మేర్లపాక గాంధీ తెరకెక్కిస్తున్న ఇండో-కొరియన్ హారర్ కామెడీ సినిమా షూటింగ్ శరవేగంగా జరుగుతోంది

మెగా ప్రిన్స్ వరుణ్ తేజ్ కథానాయకుడిగా, దర్శకుడు మేర్లపాక గాంధీ తెరకెక్కిస్తున్న ఇండో-కొరియన్ హారర్ కామెడీ సినిమా షూటింగ్ శరవేగంగా జరుగుతోంది. తాత్కాలికంగా #VT15 అనే వర్కింగ్ టైటిల్‌తో రూపొందుతున్న ఈ చిత్రం, తాజాగా హైదరాబాద్‌లో కొత్త షెడ్యూల్‌ లోకి అడుగుపెట్టింది. ఇది సినిమాకు సంబంధించిన నాలుగో షెడ్యూల్ అని, ఇందులో వరుణ్ తేజ్‌పై పలు కీలక సన్నివేశాలను చిత్రీకరిస్తున్నారని చిత్ర యూనిట్ వర్గాల సమాచారం.యూవీ క్రియేషన్స్, ఫస్ట్ ఫ్రేమ్ ఎంటర్‌టైన్‌మెంట్ సంస్థలు సంయుక్తంగా భారీ బడ్జెట్‌తో ఈ చిత్రాన్ని నిర్మిస్తున్నాయి. ఇప్పటికే మూడు షెడ్యూళ్లను విజయవంతంగా పూర్తి చేసుకున్న ఈ సినిమా, మూడో షెడ్యూల్‌ను కొరియాలో చిత్రీకరించింది. గత జూన్‌లో వరుణ్ తేజ్ కొరియా వెళ్లగా, అక్కడ హీరోతో పాటు ప్రధాన తారాగణంపై వినోదాత్మక, ఉత్కంఠభరిత సన్నివేశాలను షూట్ చేసినట్లు నిర్మాణ సంస్థ గతంలో వెల్లడించింది.అంతకుముందు హైదరాబాద్‌లో తొలి షెడ్యూల్, అనంతపురంలో రెండో షెడ్యూల్ పూర్తి చేశారు. అనంతపురంలోని కియా గ్రౌండ్స్‌తో పాటు పలు అందమైన పల్లెటూరి లొకేషన్లలో చిత్రీకరణ జరిపారు. కథకు అనుగుణంగా వరుణ్ తేజ్, హీరోయిన్ రితికా నాయక్‌పై ఓ అద్భుతమైన పాటను కూడా అక్కడ చిత్రీకరించినట్లు తెలిసింది. హారర్, కామెడీతో పాటు థ్రిల్ అంశాలు కూడా ఈ సినిమాలో పుష్కలంగా ఉంటాయని తెలుస్తోంది.వరుణ్ తేజ్ పుట్టినరోజున ఈ చిత్రాన్ని ప్రకటించినప్పటి నుంచి సినిమాపై ప్రేక్షకుల్లో మంచి అంచనాలు నెలకొన్నాయి. ముఖ్యంగా ఒక భారతీయ నటుడు ఇండో-కొరియన్ చిత్రంలో నటించడం అభిమానుల్లో ఆసక్తిని రేకెత్తిస్తోంది. ఈ చిత్రంలో రితికా నాయక్, సత్య, మిర్చి కిరణ్ వంటి నటీనటులు తమ కామెడీ టైమింగ్‌తో అలరించనున్నారని సమాచారం. సౌత్ ఇండియా స్టార్ మ్యూజిక్ డైరెక్టర్‌ తమన్ ఈ చిత్రానికి సంగీతం అందిస్తుండగా, పనీర్ సెల్వం ఆర్ట్ డైరెక్టర్‌గా పనిచేస్తున్నారు.