by Suryaa Desk | Mon, Feb 05, 2024, 07:54 PM

ఏపీలో రాజకీయం వేడెక్కింది. సిద్ధం సభలతో వైఎస్ జగన్ విపక్షాలపై విమర్శనాస్త్రాలు సంధిస్తుండగా.. అటువైపు టీడీపీ అధినేత చంద్రబాబు సైతం తగ్గడం లేదు. రా.. కదలిరా అంటూ రోజుకు రెండు సభలతో జగన్ మీద విరుచుకుపడుతున్నారు. ఈ నేపథ్యంలోనే ఏలూరు జిల్లా చింతలపూడిలో జరిగిన రా.. కదలిరా సభలో సీఎం జగన్ మీద చంద్రబాబు విమర్శలు గుప్పించారు. వైసీపీ పాలనలో రాష్ట్రంలోని ఏ వర్గమూ సంతోషంగా లేదని.. జగన్‌ను భరించేస్థితిలో జనం లేరని విమర్శించారు. ఏపీలో జగన్ అధికారంలోకి వచ్చాక లక్షకోట్ల రూపాయల దోపిడీ జరిగిందని ఆరోపించారు. జగన్ అర్జునుడు కాదన్న చంద్రబాబు.. అక్రమార్జునుడు అంటూ సెటైర్లు పేల్చారు.మద్యం, ఇసుక ఇలా అన్నిచోట్లా వైసీపీ దోపిడీ సాగిందంటూ చంద్రబాబు ఆరోపణలు చేశారు. ఒక్కఛాన్స్ అని చెప్పి అధికారంలోకి వచ్చిన జగన్.. ఏపీ ప్రజలను గోదాట్లో ముంచారని అన్నారు.

మరోవైపు చింతలపూడి సభలో జగన్ కేసుల గురించి చంద్రబాబు సంచలన వ్యాఖ్యలు చేశారు. బెయిల్ కోసం జగన్ అప్పట్లో ఢిల్లీ వెళ్లి సోనియా గాంధీ కాళ్లు పట్టుకున్నారని ఆరోపించారు. ఇక షర్మిల, జగన్ అంశం వారి కుటుంబ వ్యవహారమన్న చంద్రబాబు నాయుడు.. తనమీద పడటం ఏంటని ప్రశ్నించారు. సీఎం కాకముుందే జగన్ దోచుకున్నారన్న చంద్రబాబు.. వైఎస్ఆర్ సీఎంగా ఉన్న సమయంలోనే జగన్ దోపిడీ చేశారని ఆరోపించారు. దీనికి సంబంధించి ఎన్‌ఫోర్స్‌మెంట్ డైరెక్టరేట్, సీబీఐ కేసుల గురించి చంద్రబాబు ప్రస్తావించారు. అందుకే జగన్ అర్జునుడు కాదు.. అక్రమార్జునుడు అంటూ ఎద్దేవా చేశారు. మరోవైపు చంద్రబాబు సభకు ముందు చింతలపూడి సభ వద్ద కాస్త కలకలం రేగింది. హెలిప్యాడ్ వద్ద బాంబు స్క్వాడ్ తనిఖీలు చేసే సమయంలో చిన్నపాటి శబ్దం వచ్చింది. దీంతో భద్రతా సిబ్బంది కంగారు పడిపోయారు. ఆ తర్వాత శబ్దం వచ్చిన ప్రాంతంలో తవ్వకాలు జరపగా.. ఇనుపరాడ్ బయటపడింది. దీంతో అందరూ ఊపిరి పీల్చుకున్నారు. మరోవైపు పొత్తుల లెక్కలు, సీట్ల సర్దుబాటుపై ఓ వైపు పవన్ కళ్యాణ్‌తో చర్చలు జరుపుతూనే.. మరోవైపు రా.. కదలిరా సభలతో చంద్రబాబు దూసుకెళ్తున్నారు. అటు జగన్ సైతం సిద్ధమని చెప్తుండటంతో ఏపీ రాజకీయాలు ఇప్పడు హాట్ హాట్‌గా సాగుతున్నాయి.