళ్లిన పోలీసులకు అభ్యంతరకరమైన రీతిలో ఒకరు పట్టుబడ్డారు. అతడిని ప్రశ్నించగా.. తాను నగర పోలీస్‌ కమిషనరేట్‌లోని కంట్రోల్‌రూమ్‌లో ఎస్‌ఐగా పనిచేస్తున్నట్టు చెప్పారు. పోలీసులు ఆ సమాచారం ఆధారంగా పోలీసులు ఆరా తీయగా నిజమని తేలడంతో ఉన్నతాధికారుల దృష్టికి తీసుకువెళ్లారు. వారి ఆదేశాల మేరకు అతడిపై కూడా విటుడిగా కేసు నమోదు చేశారు.

నగరంలో గల స్పా/ మసాజ్ కేంద్రాల నిర్వాహకులకు, ప్రజలకు స్పా/ మసాజ్ కేంద్రాల వద్ద అమలు చేయల్సిన విధివిధానాల పై స్పష్టమైన నిబంధనలను పోలీసులు నిర్వాహకులకు తెలిపారు. స్పా/ మసాజ్ కేంద్రాల్లో నిబంధనలకు విరుద్ధంగా ఎవరైనా వ్యవహరించినా.. అసాంఘిక కార్యకలాపాలకు పాల్పడినా.. వారిపై చట్ట ప్రకారం కఠిన చర్యలు తీసుకోబడతాయని, స్పా/ మసాజ్ కేంద్రాల నిర్వాహకులకు, ప్రజలకు నగర పోలీసుల విజ్ఞప్తి చేశారు.