by Suryaa Desk | Wed, Feb 07, 2024, 07:35 PM

మన్యం వీరుడు అల్లూరి సీతారామరాజు ప్రధాన అనచరుడు గంటం దొర. బ్రిటీష్‌వారికి వ్యతిరేకంగా పోరాడిన గిరిజన సైన్యంలో గంటం దొరదే కీలక పాత్రం. అయితే గంటం దొరలాంటి స్వాతంత్ర్య సమరయోధుడి వారుసుడు కష్టాల్లో ఉన్నారు. గంటం దొర మనవడు బోడి దొర చిన్న గుడిసెలో నివాసం ఉంటున్నాడు. కనీసం ప్రతి నెలా తన అవసరమయ్యే మందులను కూడా కొనుగోలు చేయలేని దుస్థితిలో ఉన్నారు. అల్లూరి సేనలో మరో కీలక వ్యక్తి మల్లుదొర బోడి దొరను పెంచారు. బోడి దొరను 2022లో భీమవరంలో జరిగిన అల్లూరి సీతారామరాజు విగ్రహ ఆవిష్కరణ కార్యక్రమంలో ప్రధాని మోదీ స్వయంగా సత్కరించారు.

 భీమవరంలో జరిగిన కార్యక్రమంలో స్వాతంత్ర్య సమరయోధులు, వారి వారసుల్ని సత్కరించిన ప్రధాని మోదీ.. వారి కుటుంబాలకు అండగా ఉంటామని, అవసరమైన సాయం అందిస్తామని ప్రకటించారు. అయినా సరే ఇప్పటివరకు అధికారవర్గాలు బోడి దొర కుటుంబాన్ని ఆదుకున్నది లేదు. బోడి దొర కనీసం నడవలేని స్థితిలో ఉన్నారు.. మంచానికి పరిమితం అయ్యారు. బోడి దొరను ఆదుకోవాలని ఎన్నో సార్లు తాము గిరిజన సంక్షేమశాఖకు లేఖలు రాసినట్లు అల్లూరి యువజన సంఘం ప్రతినిధి చెబుతున్నారు. అలాగే కేంద్ర, రాష్ట్ర ప్రభుత్వాలకు కూడా సాయం చేయమని కోరినా పట్టించుకోలేదంటున్నారు.

బోడి దొర పరిస్థితి గురించి తెలియగానే ట్రైబల్ కల్చరల్ రీసెర్చ్ అండ్ ట్రైనింగ్ మిషన్ ఎగ్జిక్యూటివ్ డైరెక్టర్ చిన్నబాబు స్పందించారు. ఆయనకు అవసరమైన వైద్య సహాయం అందిస్తామని హామీ ఇచ్చారు. అలాగే ఐటీడీఏ ప్రాజెక్ట్ ఆఫీసర్‌ను కలిసి బోడి దొరకు సాయం అందేలా చూస్తానన్నారు. బోడి దొర ప్రస్తుతం అల్లూరి సీతారామరాజు జిల్లా కొయ్యూరు మండలం బట్టపానుకులు పంచాయతీ లంకవీధిలో.. తాటి ఆకులతో వేసిన చిన్న గుడిసెలో కుమార్తె మల్లీశ్వరి, అల్లుడితో నివాసం ఉంటున్నారు.

బోడి దొర కొంతమంది వ్యవసాయం చేసుకుంటున్నారు. బోడి దొర భార్య అచ్చియమ్మ 2022లో కన్నుమూశారు.. ఆ తర్వాత నుంచి ఆరోగ్య సమస్యలు వెంటాడటంతో ఏ పనులు చేయలేని పరిస్థితిలో ఉన్నారు. ఇంటికే పరిమితమైన బోడి దొర మంచిచెడులు కుమార్తె మల్లీశ్వరి చూసుకుంటున్నారు. బోడిదొర తాత గంటం దొర అల్లూరి సీతారామరాజు సైన్యాధిపతిగా ఉండేవారు. బ్రిటీష్ వారికి వ్యతిరేకంగా గిరిజనులో కలిసి పోరాటం చేసేవారు. 1920లలో బ్రిటీష్‌వారిపై సంప్రదాయ ఆయుధాలతో పోరాడేవారు. గంటం దొర 1924లో బ్రిటీష్ ఆర్మీతో పోరాడుతూ ప్రాణాలు కోల్పోయారు. అయితే గంటం దొరతో పాటూ పోరాటంలో ఉన్న మల్లు దొరను బ్రిటీష్ వాళ్లు అరెస్ట్ చేసి అండమాన్ జైలుకు తరలించారు.. అయితే దేశానికి స్వాతంత్ర్యం వచ్చిన తర్వాత ఆయన్ను జైలు నుంచి విడుదల చేశారు. ఆయన గంటం దొర కుటుంబం బాగోగులు చూసేవారు. అంతేకాదు మల్లు దొర 1950లో విశాఖ లోక్‌సభ స్థానం నుంచి ఎంపీగా విజయం సాధించారు.