సూర్య జాతీయ డెస్క్: నిషాద్ పార్టీ జాతీయ అధ్యక్షుడు, ఉత్తరప్రదేశ్ మంత్రి సంజయ్ నిషాద్పై వికాస్శీల్ ఇన్సాన్ పార్టీ అధినేత ముఖేష్ సహానీ తీవ్రస్థాయిలో విరుచుకుపడ్డారు. నిషాద్ సమాజం హక్కుల కోసం పోరాడాల్సిన నాయకుడు పూర్తిగా కుటుంబ రాజకీయాల ఊబిలో కూరుకుపోయారని ఆయన ఘాటుగా విమర్శించారు. మత్స్యకార, నిషాద్ సమాజం సంక్షేమాన్ని గాలికొదిలేసి తన కుటుంబానికి మాత్రమే రాజకీయ పదవులు దక్కేలా స్వార్థపూరితంగా వ్యవహరిస్తున్నారని ఆరోపించారు. ఇటీవల తనపై సంజయ్ నిషాద్ చేసిన విమర్శలను తీవ్రంగా ఖండిస్తూ, సమాజాన్ని రాజకీయంగా బలహీనపరిచి వారి రిజర్వేషన్ల డిమాండ్ను అధికార కూటమి వద్ద తాకట్టు పెట్టారని సహానీ మండిపడ్డారు.
ఉత్తరప్రదేశ్లో రాబోయే అసెంబ్లీ ఎన్నికలను దృష్టిలో ఉంచుకుని నిషాద్ వర్గం ఓట్ల సమీకరణలపై ఇరు పార్టీల మధ్య మాటల యుద్ధం తీవ్రరూపం దాల్చింది. నిషాద్ సమాజానికి దక్కాల్సిన హక్కులు, ఎస్సీ రిజర్వేషన్లు సాధించడంలో సంజయ్ నిషాద్ పూర్తిగా విఫలమయ్యారని, కేవలం మంత్రి పదవి, తన కుమారులకు ఎంపీ, ఎమ్మెల్యే టికెట్లు సాధించుకోవడమే లక్ష్యంగా వ్యవహరించారని సహానీ దుయ్యబట్టారు. స్వార్థ ప్రయోజనాల కోసం సామాజిక న్యాయాన్ని పక్కనపెట్టిన నాయకులు ఇతరులపై నిందలు వేయడం హాస్యాస్పదమని పేర్కొన్నారు. తాము నిషాద్ వర్గం ఆత్మగౌరవం, రిజర్వేషన్ల కోసం పోరాడుతుంటే, అధికారాన్ని అడ్డుపెట్టుకుని సొంత ప్రయోజనాలు నెరవేర్చుకుంటున్న వారు తమను ప్రశ్నించడం విడ్డూరమని విమర్శించారు.
నిషాద్, మల్లా, బింద్, కేవట్, కశ్యప్ వంటి ఉపకులాల ప్రజలు చాలా కాలంగా వంచనకు గురవుతున్నారని, ఆ వర్గాలకు నిజమైన రాజకీయ ప్రాతినిధ్యం కల్పించడమే తమ లక్ష్యమని ముఖేష్ సహానీ స్పష్టం చేశారు. సమాజాన్ని కేవలం ఓటు బ్యాంకుగా మాత్రమే చూసేవారి మోసపూరిత రాజకీయాలను ప్రజలు ఇప్పటికే గ్రహించారని ఆయన తెలిపారు. రాబోయే రోజుల్లో ఉత్తరప్రదేశ్ వ్యాప్తంగా విస్తృతంగా పర్యటించి నిషాద్ వర్గాల హక్కుల కోసం రాజీలేని పోరాటం చేస్తామని, అధికారంలో ఉండి కూడా జాతి సంక్షేమాన్ని విస్మరించిన వారికి ప్రజలే తగిన బుద్ధి చెబుతారని హెచ్చరించారు.
