జాతీయం
ముంబై లాల్బాగ్లో తీవ్ర విషాదం.. గణపతి పండల్ సమీపంలో విద్యుదాఘాతంతో ఇద్దరు మృతి, నలుగురికి గాయాలు
సూర్య జాతీయ డెస్క్: మహారాష్ట్ర రాజధాని ముంబై నగరంలో గణేష్ నవరాత్రి ఉత్సవాల వేళ తీవ్ర విషాదం చోటుచేసుకుంది. నగరంలోని ప్రముఖ లాల్బాగ్ ప్రాంతంలో ఆదివారం తెల్లవారుజామున సంభవించిన విద్యుదాఘాతంలో ఎనిమిదేళ్ల బాలిక సహా ఇద్దరు ప్రాణాలు కోల్పోగా, మరో నలుగురు తీవ్రంగా గాయపడ్డారు. కాలాచౌకి విభాగ్లోని దత్తారామ్ లాడ్ మార్గ్లో కొలువైన గణపతి మండపం సమీపంలో రాత్రి దాదాపు 2 గంటల 20 నిమిషాల ప్రాంతంలో ఈ దుర్ఘటన చోటుచేసుకుంది. ఉత్సవాల నేపథ్యంలో ఆ సమయంలో భక్తుల రద్దీ భారీగా ఉండటంతో విద్యుత్ ప్రసారం ఒక్కసారిగా వ్యాపించి తీవ్ర తొక్కిసలాట, గందరగోళ పరిస్థితులు ఏర్పడ్డాయి.ఘటనపై సమాచారం అందుకున్న వెంటనే ముంబై అగ్నిమాపక సిబ్బంది, స్థానిక పోలీసులు, బెస్ట్ విద్యుత్ అధికారులు, మున్సిపల్ సిబ్బంది సంఘటనా స్థలానికి చేరుకుని సహాయక చర్యలు చేపట్టారు. ఘటనా స్థలంలో అపస్మారక స్థితిలో పడి ఉన్న క్షతగాత్రులను హుటాహుటిన సమీపంలోని మసీనా ఆసుపత్రి మరియు గ్లోబల్ ఆసుపత్రులకు తరలించారు. మసీనా ఆసుపత్రికి తరలించేలోపే రాఘ్ని ఘనశ్యామ్ యాదవ్ అనే ఎనిమిదేళ్ల బాలిక మృతి చెందినట్లు వైద్యులు నిర్ధారించారు. అనంతరం గ్లోబల్ ఆసుపత్రిలో చికిత్స పొందుతూ గుర్తుతెలియని మరో మహిళ కూడా ప్రాణాలు విడిచారని అధికారులు వెల్లడించారు.ఈ ప్రమాదంలో గాయపడిన కిరణ్ అక్బర్ నాయక్, తన్వి నర్ష్ హాండే, సాహిల్ సందీప్ తారే, రూహీ సింగ్ ప్రస్తుతం ఆసుపత్రుల్లో చికిత్స పొందుతున్నారు. వీరిలో కొందరి పరిస్థితి విషమంగా ఉన్నట్లు వైద్య వర్గాలు తెలిపాయి. గణపతి మండపానికి విద్యుత్ సరఫరా చేసే వైరింగ్ లైన్లలో సాంకేతిక లోపం లేదా షార్ట్ సర్క్యూట్ కారణంగానే విద్యుత్ ప్రవాహం వ్యాపించి ఉండవచ్చని ప్రాథమికంగా అనుమానిస్తున్నారు. ఈ దుర్ఘటనపై పోలీసులు కేసు నమోదు చేసి విద్యుత్ తీగల నిర్వహణ, ఉత్సవ నిర్వాహకుల భద్రతా ప్రమాణాలపై పూర్తి స్థాయి దర్యాప్తు ప్రారంభించారు.
