సిల్వాసా: దాద్రా నగర్ హవేలీ మరియు డామన్ డయ్యూ (DNHDD) ప్రాంతాన్ని ఉపరాష్ట్రపతి సి.పి. రాధాకృష్ణన్ 'మినీ ఇండియా'గా అభివర్ణించారు. మౌలిక సదుపాయాల కల్పన, ప్రజా-కేంద్రిత పాలనతో ఈ కేంద్రపాలిత ప్రాంతంలో వచ్చిన విప్లవాత్మక మార్పులను ఆయన కొనియాడారు. సిల్వాసాలోని డాక్టర్ ఎ.పి.జె. అబ్దుల్ కలాం ప్రభుత్వ కళాశాలలో జరిగిన బహిరంగ సభలో ఆయన ప్రసంగించారు.
ఈ సందర్భంగా ఉపరాష్ట్రపతి మాట్లాడుతూ, గడచిన దశాబ్ద కాలంలో ప్రధానమంత్రి నరేంద్ర మోదీ నాయకత్వంలో రూ. 13,000 కోట్లకు పైగా విలువైన 450కి పైగా అభివృద్ధి ప్రాజెక్టులు చేపట్టామని తెలిపారు. విద్యా, వైద్య రంగాలలో విశేష పురోగతి సాధించామని, నమో (NAMO) ఆసుపత్రులు, కొత్త వైద్య కళాశాలతో పాటు గత మూడేళ్లలో క్షయ కేసులు 57%, పోషకాహార లోపం 58% తగ్గాయని వెల్లడించారు.
ఈ ప్రాంతంలో పర్యాటకరంగం గణనీయంగా విస్తరించిందని, పర్యాటకుల సంఖ్య 2021లో 6 లక్షల నుంచి 2025 నాటికి 50 లక్షలకు చేరిందని తెలిపారు. అలాగే 7,500 తయారీ యూనిట్ల ద్వారా ఎంఎస్ఎంఈ (MSME) రంగం 2.8 లక్షల మందికి ఉపాధి కల్పిస్తోందన్నారు. అన్ని విభిన్న సంస్కృతుల ప్రజలు సామరస్యంగా జీవిస్తూ దేశాభివృద్ధికి తోడ్పడుతున్న ఈ ప్రాంతం 'విక్షిత్ భారత్ 2047' లక్ష్య సాధనకు ఆదర్శంగా నిలుస్తోందని ప్రశంసించారు.
